Read Lamnso Titur 3 Bible Online

Titur 3 - Lamnso bible

Titur 3

¹Kú a kuumé e kintatì ki jii, á wáa yu a wír ve á sáʼ woŋ, a yiì mo á suuyì, a dzə kibáʼtín fó a yiì vinyo ve juŋ vi vidzə̀m.

²Lá á yòʼ a suúy a kinyo ke bi kí e wìr bàm, a yen fo wùn à wìr wáa taŋnín. Á kú a ker wir dzə̀m ji weè, a fo kilíŋ ke dzəə̀n ké wìr e ŋgaàŋ.

³Kú a kuumé ji vèsən‑eè ló a yiì saa kiyúŋ, a tav kitú, a jay vinyo. Vèsən‑eè fiìnè vitú vesən ji á wáa yiì mo á koó, a yi a dzə̀ kitú. Vèsən kù‑uù rə́si dzə́, kér a dzə̀ melív me bi mè, siíme kinsiimè, a vèsən à wíri bannìnè.

⁴Yii bèy, Nyùy wo wù luŋèr vèsən nèn wìy lò, e dìn mo wù koŋ vèsən, rə́r mendzən fo fo,

⁵e tìn vèsən fó lòn, á lùŋ. A bó wù yòʼ‑oò luŋèr bèy ji vèsən‑eè yii a vinyo ve ví wáa gheén wun. Wù‑uù lùŋèr vèsən cáʼ bìʼ və́ə woo nshámmé. Wù‑uù sù vinyo vesən ve bi ví, e fò Kiyoy kfə́ ke Ranén kí, kí yiì, vèsən kfə́n ji wír ve á siìn afíy, a ker dzəʼə̀m ye fíyi.

⁶Wù‑uù lo fò Kiyoy kfə́ e vèsən nyanyày bìʼ kinyo ke Jesus Kristu‑uù yiìn, e tìn vèsən fó lòn.

⁷A wù‑uù fó bèy ji wun fiʼ bùʼ vèsən, e lì a ji wír vee là jay, aá wáa kiíy ji á wíy nəə́ e vijùŋ ve wù‑uù lèmèn e wír vəə́, a dzə̀ dzəʼə̀m yee là may.

⁸Kinyo ke m suuyin kin ki dzə̀ ke ru kí, a m taʼ ji à kú a ratí ghán sidzə̀m, é wír ve á wayin shilív e Nyùy wùné fíʼ way vitú vév, a yiì a dzə̀ vinyo ve juŋ vi. Á vinyo ve dzə̀ Nyùy wàa kòŋ ji wìr wáa yiì, é wìr dzə̀m kfə́n a yu vijuŋ fo fo.

⁹À yú, a wìr biʼ mbìʼ kiyùŋ, à wàa leʼ leʼén, e làa yòʼ a nəə́ e kinyò kee kùm rám wíri, kìn vinyo vee kùm nsər wìr veé Juda ve wír ámóʼó rə́si ŋeevì, táŋnin fo fo. Vinyo vee shooy vi dzə̀ vé kisaŋ vi, a bó yòʼ dzə̀ ví sə̀ wír gheéy.

¹⁰A wìr lò, a tàʼ ji wun bvəə́r kintatì, à kàntì. Aà kàntì fo akàŋ vee abaà, wù kú a yiì bèy, à shàʼnín wun.

¹¹Kú a kiíy ji shilív shé wìr woo bey shi yòʼ tíy a e kinyò ke ru kí gheéy. Wù kù taʼ a dzə̀ ke bi kí, a kinyo ke wù yii ki din a dzə̀ shilív sə́ she bi shí.

¹²M wíy tum Atemar, kìn Ticikur fo wò wùn. Wù wiy, yén wò, à kù mùm feyì fó wìy, e yen mo é Nikopolir. Dzə̀ fo m sìysìn ji m wíy dzə̀ʼə̀m e ghan sé kintòn.

¹³Ku mùm sa fó sə Senar wo wù yeʼeyin ne nsər se bàràʼ wùn Apolor, aá tav dù ghán yév. Ku yèn ji áwune koóy á kifá ke á kér shií shó kidzə̀m.

¹⁴A dzə̀ wír vee vèsə́n kintatìi kù a kiíy ji á wáa yiì lim ye juŋe, a sə vinyo ve ví dzəə̀n é shií. Lá áwune yòʼ a dzə dzəə́n kisáŋ.

¹⁵Wír ve vèr áwune dzəə̀n fen adzə̀me shaʼtì wò. Kú a shàʼtì sa wír ve vèsən áwune tatin bìʼ kinyo ke Kristùu adzə̀m. M nén a shàʼtì ven jii, Nyùy kú a leéy fo vèn adzə̀m.