Read Lamnso 2 Tesalonika 3 Bible Online

2 Tesalonika 3 - Lamnso bible

2 Tesalonika 3

¹Afə̀r ver, ke kí berin kí nén a dzə ji vèn wáa bùnrì saa fo vèr. Lóo bùnrì, vèn wàa lon ji sáʼka Nyùy wáa sàmèr a cércér, é wíri wáa biimé, a ghvəm réŋréŋ mo vèn‑eè yiìn.

²Vèn kfə́n a bùnrì sa ji Nyùy sə́ á ver fo wír ve bií, bìʼ fo bó á yòʼ biíme sáʼka woo shooy wír adzə̀m.

³Fo vèn, vèr nén a tiír vifií ji Taàtá Jesus kù wíy a tavír a ven, a shìy ven fo Satan woo ŋgaà vinyò ve bi ví. Dzə̀ kinyo ke wù‑uù kàʼàn, a bó yòʼ dzə̀ wù lòʼ ven.

⁴Taàtá Jesus nén a yiì, vèr wáa way shilív e věn wùn, a kiíy jii, vèn sí yii a vinyo ve vèr‑iì tirin ven shó, aá kù wíy a yiì bèy, a dù duùn fó mbìy.

⁵Vèr nen kfə̀n a lon jii, wun woo Tàr wòsən kú a dànèr a melív men, é vèn wáa kòŋ Nyùy, a yu a dzə̀ fó fo mo wúnwun woo Kristu‑uù yú.

⁶Afə̀r ver, vèr nén a fo sáʼ yímóʼó, a vèr fó a dzə̀ e Taàtá wòsən Jesus Kristu yir ji vèn wáa baàmè a afə́r vesən ve á yii ŋgòy, káy kinyo ke vèr‑iì yeʼeyin ven shó.

⁷Vèr‑iì ló a suúy e vèn ji vèn kú a bìʼnìn kinyo a dzə̀ á ke vèr‑iì yii e ghan se vèsən‑eè dzəə̀n. Vèsən‑eè dzə́, a bó vèr yòʼ‑oò ló a yiì ŋgòy.

⁸Vèr yòʼ‑oò ló a yi kifá ke wìr kisáŋ. Vèr‑iì lim e shùy, lim vitsə́ʼ, túŋ akwiiròn, e bó a ker kifá ké a yi, bìʼ fo vèr yòʼ‑oò taʼ, e way wír wùmòʼ é kibèʼèy.

⁹A yì‑iì dzə̀ kirə́ʼ kér fo vèn wáa yiír ver kisáŋ. Yii bèy, vèr ku nèn a yiì bèy ji vèn wáa bìʼnìn a liì wor.

¹⁰Vèn kuúmé nsər ye vèr‑iì foon e vèn é ghan see shooy jii, a wìr tèn fó lìm kifá, lá á yòʼ biìmé saa, é wù yíkír.

¹¹Vèr suuy bèn, bìʼ fo vèr yú ji wír ámóʼó dzə̀ e věn mvəm, aá yii ŋgòy, sev sèvìn kisáŋ, wáyri shuu e wírí vinyò, a bó á yòʼ lim a kifá.

¹²Vèr nén a kàntì wír vee bey, a tir e Jesus Kristu yir jii, áwune dzəʼəm á e nsay ji nyaáŋ, a lìm yév yee lim, e fíʼ a koóy a vév vee vifá ve yi.

¹³Fo kibér ke wìr ki, afə̀r ver, lá á yòʼ a dor fó a yiì liì wo juŋ.

¹⁴A wìr bèn dzə̀ shó wo wù tén fó yu kinyo ke vèr saŋen é ŋwàʼ fèn, vèn səə̀m ŋgaàŋ, a baàmè wun, é wù wáa woomé.

¹⁵Yii bèy, lá vèn yòʼ a bàn wun bánen. Vèn wáa tir wun tírín moo fə́r won.

¹⁶M nén a shàʼtì ven adzə̀m, a lon jii, wun woo Taàtá wòsən Jesus wo wù fó nyaáŋ kú a yiì, é melív men mè wáa dzə a nyaáŋ, a fə̀m kooy ka. A m kfə̀n lón ji wù kú a dzə a vèn áwune ghán sidzə̀m.

¹⁷Sàŋ mo woo Por shaʼtì rə̀n e kiwó kém kí. A dzə̀ mo m yii səəm aŋwàʼ vém ben.

¹⁸Taàtá wòsən Jesus Kristu kú a kòŋ ven, a leéy fo vèn.