Read Lamnso 2 Timoti 2 Bible Online

2 Timoti 2 - Lamnso bible

2 Timoti 2

¹Wan wom Timoti, kú a yeʼtí a dzə̀ é vitaaví ve Jesus Kristu fó e vèsən ví, a tiy kitávín.

²Kú a kuumé kinyo ke wò‑oò yú, a m fiʼtì, a wíri tíy, yú anín ki. Ku lì kinyo kee shooy ki lèn, e wày e wír ámóʼó wo ve à kiìn ji dzə̀ wír vee jwáʼ, aá wáa yeʼéy sa wíri shó.

³Ku tàtí vèsən, e biìmé ŋgeʼ moo ŋgaà rə̀r wo juŋ wo wù maʼ rə́r a dzə̀ sé Jesus Kristu.

⁴Kú a kuumé ji wìr yii lóo dù e shùu rər, wù làysìn á vinyo ve wù‑uù rə́si yii fo laʼ, e tìír vifií cáʼ ji wun kú a yiì a dzə̀ á kinyo ke mfòómé wo wù sáʼ wun suuyì.

⁵Ké ŋgaà kinyeŋ ki kú a dzə sa bèy. Bó yòʼ dzə̀ wù sò kifá, a bó wù nyéŋ mo nsər suuyì.

⁶Kí kfə́n a dzə jii, wìr wo dzə̀ wù tòmbìy yùtí kifá keé sum kù dzə̀ á ŋgaà sùm wo wù‑uù rə́si lim sho.

⁷Ku rə̀tì vinyo ve m yòvìn vin vi, e shù mo nsàv dzəə̀n. Nyùy yíi fo wò vifií, áà kiíy mo ví dzəə̀n.

⁸Kú a kuumé a dzə̀ Jesus Kristu. Dzə̀ wun kitú ke sáʼka Nyùy wo juŋ wo m rə́si fiʼtì. A dzə̀ jii, wù‑uù wìy, e kpù, Nyùy fəə́r wun fo kpu. Dzə̀ wun *Mfə̀ə́r wo wù‑uù loòn fo Fòn Davir ram.

⁹Aá kùr mo áàsháŋé, m wáa yen ŋgeʼ moo ŋgaà jay bèn, a dzə̀ bìʼ sáʼka Nyùy woo shooy. Yii bèy, a bó yòʼ dzə̀ á kùr sáʼka Nyùy, e shèm fo wù wáa sàmèr.

¹⁰M nen sə̀ ŋgeʼ sidzə̀m, é wír ve Nyùy‑iì shoʼon ji vəə́ fiʼ tàtí wùn à Jesus Kristu, e lùŋ, e nə̀ə́ e vijùŋ vee là may.

¹¹Kinyo ke dzə̀ vèsən wàa tiy sho ki dzə̀ ke á yii suuy jii: A vèsən tàtí, e kpù vèsən à Jesus, bo wù kù wíy lùŋèr vèsən, é vèsən áwune wáa dzə.

¹²A vèsən toòmé ŋgeʼ ji weè, bo wù kù wíy lì sa vèsən, é vèsən áwune wáa saʼ ndzə. A vèsən lò, e mèŋ wun, bo wù wíy meŋ sa vèsən.

¹³A vèsən fə̀m lò, e shòʼór kinyo ke vèsən‑eè biimen, bo bó yòʼ dzə̀ wù shòʼór kfə́ kee kinyo, bìʼ fo wù kù yii tíy a dzə̀ e wùn jì.

¹⁴Kú a kuumé kinyo kìn ki e wír vée, a tir áwune e Nyùy yir ji á ku màʼtì a mbìʼ kisaŋ woo kùm vinyo vee là ndzə̀n. Kee shooy ki yòʼ dzə̀ kí sə̀ wír, a dzə̀ kí kù bìvír wír bívírín.

¹⁵Ghár lim yée kitávín, e làa yòʼ dzə́ə wìy a woomé ji wò‑oò yii a ŋgòy. Kú a lìm ji Nyùy wáa sheʼrí wò ji ŋgaà lìm wo juŋ wo wù yéʼey wíri kinyo kfə́ ke ru kí é dzəə yee réŋ shilív shimòʼón.

¹⁶Kú a leʼ mbìʼ kisaŋ wo bó wù yòʼ yéʼey kinyo kee kùm Nyùy léʼén. A dzə̀ wù kù a yiì, wíri wàa meŋ Nyùy méŋén, a dù duùn fó mbìy.

¹⁷Vinyo ve wír vee shooyi yéʼey vi dzə̀ moo kiváv ke kí səə kirə́ʼ ké wìr, nəə nə̀ə́n. A Himenayur wùn Filetur dzə̀ ámóʼó fo wír ve m suuy vìne.

¹⁸Áwune màʼtì ne kinyo ke dzəə̀n ke ru kí, a yeʼéy kév jii, mo wíri wíy fəə fo kpu, vé‑eè fəə̀ á ne. Aá yéʼey bèy, nèn bvəər vifií vé wíri ji bó á yòʼ dzəə́ wìy fəə a fo kpu.

¹⁹ Yii bèy, a bó yòʼ dzə̀ kifá ki sə̀ʼ kinsə̀ŋ ke Nyùy wayin gheéy, aá sàŋ shó jii, «Nyùy kì wír ve dzəə̀n ji və́,» e kfə̀n sàŋ jii, «Wìr dzə̀m wo wù suuy ji wun dzə̀ wir Nyùy, kù kér fó a màʼtì vinyo ve kisaŋ vi.»

²⁰Lóo dzə e lav ye kùʼùn yìmòʼ, á wàa ker vighín wùn à vitém vi vinín, kfəə́ si kfəə́ si. Aá fér vímóʼ ví a dzə̀ e *kisha ke mbàm ke baar kí, vímóʼ ví e ke fəvír kí. Vímóʼ ví, aá sém a dzə̀ kicí, e bòm vímóʼ ví bómén. Fo vighin vin, vímóʼ ví nén a dzə ve á kér vishiíy vidzə̀m, vímóʼ ví wáa dzə vé kiŋkàʼ ke kinyò.

²¹Ké wìr ki nén a dzə jii, a wù fə̀ə́r kiwó fo liì kisaŋ, bo wù sì á moo kighín ke ŋgaà lav shavin ji ké kiŋkàʼ ke kinyò. Nyùy nen lèm wír woo bey, wù wáa yiì lim rə́ ye juŋe e dzə̀m.

²²Mo kí dzəə̀n ben, lá à yòʼ a way vifií é vinyò ve kisaŋ vi ve wónlèé yii kér shií shó. Ku wày vifií ví ji à wáa yiì a dzə̀ á vinyo ve ru ví, a way shilív e Nyùy wùn, a kòŋ wíri, a dzə ji nyaáŋ mo wír ve á tíy kév wùn à Taàtá wòsən Jesus Kristu shilív shimòʼóne yii yii.

²³Kú a leʼ mbìʼ woo kùm vinyo ve wíri rə́si biʼ là ndzə̀n, a bó vifií ví yòʼ dzə̀ shó. À kì sá ji dzə̀ mbìʼ woo shooy kù bàyír wíri báyírín, á wàa taŋnín.

²⁴A bó kí yoʼ ghèén ji wìr wo wù lim lim Nyùy wáa taŋnín gheéy. A dzə̀ wù kù a ker a dzə̀ shilív she juŋ shi fo wìr dzə̀m, a yeʼéy wíri é dzəə ye dzə̀ á yù, a kfəmén.

²⁵Wíri lóo kìnèn kinyo kfə́, wù wàa naàrì áwune ji weè, a leéy a dzə̀ ji Nyùy ku shàm wír vee shooy, aá biner vifií vév, e biìmé a kinyo ke dzəə̀n ke ru kí,

²⁶é vifií vév ví nèn kfə̀n fó, aá boy fó kitam ke Satan‑eè wayin, áwune lì sho, a yu a dzə̀ fó fo.