Read Lamnso Joshua 6 Bible Online

Joshua 6 - Lamnso bible

Joshua 6

¹Yì‑iì dzə̀ é ghan sin, a wír veé Jerikòo sə́tí shuu se kày, e kfə̀n a shìy fo wír veé Israyi nəə́, a bó wìr yòʼ nəə e ŋkàlaʼ, a bó wìr yòʼ fəə́.

²NYÙY TÀR yiì lò, e sùúy e Joshua jii, «Yuúrí, e yù, m wày ne ŋkàlaʼ yee Jeriko rə̀n e wò kiwo, à fòn, à vé rərí, a kù dzə̀ antav ve ghaʼtíné.

³Vèn à vé rər vée kù yíi lev, e kaarí ŋkàlaʼ rə̀n, e kù a yiì bèy kàŋ mòʼón e kishiíy, kishiíy ntuùfú.

⁴Ŋkùv mensàŋ yíi a dù sa, aàtàá cùu kù yíi shem mbìy ŋkùv mensàŋ wír saàmbà, aá kér sóŋ see loŋ kiyaʼ adzə̀m. Lóo dzə e kishiíy kee saàmbà, vèn lèv, e kaàrí ŋkàlaʼ kàŋ saàmbà, áàtàá cùu wáa toŋ sóŋ.

⁵Vèn yií yú, aáwune tóŋ sóŋ, kiléŋléŋ kí dúnén, wìr dzə̀m rəə̀mé kitávín, é kay yeé ŋkàlaʼa nèn keèsì. Yí keesì, é vé rər adzə̀me nèn kù kòʼ, e nə̀ə́ nəə́n é ŋkàlaʼ tìítiy.»

⁶Joshua woo wan Nun və̀n nèn jàŋrì atàá cù, e sùúy aáwune jii, «Vèn li ŋkùv mensàŋ NYÙY TÀR, áàtàá cù vee saàmbàa wáa ker sóŋ see loŋ kiyaʼ, a dù sho fo mbìy.»

⁷Wù nèn sùúy e wíri jii, «Vèn du, e kèʼ, a lev, a kaarí ŋkàlaʼ, é shúu rərí wáa dù ŋkùv mensàŋ NYÙY TÀR fó mbìy.»

⁸Mo Joshua kì banrin ne wíri bey, shúu rə́r mbìyi nèn ŋàʼáy, a dù fo mbìy. Atàá cù vee saàmbà ve vé‑eè kér sóŋé wáa jùmrì áwune, a toŋ sóŋ, e bóo lì ve vé‑eè béʼ ŋkùv mensàŋ. Shúu rər wúmóʼó sə́ʼ e ŋkùv mensàŋ bàm, a sóŋé kù diy, là meemè.

¹⁰A Joshua kì sə̀r ne wíri ji lá wìr yòʼ waà yiì rəə̀mé, a bó ghán sí gheén. Lá wìr yòʼ fə̀m sùŋnín, é la á yòʼ yù á jí wìr, é kí kú a dzə a bèy, e meé e kishiíy ke wun yíi yòŋ, é bo wíri rəə́mé.

¹¹Joshua yiì, á kaárí ŋkàlaʼ e ŋkùv mensàŋ kàŋ mòʼón, e nèn kfə̀n, e shìíy e kibeèy.

¹²Joshua bvəə́shí, e lò yuv kijàvndzə, atàá cùu lì ŋkùv mensàŋ NYÙY TÀR,

¹³vee saàmbàa lì sóŋ sí, a dù e ŋkùv mensàŋ mbìy, a toŋ là meemè, a shúu rərí du aáwuné mbìy. Shúu rə́r bàmé wáa səʼ ŋkùv mensàŋ NYÙY TÀR, a sóŋé kù diy, là meemè.

¹⁴Á ku lèv é kishiíy ke kí‑iì meen ji baà kin, e kaàrí ŋkàlaʼ kàŋ mòʼón, e nèn kfə̀n é kibeèy. Á ku yiì bèy kishiíy ntuùfú.

¹⁵Wáa dzə e kishiíy kee saàmbà, ndzə káʼ, á lò e yuv, e dù, a lev, a kaarí ŋkàlaʼ réŋréŋ mo vé‑eè léví, e lèv bey kàŋ saàmbà. Kù‑uù mày é kishiíy fóo fèy ke vé‑eè kaarin kàŋ saàmbà.

¹⁶Lòo dzə fo kàŋ wo wù‑uù meen ji saàmbà, aàtàá cùu sí tóŋ sóŋ, Joshua nèn yòŋ e wíri jii, «Vèn lo, e rəə̀mé, bìʼ fo NYÙY TÀR foon ne ŋkàlaʼ rə̀n e vèsən.

¹⁷«Vèn kù kér fóo laàr ŋkàlaʼ wùn à kifá ke kí dzəə̀n shó ki kidzə̀m. Kifá kidzə̀m ki yíi a dzə nshwǐ NYÙY TÀR,[12] a vèn yíi laàr laàrìn kidzə̀m, é may Rahav woo sàkì wùn à wìr dzə̀m wo wù dzəə̀n e wun lav ve á yíi bòy, bìʼ fo wù‑uù lìtìn vé ŋkiyi ve vèsən‑eè tumen.

¹⁸Wìr kim kitú kfə́, a yen fóo màʼ kiwó e kifa ke nshwì, a fə̀m dzə̀ ka. Mo kí siìn nshwì, bo kí yíi sə̀ŋ lòn, e wìy sho e kibeèy, é kí bír, é ŋgeʼ ye tavín nəə́ wír veé Isray.

¹⁹Yii bèy, kifá kidzə̀m ke á fèrìn e *kisha ke mbàm ke fəvír kí, à kee kisha ke mbàm ke baar kí, à kee kisha kee *brons ki, à kee kisha kee kiy ki, aá fəə́r jeéy ji vé NYÙY TÀR. Vèn yíi lì, e wìy sho, e way e wun kitàv.»

²⁰Á bèy, mo atàá cùu tóŋ sóŋ, wíri nèn bùʼ shirəə́, káyi nèn keèsì. Vé rər adzə̀me kóʼ, e nə̀ə́ e ŋkàlaʼ kàŋ mòʼón, e sə̀.

²¹Mànjòŋ nèn laàr kifá kidzə̀m keé ŋkàlaʼ e nyùy rə̀r, kifá kidzə̀m moo vilum wùn à vikìy, à wánlè, à ŋgàywìr, à nàʼ, à njiì, à vimbèʼbìy ví.

²²Kí wáa koóy bèy, a Joshua kì yòŋ ne e vilum vee abaà ve vé‑eè shweʼen woŋe jii, «Vèn du e Rahav lav, e fə̀ə́r wùn à kfə́ə rəə́ mo vèn‑eè kàʼàn wun.»

²³Wónlě nsùm vee aŋgàa ŋkiy vìyi nèn dù, e fə̀ə́r Rahav wùn à kitàr kí, à kiyìy kí, aàfə́r vəə́, à wìr dzə̀m woo wun kfəə. Á fəə́r wùn à kfə́ə rəə́ e dzə̀m, e nèn dù lèm e shweesí kibeèy keé Isray.

²⁴Á nèn tòn ŋkàlaʼ, yì shwí. Kifá kidzə̀m ke kí‑iì dzəə̀n shó ki bvə́ʼə́m, ku jòʼsì kisha ke mbàm ke fəvír kí wùn à ke baar kí, à vikáŋ vee brons vi, e lì kisha kee kiy, ve vé‑eè liìn, e lèm e kitàv ké NYÙY TÀR.

²⁵Yii bèy, Joshua lùŋèr Rahav woo sàkì wùn à kfə́ə rəə́, bìʼ fo Rahav‑iì lìtìn aŋgàa ŋkiy ve wù‑uù tumen é Jeriko. Kfə́ə Rahavi ku nèn a dzə e Isray, e shem lán[13].

²⁶Joshua ká kiŋka e ghan fen, e lìʼ jii, Lǒn NYÙY TÀRí ku shòv wír wo wù wíy a mùm ji wun siir a ŋkàlaʼ yee Jeriko rə̀n fo. Wù wíy way a kinsə̀ŋ, e lày wan və mbìy woo lumèn. Wù wíy wayrí a shuu se kày, e lày wan və bàm woo lumèn.[14]

²⁷Á mo NYÙY TÀR‑iì dzəə̀n wùn Joshua, leŋ vəə́ wáa dù woŋ e dzə̀m.