Read Lamnso Titur 2 Bible Online

Titur 2 - Lamnso bible

Titur 2

¹Ké wò woo Titur ki kú a dzə jii, à wáa yeʼéy a wíri a dzə̀ kinyo ke kí wáa shemsín wùn à duŋrì ye ruú.

²Lóo dzə vilum vee aránsisi, à wàa tir áwune ji lá á yòʼ a way a vifií é melùʼ. Á wáa way vifií a dzə̀ á e vinyò ve áwune yii, a yiì réŋ mo ví dzəə̀n. Á ku ghàr a dzə̀ á kinyo ke Nyùy kitávín, a kòŋ wíri, a lì ŋgeʼ sidzə̀m ji weè, e làa yòʼ a wàʼ.

³Kù dzə̀ sá mo à wáa tir vikìy vee aránsisi ji á wáa ker a liì a dzə̀ wo vikìy ve á yú fo Nyùy, e làa yòʼ a duu viduú, e làa yòʼ a fo kitú e meluʼ mè. Áwune wáa dìn a dzə̀ á liì wo juŋ,

⁴a dàn vikìy ve dzə̀ə́ wónlè, aáwune wáa kiíy mo dzə̀ á wàa geʼ aàlúm vév wùn à wón véví.

⁵Aá kfə́n a kiíy sa mo dzə̀ á wàa kwàʼtì kinyo, e bó a yiì, e làa yòʼ a leéy ndzə. Á wáa leéy a dzə̀ fo áwuné nsaàlav kijuŋ, a ker liì wo juŋ, a yu fo alúm véví. Á lóo yiì bèy, é la wìr yòʼ dzə́ə a nyàysì kinyo ke Nyùy ke vèsən áwune tíy sho.

⁶A kù dzə̀ sá mo dzə̀ à wàa tir wónlě vilum ji á wáa kwàʼtì a vinyo, e bó a yiì.

⁷Titur, kú a ker ké ki a dzə̀ liì wo juŋ, áàwàʼ vé vìne wáa yen, a bìʼnìn. Lóo yeʼéy kinyo, à wàa yeʼéy shilív shidzə̀m, e làa yòʼ a fə̀m kinyo fə́men.

⁸Kú a fèr jí si a dzə̀ se ru sí se bó yòʼ dzə̀ wìr wàa ker kinyo kée suúy e mvəm wó, é wìr wo wù kinèn kinyo késən fíʼ woomé, e buŋ kinyo ke dzə̀ wù lòr vèsən shó.

⁹Lóo dzə wír ve dzəə̀n akwàn, à kù a tir ji á wáa yu a dzə̀ fo atàr véví, a yiì vinyo vidzə̀m, é ví wáa bòŋ áwune. Lá áwune yòʼ a bìʼtì kimbìʼtì wùn aàtàr véví,

¹⁰e làa yòʼ a shwìvìr kifá. Áwune kú a yiì vinyo tìítiy, a dìn ji áwune dzə̀ á wír vee réŋ. Á lóo yiì bèy, é wíri nèn a yen duŋrì ye vèsən duŋrì kùm Nyùy wo wù luŋèr vèsən ji kinyo.

¹¹Dzə̀ mo dzə̀ wír Nyùyi kù a yiì, bìʼ fo Nyùy dìnèn ne mo wù koŋ wíri, shám áwune, aá fíʼ lùŋ adzə̀m.

¹²Kí nen tìr vèsən jii, á maʼti á liì wo bó wù yoʼ ghèén Nyùy, e làa yòʼ a siimé vinyo veé ndzə fèn. Vèsən wáa dzə e ndzə fèn, a tiír kiwuú, a fìʼ, a yiì vinyo a dzə̀ vee réŋ, a yu a dzə̀ fo Nyùy,

¹³a shìy vijuŋ ve vèsən tiirin vifií shó, ji Jesus Kristu bvə́y, a wù sí kér vikuʼùy a dzə̀ veé yuv. Dzə̀ wun Nyùy wòsən wo ghaʼán wo wù luŋèr vèsən.

¹⁴Wù‑uù fò kitú kfə́, e kpù fo vèsən, e tìn vèsən fó vinyò ve bi ví vidzə̀m ji wun náŋsín wír ji və́, aá wáa dzə là jay, e tiír vifií ji á wáa yiì a dzə̀ vinyo ve juŋ vi.

¹⁵Á vinyo vìn ve à kù kér fó yeʼéy wíri shó, a tavír melív mev, a dìn fo wìr jayin. Kú a yeʼéy, a dìn ji à sə́ vitaáví a dzə̀ fo Nyùy, e làa yòʼ biimé, é wìr wáa kay wò.