Read Lamnso 1 Timoti 2 Bible Online

1 Timoti 2 - Lamnso bible

1 Timoti 2

¹Kinyo ke dzə̀ m wàa tir wír Nyùy, a boòrì áwune shó fo mbìy ki dzə̀ jii, á kú a bùnrì fo wìr dzə̀m, a lon a ji Nyùy ku shàm áwune, a leéy fo áwune, e kfə̀n a beèrì Nyùy fo áwune amòʼón amòʼón.

²Á kú a bùnrì bèy, bo taaka fo afone wùn à wír ámóʼó ve á sáʼ woŋe adzə̀m, a lon fo áwune, é woŋe fíʼ a dzə ji nyaáŋ, é vèsən wáa dzə dzə́ ye juŋe, a yu a dzə̀ fo Nyùy, a ghan mo wù koŋè.

³Aá bunrì bèy, bo á yii kijuŋ feyì. Dzə̀ kinyo ke Nyùy koŋ ji vèsən wáa yiì, wun woo Nyùy wo wù‑uù fəərin vèsən fó lòn ji á fiʼ wìy lùŋ.

⁴Wù koŋ ji wìr dzə̀m luŋ, kfə̀n taʼ ji wìr dzə̀m kiíy á kinyo ke dzəə̀n ke ru kí.

⁵A dzə̀ wù lùŋèr wír adzə̀m, bìʼ fo kù jòʼsìn wun ji Nyùy wùn mòʼón. Tàr Dzəə̀ wáa dzə sa e mòʼón wo wù tíy e Nyùy wùn à wírí nsàn, a dzə̀ Jesus Kristu wo wù‑uù liìn mbom wìr, a dzə réŋréŋ sá ji wír.

⁶Wù‑uù fò kitú kfə́ ji wun tín wíri adzə̀m fo áwuné lǒn vinyò ve bi ví. Nyùy nèn dìn e ghan fóo fèy ji wun koŋ a ji wìr dzə̀m wìy lùŋ.

⁷Jesus Kristu nèn lì mo ji ŋgaà ntum və ji m wáa fìʼtì a dzə̀ kinyo kee shoon. Wù‑uù lo lì mo rú, a bó m yòʼ bóʼti. A wù‑uù lì jii, m wáa yeʼéy wír ve bó yòʼ dzəə̀n veé Isray kinyo ke dzəə̀n ke ru kí, aáwune wáy shilív e wun woo Kristu wùn.

⁸Ke m koŋ feyì ki nén a dzə jii, vintatì vidzə̀m vi lóo dzə̀ʼə̀m, vilum ámóʼó kù a dzə ve dzə̀ á wàa fo bunrì. A dzə̀ kù a dzə vilum ve bó á yòʼ wáyri wó e vinyò ve bi ví, e bóo kfə̀n a nàn wó yee shooy ji á bunrì. Ku kfə̀n a dzə sa wír ve bó yòʼ dzə̀ á wàa shwiíy kilòŋ, a taŋnín wùn à wíri.

⁹Vikìy lóo wìy fo kintatì, á wàa màʼ ndzə̀y a dzə̀ se sí gheenen ji wír Nyùyi wáa màʼ, a kiíy mo dzə̀ á wàa lò ji weè, a ghvəm vitú vév. Lá wiíy yòʼ rə̀sí, a naŋsín kitú, a ba, e kfə̀n a lom wún áànjàʼkírí, a kur ndzə̀y símóʼ sí ji see jeéy.

¹⁰A dzə̀ viŋgòn vév ví kù a dzə liì wo juŋ wo áwune wáa yiì moo vikìy ve á yú a dzə̀ fo Nyùy.

¹¹Vikìy nəə e kintatì, á dzə̀ʼə̀m kisə́sə ji nyaáŋ, a yu a dzə̀ fo ŋgaà yèʼéy.

¹²M yoʼ biìmé ji dzə̀ vikìy wàa yeʼéy vilum, a bó yòʼ dzə̀ á wàa fo sáʼ e vilum. Wiíy kù kér fó a dzə kisə́sə.

¹³Á wáa kuumé ji Nyùy‑iì tòmbìy bòm a dzə̀ Adam, e bóo bom Efa.

¹⁴Kú a dzə Efa wo wù‑uù biimen, Satan bóʼtí wun, wù shóʼór nsər Nyùy. Wù yòʼ‑oò lo bòʼtí Adam.

¹⁵Yii bèy, mo ké wiíy ki dzəə̀n ji wù wáa lìy a dzə̀ wón, Nyùy kù yòʼ fó wun vijuŋ, a wù bèn wáy shilív e Nyùy wùn, koŋ wun, e fò kitú kfə́ ji wir Nyùy, a ghan mo dzə̀ wír Nyùyi wàa ghan.