Read Lamnso 2 Timoti 4 Bible Online

2 Timoti 4 - Lamnso bible

2 Timoti 4

¹M nen kfə̀n a tiír kinyo kímóʼ kí e wò wùn, a m suuy bèn, tiir a dzə̀ Nyùy fo mbìy, kfə̀n tiir Jesus Kristu wo wù wíy saʼ nsaʼ wìr dzə̀m, kìn dzə̀ ve tíne, kìn dzə̀ aŋkfə. Mo wù kù wíy kfən, e neèr sáʼ rə́ vifòn, m nén a suúy e wò ji

²à kú a fìʼtì a kinyo kfə́, a fìʼtì ghán sidzə̀m, kìn wíri koŋ, e yu, kìn bó á yòʼ koŋ, e yu, a dìn ajay vév, a naàrì mo dzə̀ á yiì. Kú a yeʼéy wíri ghán sidzə̀m ji weè, a yiì, é melív mev mè wáa lùm e Nyùy kinyò.

³Kú a kiíy ji ghán sí waà sí gheenè, se wíri yòʼ wíy a kòŋ fó a yuurí kinyo ke dzəə̀n ke ru kí. Á kù wíy a kòŋ a dzə̀ kinyo ke vituʼùr vév ví yur ji á wáa yu, e nèn a baʼtí vév vee aŋgàa yeʼéy, aá wáa fìʼtì a dzə̀ kinyo ke melív mev mè tíy sho.

⁴Á yii bèy, aá nèn màʼtì kinyo ke dzəə̀n ke ru kí, a yuurí a dzə̀ vinjeenjèm ve vinyò.

⁵Yii bèy, ké ki kú a dzə jii, à kiíy mo dzə̀ à wàa tiy ghán sidzə̀m, a dzə kibáʼtín fó sə ŋgeʼ. Kú a yiì líme a dzə̀ yé wìr wo wù ghán, fiʼtì sáʼka Nyùy wo juŋ, a yiì vinyo ve Nyùy‑iì wayin e wò kiwo vi vidzə̀m.

⁶Kee kùm mo kí wáa dzə jii, ghán se m sí yìi màʼtì nsay si sì á fo mentsə̀m. Sì á ghán se á yíi lì mo, e yuyrí bìʼ kinyo ke Nyùy.

⁷M yiì ne yéem yee mbìv. M fùnèn ne e Nyùy kinyò feyì, e sò kinyeŋ ke mò‑oò nyéŋé, a tiy kitávín vèr Nyùy wo m wayin shilív é wùn wó.

⁸A m kì jii, Taàtá wòsən Jesus wo wù wíy a tinén kinyo ke wìr réŋ mo kí dzəə̀n lèm ne a vinə́ŋsí vém, a wù wíy kfən e kishiíy fó, é wù fó, é m sov ji fəə yém nsiì. A bó wù yòʼ wíy fo a dzə̀ e mò cáʼcáʼ gheéy. Wù wíy fo e wír ve vé‑eè koŋ wune adzə̀m, shiy ji wù wiy.

⁹Timoti, ku mùm feyì fó tav wìy, e yen mo.

¹⁰Kú a kiíy ji Demar lò ne, a kòŋ a dzə̀ vijuŋ veé ndzə, e màʼày mo, e dù, a dzə e Tesalonika. A Kiresen dù ghán e wòŋ Galatia, Titur dú kfə́ é Dalmatia.

¹¹Ku jòʼsì Luk lèn e mǒ ghaŋ. À lóo wìy, à kù lì Maak, a wìy sho. Dzə̀ wír wo dzə̀ wù sə̀ mo féyì.

¹²Ticikur dzə̀ kfə́, a m tùm ne e Efesor.

¹³À lóo wìy, à kù lì kikúm kém ke kuʼùn kí ke mò‑oò màʼtìn e Kapur lav e ntèʼ yee Towar, e kfə̀n lì sa aŋwàʼ vém, bo taaka ve m sáŋ vinyo vém shó.[1]

¹⁴Kú a kiíy ji Aleŋsanda woo ŋgaà kilàm bìvír a vinyo vém féyì, a Nyùy wíy làʼ wun fo kinyò ke wù‑uù yiìn.

¹⁵Kú a kiíy mo à ghán vèn wun. Wù kinèn kinyo ke vèsən fiʼtì feyì kitávín.

¹⁶Kee bìʼ nsaʼ yem kí nén a dzə jii, yì‑iì dzə̀ fó kàŋ mbìy wo mò‑oò koʼon é kibàʼ ke nsaʼ ji m túner kitú kém, wìr yòʼ‑oò dzə̀ shó wo wù‑uù tíy e mǒ mbìv gheéy. Wìr dzə̀m‑eè nyéŋ mo nyéŋén. Yii bèy, Nyùy ku làysìn kee shooy.

¹⁷A wun woo Nyùy‑iì lo tìím e mǒ bàm, a tavír mo, m wáa fìʼtì kinyo kfə́ tèéter, wír ve bó á yòʼ kiìn Nyùyi wáa yu adzə̀m. Wù kfən sə̀ mo, la á yòʼ tìnén nsaʼ e ghan see shooy, e fò mo, áàbvərə̀ʼə́ kfə́r.

¹⁸A kù dzə̀ mo wun woo Nyùy wíy fəə́r mo fó vinyò ve bi ve wíri taʼ ji á yii e mò vidzə̀m, e lì mo ji nyaáŋ, e lèm e wùn wòŋ woó yuv. Vèsən kú a burí wun viyá viyá là may. Amen.

¹⁹Ku shàʼtì Piisila wùn Akwila, e kfə̀n shàʼtì Onesiforur wùn à kfə́ə rəə́.

²⁰Eratur kù dzə̀ə́ e Korin, a mò‑oò màʼtì Toofimur e Melita, bìʼ fo wù‑uù joyì.

²¹Ku mùm feyì fó wìy, é bo ghán sé kintòn si wáa gheén. Yubulur wùn à Puden, à Linur, à Kiladia shaʼtì wò. A kù dzə̀ mo afə́r vesən vee féne shaʼtì wò adzə̀m.

²²M nén a shàʼtì sa wò jii, Nyùy kú a shìy shilív shé, a leéy a fo vèn à wír vée adzə̀m.