Read Lamnso Joshua 8 Bible Online

Joshua 8 - Lamnso bible

Joshua 8

¹NYÙY TÀR nèn yòŋ Joshua, e sùúy sho jii, «Lá à yòʼ a fàn, lá à yòʼ a yàʼ. Lì vé rər veé Israyi adzə̀m, é vèn áwune kóʼ, e tòn Ay. M wày ne fon woó Ay e wò kiwo, à wír vəə́, à ŋkàlaʼ rə, à nsay rə.

²À yíi lovtí e fòn woó Ay wùn à wír vəə́ réŋréŋ mo wò‑oò lovtin e fòn woó Jeriko wùn à və́ vee wíri. Yii bèy, à yíi lì lèn kéŋ yév wùn à nyám sév sí ji nshwì wó. À yíi baʼtí wír ámóʼó, aá laáy laayín é bǎm ŋkàlaʼ.»

³Joshua wùn à vé rər adzə̀me nèn ŋàʼáy ji á du, e taamé Ay. Wù tàr vé rər ve tavkíné nsə̀kì mtaár, e tsə̀nsí fo mbìy vitsə́ʼə́.

⁴Wù lòo tsənsí, e sùúy aáwune jii, «Vèn yuúrí kijuŋ, vèn yíi laáy e bǎm ŋkàlaʼ fo mentsə̀m, a dzə fo kibáʼtín mo á yíi ŋaʼáy, e tòn ŋkàlaʼ yee shooy.

⁵Vèr à kibér ke wíri kí yíi lò, a nəə́ ŋkàlaʼ fo mbìv yee fó mbìy, wír vee fóo shóʼ e věr bàm mo vé‑eè shoʼon é ghan sé mbìy si bey, é vèr nèn siìr ŋkfənèr, a nyeŋ.

⁶Áwune lóo jùm ver, é vèr nèn lì áwune, e fəə̀ ŋkàlaʼ sho, bìʼ fo áwune yíi a kwàʼtì ji vèr sí léʼ áwune mo vèr‑iì leʼen é ghan sé mbìy si bey. Vèr lévti áwune bey,

⁷é vèn nèn fəə̀ fó kirə̀ʼ ké kilaáy, e sùm ŋkàlaʼ yev. NYÙY TÀR woo Nyùy wòsən yií way e vèsə́n kiwo,

⁸vèn sumè, vèn nèn tòn. Vèn ku yiì réŋréŋ mo NYÙY TÀR yòŋèn e vèn, e jùmrì kinyo ke m suuyin e vèn kí.»

⁹Joshua nèn tsə̀nsí áwune fó mbìy, á dù e kirə̀ʼ ké kilaáy, a shìy fo, a kirə́ʼ kin ki dzə̀ é ntìntìn Ay wùn Betel, a kí kiʼ mbìv Ay, yee fo shùy yii nəə. Joshua nèn shìíy kfə́ a dzə̀ é kibeèy.

¹⁰Wáa dzə kibvəə́shí kijàvaʼndzə, Joshua nànèn, e bàʼtí vé rərí kirə́ʼ kimòʼón, wùn à vilìmbìy veé Isray vi tsəə́né, e kòʼ shó e Ay.

¹¹Vé rər adzə̀m ve vé‑eè dzəə̀n wùn à Joshuàa nèn kòʼ é ghaa ŋkàlaʼ Ay fo kùy, a kiwoóy kí jávsín wùn à Ay.

¹²Wù lí vé rərí moo ansə̀kì atàn bèy, e tùm ji á laáy á e ntìntìn Betel wùn Ay, a kìʼ mbìv Ay a dzə̀ yee fo shùy yii nəə.

¹³Mo á màysìn, e lèm vé rərí, shúu rər wo kuʼùné ku nèn a dzə kuy fo Ay, wo terií wáa dzə e mbìv Ay yee fo shùy yii nəə. Joshua nèn dù, e shìíy kfə́, a dzə̀ é kiwoóy.

¹⁴Fòn woó Ay yén, a wír veé Israyi wíy ne, wùn à vilum vee wun ŋkàlaʼa gìtì, e bàʼtí. Yì wáa jàv, á fəə́kír ji wùn à wír veé Israyi tám á e kibiʼtí ké a yen mbuŋ Jordan. A bó wù yòʼ‑oò ló a kiíy ji shúu rər wúmóʼó kì làáy ne a e bǎm ŋkàlaʼ, wo wú‑uù yíi fəə, e sùm ŋkàlaʼ bám bám.

¹⁵Joshua wùn à wír və́ adzə̀me nèn siìr a dzə̀ ŋkfənèr, a leʼ a dù e mbìv wòʼ, a boʼ ji áwune fàn ne a wír veé Ay.

¹⁶Á nèn fə̀ə́r vilum veé Ay adzə̀m ji á wáa jùm a wír veé Isray. Joshua wùn à wír vəə́ kú a levtí áwune, a fəə ŋkàlaʼ sho, a dù kwaʼda.

¹⁷La lùmèn yòʼ gòʼ e Ay kìn é Betel fóo fəə e wír veé Israyí bàm. Á ku nèn màʼtì ŋkàlaʼ e rə́, a jùm a dzə̀ wír veé Isray.

¹⁸NYÙY TÀR yòŋ Joshua, e sùúy jii, «Nàn kòŋ ye à kér e wò kiwoo, a ròm Ay sho, bìʼ fo m yíi way ŋkàlaʼ yee shoon e wò kiwo. Joshua ku nèn nàn kòŋ rə́, a ròm Ay sho.»

¹⁹Kù mo Joshua nànèn bey, shúu rə́r bàmé wo wú kì laayin və́yi ku nèn lò kàŋ mòʼón, e gìtì fəə̀kír fo kirə̀ʼ ké kilaáy, e sheèmé e ŋkàlaʼ, e sùm, e kù nèn wàyrí və́y shó.

²⁰Vilum veé Ayi lòo màʼ sí e bàm, e yèn, a kindzə́ʼ ki dzəm, kóʼ fo ŋkàlaʼ, shúu yúm áwune, vitaáví vév ví máy. Á nèn lò mèŋ fó a nyeŋ, a dù, bìʼ fo wír veé Isray ve vé‑eè léʼ, du e woʼó‑oò bìnkìn ne, e kìʼ áwune.

²¹A kí dzə̀ jii, mo Joshua wùn à wír vəə́ yenen ji wír ve á kì laayiné sùm a ne ŋkàlaʼ, e tòn, kindzə́ʼ ki wáa koʼ fo fo, á nèn bìnkìr, e tsə̀ə́m, a yuyrí wír veé Ay.

²²Vé rər ve vé‑eè tònèn ŋkàlaʼa nèn fəə̀ sá e wír veé Ayí bàm, wír veé Ayi nèn a dzə fo kintìntìn, bìʼ fo wír veé Israyi‑iì siìn mbìv sidzə̀m. Wír veé Israyi yúyrí áwune adzə̀m, la wìr yòʼ lèʼ, la wìr yòʼ gòʼ e tin.

²³Ku jòʼsì fon woó Ay wo vé‑eè koon e tin, e dù fò e Joshua.

²⁴Mo wír veé Israyi màysìn, e yùyrí vilum veé Ay e kirə̀ʼ ké woʼ kí e ŋgèŋgèr fo wír veé Ayi‑iì jùmèn áwune, e dù sho, wír veé Israyi nèn kfə̀n é bàm é ŋkàlaʼ, e màysì, e yùyrí kibér ke wìr ke kí‑iì dzəə̀n fó.

²⁵Wír veé Ayi‑iì kpù adzə̀m e kishiíy fóo fèy ansə̀kì nshòv sibaà e ghvə̀m, vilum wùn à vikìy.

²⁶Bó Joshua yòʼ‑oò lo sə̀yír kiwó ke wù‑uù nànèn kòŋ shó, e meé mo vé‑eè màysìn wir dzə̀m woó Ay, e laàr.

²⁷Kù‑uù jòʼsì nyám si wùn à vifá ve ker vi veé ŋkàlaʼ Ay, ve wír veé Israyi‑iì liìn ji nsàʼmboʼ wov, réŋréŋ mo NYÙY TÀR‑iì suuyin e Joshua ji á wàá yii.

²⁸Á mo Joshua wùn à wír vəə́‑əə̀ tònèn Ay bèy, fóo nèn kù gòʼ e vifə̀m e shem lán.[16]

²⁹Yii bèy, Joshua sə́ŋ fon woó Ay e kici, wù wáa səŋ fo e meé e ŋkuùr. Shùy lòo nəə́, wù yòŋ, á kér fó fo, e dù màʼ e shùu kày wo wú nəə e ŋkàlaʼ, e kùʼtí kikfə́r ke tiy é kitu wo, a kí kù dzə̀ə́ fo e shem lán.

³⁰Joshua nèn wìy lò, e kòʼ é Gwan Ebal, e bòm *kíy cù NYÙY TÀR woo Nyùy wìr veé Isray fo.

³¹Wù‑uù bòm réŋréŋ mo Mooser woo ŋgaà lìm NYÙY TÀR‑iì suuyin e wír veé Israyi ji á bóm. Kù mo kí dzəə̀n kisáŋén é Ŋwàʼ Nsər Mooser jii, á bóm á kíy cù e tíy yee là náŋsíne, ye bó kifá ke lìm kee kisha ki yoʼ kùm. Wù bóm, á nèn yiì cu NYÙY TÀR ye tonèné, à yé kikòŋnìne[17] shó.

³²Aá kù dzə̀ə́ fo, e wír veé Israyí si, Joshua nèn sàŋ naaŋkàntì nsər se Mooser e tiy, a kù dzə̀ síwun se Mooser‑iì saŋen.

³³Wíri nèn sìysì wún, e tìím mbìv sibaà, a kìʼnìn, a leéy ŋkùv mensàŋ NYÙY TÀR wùn aàtàá cù ve vé‑eè béʼée, áwune vee rám Levi. Aá kù tíy fo adzə̀m ji vilìmbìy wùn à ntom se saʼ si, à wír ve á tínen nsaʼa, à wìr dzə̀m, à vé nsayi, à viŋgwìy vee áwuné mvəm ví. Kintoʼnìn ke wìr ki tiím, e bìn ndzə̀m e Gwan Gerisim, kímóʼ kí bín ndzə̀m e Gwan Ebal réŋréŋ mo Mooser woo ŋgaà lìm NYÙY TÀR‑iì tavin ne, e sùúy ji á mo á wíy yiì, e bóo səə̀vì wír veé Isray.

³⁴Joshua nèn yòŋ kinyo keé Ŋwàʼ Nsər kidzə̀m. Wù yòŋ jí se kisəə̀vì, e yòŋ sé lòn, kù mo sí dzəə̀n sisáŋén é Ŋwàʼ Nsər.

³⁵Bó jì yòʼ‑oò lo gòʼ fo nsər se Mooser‑iì foon, ye Joshua yòʼ‑oò lo yòŋ e màŋgòŋ woó Isray, e lì vikìy wùn à wóné, à viŋgwìy ve ví‑iì dzə́ aáwuné mvəm ví.