Read Lamnso Joshua 13 Bible Online

Joshua 13 - Lamnso bible

Joshua 13

¹Yì‑iì dzə̀ a Joshua dzə́n ne, a viyá və́ ví sì vidzərìn, NYÙY TÀR yòŋ wun, e sùúy sho jii, «À dzə̀n ne e ŋàŋ, a nsay kù dzə̀ə́ sho e nín ye dzə̀ á sə̀.

²Virə́ʼ ve ví dzəə́ bér vi dzə̀ jii, ŋgvən se wìr veé Filistia sidzə̀m wùn à sé wìr veé Geshur si,

³e lì ŋgvən se wìr veé Awim sidzə̀m, e mbìv wòŋ yee tsə́n.» NYÙY TÀR yòŋ bèy, a ké ŋgvən yee lò fó ndzəv yee Shihor, e bìíy wòŋ Ejiv, a kfənér e mbìv yee kuy, a dù e bìíy Ekron, vé‑eè yèn ji dzə̀ á nsay wìr veé Kanan. Ké ŋgvən wìr veé Filistia ki‑iì dzə̀, a kér afon atàn, woó Gasa wùn à woó Ashdod, à woó Ashkelon, à woó Gat, à woó Ekron.

⁴Nyùy suúy jii, «A dzə̀ á kù sə̀ nsay wìr veé Kanan e dzə̀m fo mbìv yee tsə́n, e kfə̀n sə̀ Meara wo kér wír veé Sidon, e sə̀ Afek e bìíy ŋgvən wìr veé Amor.

⁵Á ku sə̀ sá nsay wìr veé Gebal, à nsay wìr veé Lebanon e dzə̀m, e dù duùn é mbìv yee fo shùy yii tó, e kèʼ fo Baal‑Gad e dù meé e Lebo Hamat.

⁶Kirə́ʼ kin ki tàtí nsay wìr veé Sidon e dzə̀m, aáwune dzə́ aàŋkoŋ, e nsàn agwan veé Lebanon wùn Misrefot‑Mayim. Mómò, m yíi jùm wír vìn adzə̀m mo wír veé Israyi nəə e nsay foo fèy. Ké ki wáa dzə ji à kù yíi jàv nsay rə̀n e wír veé Israyi ji vitsə́ʼ vév mo mò‑oò suuyin e wò.

⁷Lò ri lèn, e jàv e rám seé Isray see bvə̀ʼə̀ si, wùn à kintoʼnìn ke rám Manasse ki, aá yov ji vitsə́ʼ vév.»

⁸A dzə̀ fo kintoʼnìn ke rám Manasse ki wùn à rám Rubene, à yé Gadi, bo Mooser woo ŋgaà lìm NYÙY TÀR‑iì fò ne vév vee vitsə́ʼ a dzə̀ é mbìv Jordan yee fo shùy yii tó.

⁹Nsay yev‑iì kèʼ fó Aror e ŋguùŋè mboʼ ndzə̀v yeé Arnon, e lì ŋkàlaʼ ye yì dzəə̀n é ntìntìn mboʼ foo fèy, e tàtí ŋgvən ye yì leŋen, e lò fo Medeba e vitu ve agwan, e dù bàʼ e Dibon,

¹⁰e dù duùn e meé e bìíy Ammon. Kirə́ʼ kin ki tàtí ŋkà se laʼ sidzə̀m se Sihon woo fon wìr veé Amor‑iì sáʼá, a wù sáʼ a dzə̀ fó Heshbon.

¹¹Yì‑iì tàtí Gilead, à ŋgvən se wìr veé Geshur wùn à seé Maakat si, e lì Gwan Hermon e dzə̀m, à Bashan e dzə̀m, e dù, e mèé e Saleka.

¹²A dzə̀ ji yì tàtí woŋ Fòn Og e dzə̀m, wo wù‑uù sáʼ e Ashtarot, kfə̀n sáʼ e Edrey, a dzə̀ wír wo wù‑uù berin fó ram Refayim[26]. Mooser‑iì tòn wír vìn adzə̀m e jùm, e fə̀ə́r.

¹³Kù mày wír veé Geshur wùn à veé Maakati, ve bó wír veé Israyi yòʼ‑oò lo tòn, aá kù dzə́ e wír veé Israyí mvəm, e wìy shem lán.

¹⁴Fo ké ram Levi ki, bó Mooser yòʼ‑oò lo fò áwune nsay ji vitsə́ʼ vév. Kév kí kù‑uù jòʼsì a dzə̀ ke Nyùy‑iì yòŋèn e Mooser jii, vitsə́ʼ vév ví kù dzə̀ á vidzə̀ vé cù ye və́yí bin fo fo, ji cu NYÙY TÀR woo Nyùy wìr veé Isray.[27]

¹⁵Mooser‑iì tòʼtí nsay yeé ndzə̀n Jordan rə̀n, e fò kimbày e rám Rubene ji vitsə́ʼ vév mo kfəə sév sí dzə̀kìn.

¹⁶Nsay yev nèn kèʼ fo Aror wo wù dzəə̀n é ŋguùŋè mboʼ ndzə̀v yeé Arnon, e lì ŋkàlaʼ ye yì dzəə̀n é kintìntìn ke mboʼ yee shooy, e tàtí ŋgvən Medeba e dzə̀m ye yì leŋen é kitu ke agwan.

¹⁷Nsay rə̀n tàtí sa Heshbon wùn à ŋkà se laʼ se sí dzəə̀n é ŋgvən ye leŋén rə̀y. A sí dzə̀ ji Dibon wùn à Bamot‑Baal, à Bet‑Baal‑Meon,

¹⁸à Jahas, à Kedemot, à Mefa‑At,

¹⁹à Kiriatayim, à Sibma, à Tsəret‑Shahar e gwan wo wù júʼ e mboʼ,

²⁰e lì Bet‑Peor wùn à ŋguùŋè Gwan Pisga, à Bet‑Jeshimot.

²¹Yì‑iì tàtí ŋkà se laʼ seé ŋgvən ye yì leŋen fó yuv rə̀y sidzə̀m, à woŋ Fòn Sihon woo fon wìr veé Amori e dzə̀m. Wù‑uù sàʼ é Heshbon bo Mooser ton wùn à vilìmbìy veé Midian vee jii, Evi wùn à Rekem, à Tsur, à Hur, e lì Reba. Vé‑eè dzə́ e Fòn Sihon nsay, yór yorín.

²²Wìr wùmòʼ wo wír veé Israyi‑iì yuyrin é ghan fóo fèy‑iì dzə̀ Balaam[28] woo ŋgaà fù woo wan Beor.

²³Bìíy nsay rám Ruben e mbìv yee fo shùy yii nəə, nén a dzə ndzə́v yee Jordan. Á nsay ye vé‑eè foon e rám Rubene ji vitsə́ʼ vév mo kfə́ə sév sí dzə̀kìn, e lì ŋkà se laʼ sév, à ntèʼ sí.

²⁴Mooser‑iì fò sá nsay e rám Gadi ji vitsə́ʼ vév mo kfə́ə sév sí dzə̀kìn.

²⁵Nsay yev tàtí ŋkàlaʼ yee Jaser wùn à seé Gilead si sidzə̀m, e lì kintoʼnìn ke wòŋ Ammon, e dù e meé e Aroyer wo wù dzəə̀n é mbìv Rabba yee fo shùy yii tó.

²⁶Bìíy yev yìmòʼ lò fo Heshbon, e dù e Bamat Mispe, e dù bàʼ e Betonim, yìmòʼ ló fó Mahanayim, e dù meé e ŋgvən yeé Debir.

²⁷Mbìv yev yeé mbuŋ Jordan tàtí Bet‑Haram wùn à Bet‑Nimra, à Sukkot, à Tsafon, e lì kibér ke wòŋ Fòn Sihon woó Heshbon. Bìíy yeé mbìv yee fo shùy yii nəə, nén a dzə ndzə́v yee Jordan, e koʼ koʼón, e dù meé e kibaŋ kee Kineret.

²⁸Á nsay ye vé‑eè foon e rám Gadi ji vitsə́ʼ vév mo kfə́ə sév sí dzə̀kìn, e lì ŋkà se laʼ sév, à ntèʼ sí.

²⁹Mooser fó sá nsay e kintoʼnìn ke rám Manasse ki ji vitsə́ʼ vév mo kfə́ə sév sí dzə̀kìn.

³⁰Nsay yev kèʼ fo Mahanayim, e tàtí Bashan e dzə̀m. A dzə̀ ji woŋ Fòn Og woó Bashan e dzə̀m, à ŋkà se laʼ se Jayir see mntuùfú sí sidzə̀m se sí dzəə̀n é Bashan foo fèy.

³¹Yì kfən tàtí sa kintoʼnìn ke Gilead wùn à Ashtarot, à Edrey, a dzə̀ ntèʼ se sí‑iì tíy vitú e Fòn Og woó Bashan wòŋ. Á nsay ye vé‑eè foon e kintoʼnìn ke rám Manasse ki mo kfə́ə sév sí‑iì dzə̀kìn, a yí‑iì sàn fo Makir woo wan Manasse.

³²Á nsay ye Mooser‑iì jàvìn é ghan se wù‑uù dzə́ e mboʼ yeé Moav ye yì dzəə̀n é mbìv Jeriko, aá líysín ne Jordan, e dù e mbìv yee fo shùy yii tó.

³³Yii bèy, fo ké rám Levi[29] ki, bó Mooser yòʼ‑oò lo fò áwune nsay ji vitsə́ʼ vév. Kév kí kù‑uù jòʼsì vidzə̀ vé cù NYÙY TÀR woo Nyùy wìr veé Isray réŋréŋ mo wù‑uù suuyin e Mooser.