Read Lamnso Joshua 14 Bible Online

Joshua 14 - Lamnso bible

Joshua 14

¹Ké virə̀ʼ ve wír veé Israyi‑iì kooyin é wòŋ Kanan ji vitsə́ʼ vév kí dzə̀ jii, yì‑iì jàv Eleasar[30] woo taà cù wùn à Joshua woo wan Nun, aàtǎr ram wìr veé Israyi nsay rə̀n,

²e fò e rám seé Isray see bvə̀ʼə̀ si, e fò sá e yee kintoʼnìne. A vé‑eè maʼ kifá, tar[31] sho, e bó a kiíy kirə́ʼ ke á fó e rám yee shóo réŋréŋ mo NYÙY TÀR‑iì yiìn ne yòŋ e Mooser ji á wàá yii.

³Á wáa jàv bèy, a Mooser‑iì fò ne virə́ʼ e rám seé Isray see sibaà sí, e fò sá e yee kintoʼnìne ji vév vee vitsə́ʼ, rám sin se sí dzəə̀n kév é ndzə̀n Jordan, e mbìv yee fo shùy yii tó. Yii bèy, wù yòʼ‑oò lo fò kirə́ʼ e rám Levìi ji vév vee vitsə́ʼ.

⁴Ké wìr ve vé‑eè ràmèn fo Joosev, vé‑eè lì áwune ji rám e baà, yé Manasse wùn à yé Efrayime. Á yòʼ‑oò lo fò kirə́ʼ e rám Levìi, kù‑uù mày ŋkà se laʼ ji á wáa dzə sho, a sí kér sa virə́ʼ vé a lem nyám sév shó.

⁵Wír veé Israyi kù‑uù jàv woŋ Kanan réŋréŋ mo NYÙY TÀR‑iì suuyin e Mooser ji á wàá yii.

⁶Lòo dzə e kishiíy kímóʼ kí, wír veé ram Judàa nèn lò, e wìy, e yèn Joshua e Gilgal. Kalev[32] woo wan Jefunne woo wir Kenas wáa suúy jii, «À kì kinyo ke NYÙY TÀR‑iì yòŋèn e Mooser woo wir NYÙY TÀR kùm wòsò, aá dzə̀ é Kadesh‑Barnea.

⁷Mò‑oò dzə̀ kiyá mkweè e ghan se Mooser woo ŋgaà lìm NYÙY TÀR‑iì tumen mo fó Kadesh‑Barnea ji m shwéʼ á woŋ və̀n. M nèn kfə̀n é bàm, e naàrì e wun rú mo mò‑oò yenen a wú dzə̀.

⁸Yii bèy, afə́r vém ve vèr áwune‑eè duùné wìy kév, e kèr tím wíri, á wáa fàn. A m kù‑uù tíy kém a dzə̀ vèr NYÙY TÀR woo Nyùy wom vèr à shilív shém shí shidzə̀m.

⁹Mooser nèn lìʼ e kishiíy fóo fèy, e kàʼ mo jii, ‹Ké ru kí, nsay ye mò‑oò duùn, e tìír kiwuú kém shó sì á vitsə́ʼ vé vèr à wón vémé, e wiy du mày, bìʼ fo m kù‑uù tíy vèr NYÙY TÀR woo Nyùy və vèr à shilív shém shí shidzə̀m.

¹⁰Leéy ri, e yèn, NYÙY TÀR lèm ne mo e tin mo wù‑uù kàʼàn. Sì kiyá nshòv sitàn e mkweè mo NYÙY TÀR‑iì yòŋèn jí sìn e Mooser, a wír veé Israyi kù‑uù ghán ghanén é woʼ. Wáa dzə lán, a m sì kiyá nshòv sitàn e mwaamé,

¹¹a m kù dzə̀ə́ kitávín lán və̀n mo mò‑oò dzəə̀n é kishiíy ke Mooser‑iì tumen mo. Kitar ki kù dzə̀ə́ lèn mo kí‑iì dzəə̀n é ghan fóo fèy ke dzə̀ m wàa dù rə́r, a kfən.

¹²Bìʼ bey, fó ri woŋ agwan və̀ne e mò lèn. Woŋ wo NYÙY TÀR‑iì kàʼàn mo shó e kishiíy fóo fèy.[33] Wò‑oò lo yù é kishiíy fóo fèy mo vé‑eè fer ji wír veé Anaki‑iì dzə́ a fo, kér vikum ve ŋkà se laʼ sinín. A dzə̀ ji NYÙY TÀR yiì a dzə vèr wun, bo m yíi tòn áwune, e sə nsay yev mo wù‑uù kàʼàn.› »

¹³Joshua nèn səə̀vì Kalev woo wan Jefunne, e fò Hebron sho ji vitsə́ʼ və́.

¹⁴Hebron nèn a dzə vitsə́ʼ vé Kalev woo wan Jefunne woo wír woó Kenas e wìy shem lán, bìʼ fo wù‑uù tíy wùn NYÙY TÀR woo Nyùy wìr veé Isray shilív sə́ shidzə̀m.

¹⁵A vé‑eè yoŋ Hebron fo ŋgùʼ ji Kiriat‑Arba, a dzə̀ jii, Ntèʼ Arba. Arba və̀n‑eè dzə̀ wír wo tavín e wír vee Anakí mvəm. Á bèy, rə́r sí nèn mày fo nsay foo fèy, nyaáŋ wáa dzə fo.