Read Lamnso Joshua 3 Bible Online

Joshua 3 - Lamnso bible

Joshua 3

¹Joshua bvəə́shí kijàvndzə, wùn à wír veé Isray adzə̀me lò fo Shittim, e dù e ghaa dzəv yee Jordan, e tùy vibàn vév a beè fo, e dù meé mo vé‑eè yíi tum ndzə́v.

²Wáa dzə e bǎm vishiíy vitaár, vilìmbìy vi nèn ghànén e shuù se vibàn,

³e yòŋ e wíri jii, «Vèn yií yén wír veé ram Levi ve dzəə̀n atàá cù, aá sí béʼ ŋkùv mensàŋ[6] NYÙY TÀR woo Nyùy won, vèn nèn shòʼóy vibàn vén, e lò fo bàm.

⁴Ŋkùv mensàŋ yíi a dànèr ven mo bó vèn yòʼ‑oò yiì ne shaà e dzəə fen. Vèn wáa yen fóo yìi koʼtí e ghaŋ wo. Vèn yíi a wìy kén kwaʼda fo bàm moo kintoʼnìn ke may bèy.»

⁵Joshua nèn yòŋ e wíri jii, «Vèn *kfə́mrí vitú vén ví, bìʼ fo NYÙY TÀR bvəə́shi, e yiì viŋgaʼnìn ve vinyò e věn mvəm kibvəə́shí.»

⁶Joshua yiì lò, e yòŋ aàtàá cùu ji á beʼey á ŋkùv mensàŋ, a dù a sho e wírí mbìy. Áwune ku nèn yiì mo wù yòŋèn.

⁷NYÙY TÀR suúy e Joshua jii, «M sí yìi kèʼ, a koʼór wò e wír veé Israyí si adzə̀m e kishiíy ké lán ki, aáwune fíʼ kiíy rú ji m dzə̀ á wòsò, kù mo mò‑oò dzəə̀n vèr Mooser.

⁸À yíi yòŋ aàtàá cù ve á béʼ ŋkùv mensàŋe ji á yií mee e ndzəv yee Jordan, á nə̀ə́, a tiy a sho.»

⁹Joshua nèn sùúy e wír veé Israyi jii, «Vèn wiy, e yù jí se NYÙY TÀR woo Nyùy won sí.»

¹⁰Á wìy, wù wáa suúy aáwune jii, «Vèn yuúrí kinyo ke kí yíi yiì, é vèn kiíy ji Nyùy wo tin dzə̀ á vèn áwune, a wù kù yíi jùm vitúm fo nsay mo vèn nəə. Wù yíi jùm wír veé Kanan wùn à veé Hiti, à veé Hivi, à veé Perisi, à veé Girgashi, à veé Amori, à veé Jebusi.

¹¹Kí dzə̀ jii, ŋkùv mensàŋ Taà Ndzə yíi dù e věn mbìy, é bo á túmsín ndzə́v yee Jordan.

¹²Á bèy, vèn shóʼtí vilum nshòv sibaà e ghvə̀m, aá yuúrí, wír mòʼón mòʼón fo ram seé Isray sidzə̀m.

¹³Fo ké ndzəv kí, atàá cù ve á béʼ ŋkùv mensàŋ NYÙY TÀR woo Taà Ndzəə lóo laʼ kiwuú é meshavtí meé Jordan, é ndzə́ví ku nèn tìnén fó a leŋ, é ye yí kaayìi nèn kù a run, a koʼ e yuv.»

¹⁴Kí nen kù a dzə bèy, wír veé Israyi báʼ vibàn vév, a dù ji á túm Jordan, atàá cù ve vé‑eè béʼ ŋkùv mensàŋe wáa dù aáwuné mbìy.

¹⁵Wáa dzə e ghan sin, a sì ghán sé ŋkav vifa, a Jordan rún, e fəə̀ é kwaʼ mo wù yii rún e ghan foo fèy. Kù mo atàá cù ve vé‑eè béʼ ŋkùvi laʼan kiwuú é ghaa ndzəv,

¹⁶ndzə́ví tínén, ye yí‑iì sə́y fo taa tiím, e fùmén, e dù kwaʼda, a meé e ŋkàlaʼ yee Adam ye yì dzəə̀n é ghaa Tsaretan. Kinshèr ki ku jìysí, e sə̀y é mbìv rìbà ndzə̀v woó mbuŋ Araba, aá yoŋ ji Ndzə́v Shiŋgwaŋ, a bó shindzə́v shí yòʼ dzəə́ kum fo. Wíri nèn a liysín e ndzə̀n Jeriko.

¹⁷Aá líysinè, aàtàá cù ve vé‑eè béʼ ŋkùv mensàŋ NYÙY TÀRí kù tíy e mvə̀m Jordan e nsay ye yumér. Á tiím fó, e meé mo kitúm kidzə̀m ki‑iì tumen, e mày.