Read Lamnso 1 Tesalonika 4 Bible Online

1 Tesalonika 4 - Lamnso bible

1 Tesalonika 4

¹Afə̀r ver, vèr nen kfə̀n a tàʼ ji vèn kuúmé á kinyo ke Tàr wòsən Jesus‑eè yiìn e vèsən, a lon feyì jii, vèn ku màysì, a nəə́ nəə́n é liì wo Nyùy taʼ ji vèn wáa ker. Liì və̀n dzə̀ wo vèr‑iì yeʼeyin ven shó, a dzə̀ woo shooy wo wù bòŋèn Nyùy.

²A vèn kì ntir se vèr‑iì tír ven shó e Tàr wòsən Jesus yir.

³Nyùy koŋ ji vèn wáa yiì moo wír və́ ŋkuuŋkùŋ, e làa yòʼ a jàŋ a kinjàŋ.

⁴Wìr dzə̀m fo vèn wáa kiíy a móo keerí wiíy və é dzəə ye yì wáa gheén Nyùy, é wíri wáa burí.

⁵Lá wìr yòʼ kù a ker wiíy kérín ji wun nyomer a dzə̀ wún mo wír ve bó á yòʼ kiìn Nyùyi yii.

⁶Lá wìr yòʼ jày e wìr e kinyò fèn, e lì wiíy ŋgaàŋ, bìʼ fo Nyùy wíy fo ŋgeʼ ye kuʼùn e wír ve á yii vinyo vee shoone réŋréŋ mo vèr‑iì sí tír ven.

⁷Bó Nyùy yòʼ‑oò lo shòʼ vèsən ji á wáa yiì liì joònè və̀n. Wù‑uù shòʼ ji á wáa ker liì a dzə̀ wo wìr ve dzəə̀n və́.

⁸Kí nén a dzə jii, wìr wo wù leey ntir rə̀n ntéŋ, leey a dzə̀ á Nyùy ntéŋ, wù yòʼ leey a dzə̀ wír. A Nyùy wo ŋgaàŋ leey ntéŋ və̀n dzə̀ wo wù fó ven Kiyoy kfə́ ke Ranén kí.

⁹Fo kinyò kee kùm kikoŋnìn ke fə̀r wùn fə̀r vee aŋgàa biimé, bó vèn yòʼ dzəə́ kér shií wo vèr wáa saŋ fo vèn, bìʼ fo vèn‑eè yeʼeyin ne fo wun woo Nyùy mo dzə̀ vèn wàa kòŋnìn.

¹⁰A vèn sí koŋnìn rúrú vèn aàfə́r vén ve á dzəə̀n é wòŋ Masedoniàa adzə̀m. Afə̀r ver, vèr nén a lon cáʼcáʼ jii, vèn kú a yiì bèy, a dù a duùn fó mbìy.

¹¹Vèn ku kfə̀n a jùmrì a dzə̀ dzəʼə̀m yee nyaáŋ, é la wìr yòʼ a wayrí wó e wírí vinyò. Wìr wáa lìm rə́ yee lim, bó a yikír. A dzə̀ mo vèr‑iì suuyin ne e vèn fó mbìy ji vèn wáa yiì a bèy.

¹²Vèn lóo yiì bèy, é wír ve bó á yòʼ kiìn Nyùyi wáa ghvəm ven, é la vèn yòʼ kfə̀n a leéy kifá fo wìr.

¹³Afə̀r ver, vèr kfə́n a tàʼ ji vèn kiíy rúrú mo kinyo ke wìr ve á kpukin ne ki dzəə̀n. Vèn kiiy bèy, é la vèn yòʼ dzə́ə a rə̀m moo wír ve bó á yòʼ leey fó mbìy, shiy kifá fo Nyùy.

¹⁴Vèsən biìmé ji Jesus‑eè kpù, e kfə̀n fəə̀ á fo kpu. Mo vèsən kiìn kee shooy, vèsən nén a kiíy sa jii, Jesus wíy lòo kfən, é Nyùy fəə́r á wir dzə̀m wo wù wayin shilív e Jesus wùn fó kpu réŋréŋ mo wù‑uù fəərin sá wun woo Jesus.

¹⁵Vèr taʼ ji lá vèn yòʼ a kwàʼtì a ji wíy lòo dzə e ghan se Jesus wiyì, é wìr fo ve vé‑eè kpukin nee búŋ kilíŋ ke dzə̀ áwune wàa dzə wùn à Jesus mo vèsən vee wír ve á dzə̀ə́ sho atin e ghan see shooyi wíy a dzə. Kinyo ke vèr suuy kìn ki lò a dzə̀ fo Nyùy, bó kí yòʼ lò fo vèr.

¹⁶Kinyo ke kí wíy a dzə ki dzə̀ jii, Taàtá Jesus wíy lòo wìy fo yuv, é wù wáa fuŋ kitávín, é taà nshìylav Nyùy kfə́n a fuŋ sa, aá wáa toŋ sóŋ Nyùy. Á fúŋ bèy, áàŋgàa biimé ve vé‑eè kpukiné nèn tòmbìy fəə̀,

¹⁷é bo ve á dzəə̀n shó e ghan see shooyi báʼtí wùn áwune, a koʼ e mvə̀m mbàʼ, é wùn à Taàtá Jesus tárnín é taa yuv. Á mo vèsən wíy koʼ bèn, é vèsən à Taàtá Jesus nèn a dzə ghán sidzə̀m.

¹⁸Vèn wáa kuumé vinyo vìn vi, a rəə̀r melív men shó.