Read Lamnso 2 Tesalonika 1 Bible Online

2 Tesalonika 1 - Lamnso bible

2 Tesalonika 1

¹Ŋwàʼ və̀ne sàŋ mo woo Por vèr à Silar, à Timoti fo kintatì keé Tesalonika ke dzəə̀n ké Nyùy woo Tàr wòsən wùn Taàtá wòsən Jesus Kristu.

²A vèr lón ji Tàr wòsən Nyùy wùn Taàtá wòsən Jesus Kristu kú a kòŋ a ven, a leéy fo vèn, a yiì, é melív men mè wáa dzə nyaáŋ.

³A dzə̀ vèr kù a beèrì Nyùy bìʼ ven ghán sidzə̀m. A kí ghèén fo vèr wáa yiì bèy, bìʼ fo vèn wáy shilív e Nyùy wùn kijuŋ, du duùn fó mbìy, kfə̀n koŋ vitú vén féyì.

⁴Á kinyo ke kí yii, bo vèr wáa burí ven e vímóʼ vee vintatì ve Nyùy vi, a fìʼtì mo vèn yén ŋgeʼ sinín, a wíri ban ven é ŋàŋ, a vèn kù tíy vèn à Nyùy, wáy shilív a dzə̀ e wun wùn.

⁵Mo vèn yén ŋgeʼ, kù wáy shilív e Nyùy wùn, kí nén a dìn mo Nyùy yii yii vinyo və́ vidzə̀m réŋ, là kiloʼ. Wù taʼ ji vèn wìy ghèén fó a dzə e wùn mvə̀m saʼ. Dzə̀ kinyo ke kí yiìn, bo vèn wáa yen ŋgeʼ lèn.

⁶Yii bèy, a Nyùy kù wíy yiì sa réŋ e wír ve á fó ven ŋgeʼ lène, e siìr ŋgeʼ see shooy aáwuné kitu.

⁷Fo vèsən, wíy lòo dzə e kishiíy ke Taàtá wòsən Jesus wíy sàsìn, e bvəy fo yuv wùn à nshèelav sə́ se kuʼkìn sí, é Nyùy nèn fə̀ə́r vèsən fəə́rín fó ŋgeʼ foo fèy.

⁸A Jesus wíy wìy a dzə̀ é mvə̀m kiliìmé ke və̀y, e nèn màʼ ŋgeʼ e wír ve á méŋ Nyùyi, e kfə̀n màʼ e wír ve á tenen sáʼka Nyùy wo juŋ woo kùm wun woo Taàtá wòsən Jesuse.

⁹Aáwune nèn nə̀ə́ e ŋgeʼ yee là may e kishiíy fóo fèy, a bó yòʼ dzə̀ áwune shòv Taàtá Jesus e si e ghan se wù wíy a saʼ vifon və́, a ker vikuʼùy ve ghaʼán ví.

¹⁰Wír və́ adzə̀me wíy yen vikuʼùy və́ ve ghaʼán vin vi é kishiíy fóo fèy, e jaáy, a sùyrì wun. A vèn wíy a dzə sa e ŋgoo foo fèy, bìʼ fo vèn‑eè biimen kinyo ke vèr‑iì fiʼtì e vèn.

¹¹Vèr lóo kuumé kinyo ke kí wíy koóy e kishiíy fóo fèy, vèr nèn a bùnrì ghán sidzə̀m, a lon jii, Nyùy wòsən ku yiì, é vèn gheén á fó a dzə wír və́ vé ruú mo wù‑uù liìn ven ji vèn wáa dzə. Vèr kfə́n a lon ji wù fó ven vitaáví, é vèn maysi, e yiì a vinyo ve juŋ vi ve vèn taʼ, e yiì vidzə̀m, e kfə̀n màysì lim ye vèn wayin shilív e Nyùy wùn, a yiì rə̀n.

¹²Nyùy wòsən wùn Taàtá wòsən Jesus Kristu ku sə̀, é vèn wáa yiì vinyo vìn vidzə̀m, a ghvəm Jesus, a sùyrì wun e dzəə fóo fèn. Vèn lóo yiì bèy, é wíri kfə́n a burí sa ven bìʼ wun woo Taàtá wòsən Jesus.