Read Lamnso Joshua 22 Bible Online

Joshua 22 - Lamnso bible

Joshua 22

¹Joshua nèn bàʼtí rám Ruben wùn à yé Gadi, à kintoʼnìn ke rám Manasse keé mbìv yee fo shùy yii tó,

²e sùúy aáwune jii, «Vèn dzə̀ aá yií kinyo kidzə̀m ke Mooser woo ŋgaà lìm NYÙY TÀR‑iì yòŋèn e vèn, e kfə̀n siì yùnín mo é kinyò kidzə̀m ke m yòŋèn e vèn.

³Fo ghan sin sidzə̀m, bó vèn yòʼ‑oò lo yàr fó a sə afə́r vén, e wìy shem lán. Vèn kù‑uù sə́ áwune, a dzə̀ mo NYÙY TÀR woo Nyùy won‑eè yòŋèn e vèn.

⁴Ké lèn ki, NYÙY TÀR woo Nyùy won fò ne meemè aàfə́r véné mo wù‑uù kàʼàn áwune. Á bèy, vèn kfə́n ri e věn melaʼ e nsay ye Mooser woo ŋgaà lìm NYÙY TÀR‑iì foon e vèn é ndzə̀n Jordan fèsə, e mbìv yee fo shùy yii tó.

⁵Kù dzə̀ cáʼ ji vèn kú a yen ji á yúnín á nsər se Mooser woo ŋgaà lìm NYÙY TÀR‑iì foon e vèn, a yu ntir sə́, a kòŋ NYÙY TÀR woo Nyùy won, a ghan e wun mbòv, a yunín nsər sə́, a bar e wun wùn, a lìm fo fo shilív shidzə̀m, e fò kitú kén shó kidzə̀m.»

⁶Joshua yòŋ bèy, e səə̀vì áwune, e nèn màʼtì, á wáa dù aáwuné melaʼ.

⁷Ké kintoʼnìn ke rám Manasse kì dzə̀, a Mooser‑iì fò ne áwune nsay e Bashan ji vitsə́ʼ vév. Yii bèy, fo kímóʼ kee kintoʼnìn ke rám Manasse ki, a Joshua‑aà fò ne yéev yee nsay aàfə́r véví ghaŋ e nsay yeé mbìv Jordan, a kfən e mbìv yee fo shùy yii nəə. Mo Joshua màʼtìn vísə vee wíri ji á du á e melaʼ, wù lòo səə̀vì,

⁸a suúy jii, «Vèn sí kfə́n e věn melaʼ, kér bùʼ wùn à nyám si nyanyày, à *kisha ke mbàm ke fəvír kí, à ke baar kí, à kisha kee *brons ki, à kee kiy ki, à ndzə̀y sí nyanyày. Vèn du, á jàv nsàʼmboʼ wo vèn‑eè keerin fo aŋgaà vén vibàné vèn aàfə́r véné.»

⁹Áwune vee rám Ruben wùn à yé Gad, à kintoʼnìn ke rám Manassèe nèn màʼtì wír veé Isray e Shilo, e wòŋ Kanan, a dù ji á kfə́n aáwuné melaʼ e nsay Gilead, nsay ye vé‑eè yòvìn ji vitsə́ʼ vév mo NYÙY TÀR‑iì yòŋèn e Mooser.

¹⁰Áwune vee rám Ruben wùn à yé Gadi, à kintoʼnìn ke yé Manassèe nèn lò, a dù, e lòo meé e ŋgvən yeé ghaa Jordan, a kù dzə̀ə́ e nsay Kanan, e nèn bòm *kíy cù wo wiyí fó.

¹¹Wír veé Israyi yú ji rám Ruben wùn à yé Gadi, à kintoʼnìn ke yé Manassèe bòm á ne kíy cù e nsay Kanan, e ŋgvən yeé ghaa Jordan, e wír veé Israyí mbìv,

¹²màŋgòŋ woó Isray e dzə̀m nèn bàʼtí e Shilo ji á du, e fùnèn a áwune.

¹³Wír veé Israyi nèn tsə̀nsí Finehas woo wan taà cù Eleasar ji wù du á e Gilead, e yèn á rám Ruben wùn à yé Gadi, à kintoʼnìn ke yé Manassèe.

¹⁴Vé‑eè tùm wùn à vilìmbìy vi e ghvə̀m, kimòʼón kimòʼón fo ram see ghvə̀m e mbìv yee fo shùy yii nəə, a wìr dzə̀m kù dzə̀ taà kfəə.

¹⁵Áwune dù, e yèn rám Ruben wùn à yé Gadi, à kintoʼnìn ke yé Manassèe é nsay yee Gilead, e dzə̀r aáwune jii,

¹⁶«Kintatì ke wìr NYÙY TÀR kidzə̀m ki dzə́r jii, ‹vèn ghàn é le, e bóo yiì kfə́ə kinyò ke bi kee ben e Nyùy woó Isray?› Mo vèn bomen ne kíy cù lán ji wón, bo vèn tàv ne a dzə̀ kitú fo NYÙY TÀR bey. Vèn bìn ne ndzə̀m lán, e fəə̀ fo wun mbòv.

¹⁷Bó jay wo vèsən‑eè yiìn e Peor[40] yòʼ‑oò lo ghèén à? Vèsən kù dzəə́ sorkìr bìʼ jay woo shooy, e wìy shem lán, a bó á yóʼ ne *kfə̀mrí vitú, e ràn fó fo.

¹⁸Yì‑iì dzə̀ é ghan siy, Nyùy tsə́nsí kifə̀ʼ, vèn kfə́n a bìn ndzə̀m e NYÙY TÀR é kishiíy ké lán ki é le? A vèn lòo dzə, e tàv kitú e NYÙY TÀR lán, bo wù bvəə́shi, e shwiíy kilòŋ fo kintatì keé Isray ki kidzə̀m.

¹⁹A vèn kì taʼ kíy cù ji bìʼ fo nsay yen birin ne, vèn lìysín e NYÙY TǍR nsay fo kibàn kfə́ kí tíyí, e kòóy kirə́ʼ e věr nsàn, é vèsən wáa dzə. Dzə̀ cáʼ jii, lá vèn yòʼ tàv kitú fo NYÙY TÀR, e bòm kíy cù wón, e shaà wo dzəə̀n wó NYÙY TÀR woo Nyùy wòsən, e yiì, é vèsən kfə́n ji antavkìtu.

²⁰Lá vèn yòʼ làysìn kinyo ke kí‑iì kooyin Akan[41] woo wan Sera mo wù‑uù tenen fóo yunín nsər yee kùm vifá ve nshwì, ŋgeʼ wìy e kintatì keé Isray kí kitu kidzə̀m. Yòʼ‑oò lo kpù Akan cáʼ wo wù‑uù jayin.»

²¹Wír vee rám Ruben wùn à vé Gadi, à vee kintoʼnìn ke rám Manassèe nèn bìnèr e vilìmbìy ve ram seé Isray vi jii,

²²«NYÙY TÀR dzə̀ taà Vitu, NYÙY TÀR dzə̀ Taà Vitu, a wù kì. Kí ghèén é Isray wúnwun kiíy sá. A vèr fèn tàv rú a dzə̀ kitú, kìn ji vèr méŋ NYÙY TÀR méŋén, lá vèn yòʼ màʼtì ver atin e kishiíy ké lán ki.

²³A fèn dzə̀ ji vèr kì bóm kíy cù və̀n ji vèr wáa tsəy kóy vèr à NYÙY TÀR, a yiì cu ye tonèné, kìn yé meŋkfə̀ŋe, kìn yé kikòŋnìne, e kiy cù fèn, bo wúnwun woo NYÙY TÀR kù‑úù maʼ ŋgeʼ e věr kitu.

²⁴Yòʼ dzə̀ bey, vèr kì bóm bèy, aá fan ji a tàm wìy a dzə e ghan símóʼ sí, wón véné wìy yòŋ e vérí jii, ‹Tàtí ka vèn à NYÙY TÀR woo Nyùy woó Isray.

²⁵NYÙY TÀR‑iì jàvsìn ne vèsən e ndzə́v yee Jordane, a vèn yòʼ kfə̀n kér ghay e NYÙY TǍR si.› Kí kooy bèy, é wón véné nèn yiì, é vér vee wóné yar fó a ghvəm NYÙY TÀR, a fàn wun.

²⁶Á bèy, vèr nen yèn ji vèr‑íì bóm á kíy cù lèn, a bó yòʼ dzə̀ jii, vèr kì wíy a yiì cu sho, kìn dzə̀ ye tonèné, kìn dzə̀ ye seeríné.

²⁷Vèr‑ii bóm ji kisəəm fo vér vee wíri, à fo véné, fo ŋgwàʼ yen, à fo yéer, à fo se sí wíy a wìy fo bàm sí. Dzə̀ kisəəm ji vèsən yiì a ghvəm NYÙY TÀR e wun kirə̀ʼ kee jeéy kí, a cù wun fo e cu ye tonèné wùn à ye seeríné, à yé kikòŋnìne. Là bey, bo wón véné wíy a yòŋ e vérí é ghan se sí wiyì jii, ‹Vèn yòʼ kér ghay e NYÙY TǍR si.›

²⁸Vèr nen sùúy jii, aá wìy yòŋ bèy e vèr, kìn e wón vérí e ghan se sí wiyì, aá naari á jii, kin ki dzə̀ kisəəm ké kiy cù NYÙY TÀR ke atàr vérí‑iì bomen. Bó yòʼ‑oò dzə̀ wó cù ye tonèné kìn ye seeríné. Kù dzə̀ ji kisəəm fo vèr vee fen, à fo vèn vee fey.

²⁹Bó yòʼ dzə̀ kí kòóy ji vèr táv kitú fo NYÙY TÀR, e bìn ndzə̀m e wun, a bom kíy cù ji wó cù ye tonèné, kìn yé meŋkfə̀ŋe, kìn ye seeríné, a bó yòʼ dzə̀ kíy cù NYÙY TÀR woo Nyùy wòsən wo wú tíy e wun shùu kibàn.»

³⁰Mo taà cù Finehas wùn à vilìmbìy ve vintatì vi, à vitú ve ram seé Isray ve wùn áwune kì dzəə̀né yuun kinyo ke rám Ruben wùn à ye Gad, à yé Manassèe yòŋèn, kí gheén áwune féyì.

³¹Á bèy, Finehas woo wan taà cù Eleasar nèn sùúy aáwune jii, «Vèr kìíy ne lán və̀n ji NYÙY TÀR dzə̀ vèsən áwune, bìʼ fo vèn yoʼ tàv kitú, e yiì jay e Nyùy. Vèn sə̀ ne wír veé Isray lèn fo NYÙY TÀR maʼ ŋgeʼ aáwuné kitu.»

³²Á bèy, Finehas woo wan taà cù Eleasar wùn à vilìmbìy ve wìr veé Isray vi nèn màʼtì rám Ruben wùn à yé Gadi, à yé Manassèe é nsay yee Gilead, e nèn kfə̀n é bàm é nsay Kanan, e fò binèr làm e wír veé Israyi.

³³Kí gheén wír veé Isray, á wáa burí Nyùy. La áwune yòʼ dzəə yòŋ kinyo kee ji á du fùnèn rám sin, e tòn nsay ye áwune‑eè dzə́ sho.

³⁴Rám Ruben wùn à yé Gadi nèn shù yír kiy cù və̀y ji «Njen», e sùúy jii, «Wù tíy vinjen e vesə́n nsàn, a dzə̀ ji NYÙY TÀR dzə̀ Nyùy.»