Read Lamnso Joshua 7 Bible Online

Joshua 7 - Lamnso bible

Joshua 7

¹Yii bèy, la wír veé Israyi yòʼ yùnín nsər NYÙY TÀR yee kùm vifá ve nshwì. A kí dzə̀ jii, wìr woó ram Juda wùmòʼ, a yírí dzə̀ ji Akan‑eè lì vifá ve nshwì vímóʼ ví. NYÙY TÀR nèn shwìíy kilòŋ wùn à wír veé Israyi. Akan‑eè dzə̀ wan Karmi, a Karmi‑iì dzə̀ wan Sabdi, a Sabdi‑iì dzə̀ wan Sera, a dzə̀ kfə́ə Juda.

²Joshua yiì lò, e tùm vilum fo Jeriko ji á du á e ŋkàlaʼ Ay. Ay və̀n‑eè dzə̀ é ghaa kirə̀ʼ ke á yoŋ ji Bet‑Aven, wo wù dzəə̀n é mbìv Betel, ye yì kiʼ fo shùy yii tó. Wù lòo tum, e yòŋ aáwune jii, «Vèn kóʼ, e dù kìy Ay.» Vilum vìyi ku nèn dù mo Joshua suuyin.

³Áwune dù, e wìy, e yèn Joshua, e sùúy sho jii, «Lá à yòʼ rə̀sí, a buʼ ji à ku tsə̀nsí wir dzə̀m ji wù kóʼ, e dù, e fùnèn wír veé Ay, bìʼ fo á yòʼ dzəə̀n anín. A dzə̀ à tsə̀nsí wíri moo ansə̀kì abaà kìn ataár bèy.»

⁴Á bèy, wír veé Israyi nèn kòʼ moo ansə̀kì ataár bèy. Yii bèy, wír veé Ayi kàrìr áwune, e siìr e bàm.

⁵Vé‑eè kòʼ, e mèé e shùu kày, wír veé Ayi fəə́, e jùm áwune, e sə̀ʼə́y gwan, e dù, e mèé fo á túŋ tíy, e yùyrí wír veé Isray moo nshòv ntuùfú e mtaár bèy. Melív me wìr veé Isray mè seém, áwune kfə́n a fàn.

⁶Joshua yú, e nèn saàsì ndzə̀y sə́, e gbù fo nsay, e tsə̀m sí wùn à kfə́m sé wìr veé Isray si wáa neŋ e mbìy ŋkùv mensàŋ NYÙY TÀR, e dù, e meé e ŋkuùr, aá yóʼ ne kibvər e kitu.

⁷A Joshua néŋ bèy, bunrì jii, «Éè NYÙY TÀR woo Taà Ndzə, abaày, à lì ver, e lìysín Jordan sho ji ka? Dzə̀ ji à taʼ e fo ver é wír veé Amori laar a? Bo yì‑iì bòŋ é vèr goʼ a dzə e ndzə̀n Jordan woo və̀sə.

⁸Éè NYÙY TÀR, a dzə̀ m sùúy ji ka lèn, aàŋgàa vibǎn wìr veé Israyi kárír ne áwune, á léʼ leʼén.

⁹Wír veé Kanan wùn à vitúm vímóʼ ví yíi yu kinyo kìn, bo á sí wiy, e giìmè ver, e yuyrí wir dzə̀m, e səʼsí yír yér fó kitu ke nsay. Kí kooy bèy, áà yiì yèe le e yír yé ye ghaʼtíné fo wíri wáa kay wò.»

¹⁰NYÙY TÀR yòŋ e Joshua jii, «Lò é yuv. À gbù, e tsə̀m sí fo nsay ji ka?

¹¹Isray jày ne, áwune shòʼór ne nsər ye mò‑oò foon aáwune. Áwune bòʼtí kimboʼtì, e shòŋ vifá ve nshwì vímóʼ ví, e wày aáwuné mvə̀m vifa, aá kì yíi laàr.

¹²Bìʼ bèy, bó yòʼ kì dzə̀ áwune tàm wùn aàŋgaà vév vibàné. Áwune kì bìn ndzə̀m áàŋgaà vév vibàné, bìʼ fo áwune kì siìn wír ve á laar láarin. Vèn kì lì ne vifá ve nshwì, a bó yòʼ kì dzə̀ m kfə̀n a dzə vèsən, a bó vèn fəə́r vifá ve nshwì vin fo věn mvəm, e laàr.

¹³Lò ri, e dù, e *kfə̀mrí wíri, e yòŋ aáwune ji NYÙY TÀR woo Nyùy woó Isray yoŋ a jii, vèn kfə́mrí vitú vén ví, aá bvəə́shí, a yen o. Éè mǒ Isray, kifá ke nshwì kí dzə̀ é věn mvəm. Bó yòʼ dzə̀ vèn kfə̀n tàm vèn aàŋgaà vén vibàné, a bó vèn fəə́r kifá ke lòn kin fo věn mvəm.

¹⁴Yòŋ aáwune jii, bvəə́shi lóo dzə kijàvndzə, á wìy tìím e ŋkùv mensàŋ mbìy, e ram sí ram sí. Rám ye m dìnèn,[15] é yí wiy é lav sí lav si. Lav ye m dìnèn, é yì wiy é vitǎr vitàr. Kitàr ke m dìnèn, é kí wáa wìy wír mòʼón mòʼón.

¹⁵Wìr wo á yenen kifá ke nshwì shó, bo á yíi tòn ŋgaàŋ wùn à kfə́ə rəə́, à kifá kidzə̀m ke wù kér ki. A dzə̀ á kù tòn, bìʼ fo wù shoʼorin nsər NYÙY TÀR, e wìy e nshoórsí wo ghaʼán e Isray kitu.»

¹⁶Ndzə bvəə́shí, a kaʼ, Joshua kóʼór wír veé Isray fo si, e ram sí ram sí, kí nèn koò rám Juda.

¹⁷Wù nèn kòʼór rám Juda fo mbìy, kí nèn koò lav Sera. Wù nèn kòʼór lav Sera fo mbìy, e vitǎr vitàr, kí nèn koò kitàr ké Sabdi.

¹⁸Wù nèn kòʼór wír mòʼón mòʼón woo Sabdi kitàr, kí nèn koò Akan woo wan Karmi, Karmi woo wan wàn Sera.

¹⁹Joshua nèn yòŋ sho jii, «Wan wòm, suúy suuyrú lèn fèn e NYÙY TÀR woo Nyùy wìr veé Isray si, e kà kitú ké ki. Yòŋ e mò kinyo ke à yiìn kí. Lá à yòʼ a mùm fóo lìtì fo mò.»

²⁰Akan bìnèr jii, «Dzə̀ rú, m jày ne e NYÙY TÀR, Nyùy woó Isray. A kinyo ke m yiìn kí dzə̀ jii,

²¹vé‑eè lóo tòn ŋkàlaʼ, m tó é ndzə̀y yeé Babilon yìmòʼ, e kfə̀n yèn *kisha ke mbàm ke fəvír kí *ashekel ghii baà, à kóŋ kishà ke mbàm ke baar kí, shekel mtàn, e nèn a ker shií shó feyì, e nèn wòvír. Á yíi yen a m dzəə́mé e mǒ kibàn, à kisha ke mbàm ke fəvír kí shó, a kí dzə̀ fó sar.»

²²Joshua ku nèn tsə̀nsí vilum ámóʼó, á léʼ, e dù e Akan kibàn, e yèn vifá ve nshwì viy, a ví dzə̀ rú fó vilitìn, a kisha ke mbàm ke fəvír kí dzə̀ fó sar.

²³Á nèn lì, e wìy, e yèn Joshua wùn à wír veé Israyi shó adzə̀m, e nèn neèr vifá vee shooy e NYÙY TǍR si.

²⁴Joshua wùn à wír veé Isray adzə̀me nèn lì Akan woo wan Sera, e tàtí kishà ke mbàm ke fəvír kí, à ndzə̀y sí, à kisha ke mbàm ke baar kí, à wón və́ vee vilum, à vee vikìyí, e lì anàʼ wùn à vimbèʼbìy ví, à bvə́y si, à kibàn kí, e tàtí kifá kfə́ kidzə̀m ke wù‑uù kérí, e dù sho e Kiwoóy ké Akor.

²⁵Joshua dzə́r jii, «À wìy e ŋgeʼ yee ben e věr kitu ji ka? NYÙY TÀR maʼ ŋgeʼ e wò kitu lán.» Wìr dzə̀m woó Isray nèn tsə̀mrí Akan wùn à kfə́ə rəə́ e tíyí, e yùyrí, e nèn lì, e tàtí wùn à vifá və́ ví vidzə̀m, e tòn.

²⁶Á màysì, e nèn fùm vilán e wun kitu, a ví dzə̀ə́ fo e shem lán. Áwune yiì bèy, NYÙY TÀR nèn yàr kilòŋ ke shwiiyín kí. Kèʼ fo ghan fóo fèy, á nèn kù a yòŋ kirə́ʼ kee shooy ji Kiwoóy ké Akor, a dzə̀ ji Kiwoóy ké Lòn.