Read Lamnso 1 Tesalonika 5 Bible Online

1 Tesalonika 5 - Lamnso bible

1 Tesalonika 5

¹Afə̀r ver, vèn kì sá ji bó yòʼ dzə̀ vèr wàa saŋ fo vèn, a shù ghán, kìn kishiíy ke Jesus wíy wìy,

²bìʼ fo vèn kiiyin ne kijuŋ ji kishiíy ké Taàtá Jesus Kristu kìn ki wíy sàsìn, e bvəy a mo shòŋ bvə̀y vitsə́ʼ.

³A kí wíy a dzə jii, wíri wíy lòo suúy ji á bòy ne, a vinyo vi sì nyaáŋ, é ŋgeʼ nèn sàsìn, e gbù mo wiíy yù wán. Yì gbu bèy, é yì nèn sə̀tí áwune, é la á yòʼ dzəə bòy.

⁴Afə̀r ver, a bó kishiíy kee shooy ki yòʼ wíy sàsìn, e bvəy fo vèn sá mo shòŋ bvə̀y vitsə́ʼ, bìʼ fo vèn yòʼ ghán e ndzə ye sənér.

⁵Ven adzə̀m dzə̀ wír ve á dzəə̀n é ndzə ye ranén, moo wír ve á ghán e shùy. Mo bó vèsən yòʼ dzəə̀n wír ve á dzəə̀n é ndzə vitsə̀ʼ,

⁶lá vèsən yòʼ a buuné moo wír vee shooy. Vèsən wáa kìʼ, a way vifií.

⁷Wíri yii buúne a dzə̀ vitsə́ʼ, nó meluʼ, baá, a dzə̀ vitsə́ʼ.

⁸Mo vèsən dzəə̀n késən wír vee shùy, vèsən ku tìír vifií, a kòŋ Nyùy, a way shilív é wùn wó, é wù wáa kìŋ vèsən réŋréŋ moo ŋgaà rə̀r wo wù màʼàn kikúm ké kishà ki, fo wìr sov shuu və́ shiliv. Vèsən kfə́n a shìy, é Nyùy wìy lùŋèr vèsən réŋréŋ moo ŋgaà rə̀r wo wù‑uù lùŋèn bìʼ fo wù‑uù teʼtin kitú kfə́ e tán kishàa.

⁹Nyùy yòʼ‑oò lo shòʼ vèsən ji wun wáy é ŋgeʼ. Wù‑uù shòʼ ji vèsən fíʼ lùŋ bìʼ Tàr wòsən Jesus Kristu

¹⁰wo wù‑uù kpuun fo vèsən ji vèsən áwune fíʼ a dzə ghán sidzə̀m, kìn wù wíy lòo wìy, a vèsən dzə̀ə́ sho, kìn wù wíy a wìy a vèsən kpúkír ne.

¹¹Mo vèn kiiyin ne vinyo vìn lèn bèn, vèn kú a shaà fo mbìy, a yiì mo vèn‑eè sí yii, é wìr mòʼón mòʼón wáa lùmèr shilív shé wùmòʼ, e kfə̀n a tavír.

¹²Afə̀r ver, vèr kfə́n a lon fo vèn ji vèn wáa ghvəm a wír ve á lim e věn mvəm, tír ven, bìʼ fo lèmèn Nyùy áwune ji á wáa leéy a fo vèn.

¹³Vèn wáa ghvəm áwune kijuŋ, a kòŋ shilív shidzə̀m, bìʼ fo áwune lim bìʼ ven. Vèn kfə́n a kuumé ji lá vèn yòʼ a taŋnín ven ven.

¹⁴Afə̀r ver, a vèr kfə̀n lón sa ji vèn kú a ker wir dzə̀m ji weè, a tir wír ve á dzə́ kisáŋ, a tavír wír ve melív mev mè dzəə́ yaʼà, e kfə̀n a sə wír ve bó á yóʼ ne kìíy vinyo.

¹⁵Vèn wáa yen fo wìr wáa siìr ŋkfə́tír e wùmòʼ. Vèn kú a mùm fó a yiì a dzə̀ vinyo ve juŋ vi e věn mvəm, e kfə̀n a yiì sa bèy e wìr dzə̀m.

¹⁶Vèn wáa sheʼrí,

¹⁷a bùnrì Nyùy ghán sidzə̀m,

¹⁸a beèrì wun fo vinyò vidzə̀m, a fə̀m dzə̀ ka. Á vinyo ve Nyùy koŋ ji wír ve á jumrì Jesus Kristu adzə̀me wáa yiì.

¹⁹Lá vèn yòʼ a sə̀r Kiyoy ke Ranén kí. Vèn wáa yu vinyo vidzə̀m a dzə̀ fó fo.

²⁰Lá vèn yòʼ a kay sa wír wo wù tiísi kinyo a dzə̀ ke wù yú fo Nyùy shuù.

²¹Vèn kú a saáy vinyo ve vèn yii vi vidzə̀m, a lèm ve juŋ vi,

²²a baàmè kfə́ə vinyò ve bi ví vidzə̀m.

²³Vèr nén a lon jii, wun woo Nyùy wo wù yii, a melív mèsən mè dzə́ nyaáŋ ku yiì, é vèn wáa dzə wír və́ ŋkuuŋkùŋ. A vèr kfə̀n lón sa jii, wù kú a shìy ven, é vèn wáa dzə ajuŋ là nsem, a kwàʼtì a dzə̀ vinyo ve juŋ vi, a ker melív me juŋ mè, é la wìr wùmòʼ yòʼ a ker lóm yìmòʼ e wun wùn gheéy, e dù, e meé e ghan se Tàr wòsən Jesus Kristu wíy a wìy.

²⁴Vèn wáa kuumé ji mo Nyùy liìn ven ji və́ vee wír, bo wù kù wíy yiì vinyo vìn vidzə̀m, bìʼ fo bó yòʼ dzə̀ wù lòʼ ven.

²⁵Vèn kú a bùnrì Nyùy fo vèr.

²⁶Vèn baámé afə́r vesəné adzə̀m, e shàʼtì, e fò e vèr.

²⁷M nen kfə̀n a fo ven nsər e Tàr wòsən Jesus Kristu yir jii, vèn ku yòŋ ŋwàʼ və̀n, áàfə́r adzə̀me wàá yú.

²⁸M nén a shàʼtì ven, a lon ji Tàr wòsən Jesus Kristu kú a kòŋ ven, a leéy a fo vèn.