Read Lamnso Filemon 1 Bible Online

Filemon 1 - Lamnso bible

Filemon 1

¹Ŋwàʼ və̀ne sàŋ mo woo Por wo m lim sháŋ bìʼ kinyo ke Jesus Kristu. A sàŋ vèr fər wòsən Timoti fo wò woo Filemon. À dzə̀ ŋkar yer féyì, a vèsən tàtí, a lìm kinyo ke Jesus Kristu amòʼón.

²Vèr kfən sàŋ sá fo kintatì ke kí báʼti, bunrì e wò lav ki, bo taaka jemèr yer Afia, e lì Akipur wo vèr áwune tatin, a fùnèn kinyo ke Tàr wòsən Jesus Kristu.

³M nén a lon ji Nyùy Tàr wùn Taàtá wòsən Jesus Kristu kú a kòŋ ven, a leéy fo vèn, a yiì, é melív men mè wáa dzə nyaáŋ.

⁴M lo ji m bunrì fo wò, Filemon, m kù a burí Nyùy búrín ghán sidzə̀m,

⁵a dzə̀ bìʼ fo m yú mo à koŋ Taàtá wòsən Jesus Kristu, wáy shilív é wùn wó, kfə̀n koŋ sa wír ve dzəə̀n vé Nyùy adzə̀m.

⁶M nén a bùnrì, a lon jii, mo à wáy shilív e Jesus Kristu wùn, a vèn à wír Nyùy adzə̀me sì kifá kimòʼón, kí ku yiì, áà maysi, e kìíy vinyo ve juŋ vi ve dzə̀ vèsən wàa yiì bìʼ Jesus Kristu vidzə̀m.

⁷M suuy bèn fər wom, bìʼ fo m lóo kuumé mo à koŋ wír Nyùy e ŋàŋ, yii, a melív mev mè lum ghán sidzə̀m, m wàa ker kishéʼrì ke ghaʼán kí, shém shee shilív shí wàa lùm sa.

⁸Kinyo kímóʼ kí nén a dzə ke m yén ji kí ghèén a ji à yii. A m kér kilíŋ bìʼ kinyo ke Jesus Kristu fó suúy ji à ku yiì a kinyo kee shoon.

⁹Yii bèy, mo m kiìn ji à koŋ wír Nyùy e ŋàŋ, m nén a lon lonén ji à ku yiì a kinyo kee shoon a dzə̀ bìʼ koŋ yé. Áà wáa kiíy ji lón a mo woo Por wo m súŋnin moo ŋgàywìr e Jesus Kristu kinyò, a m kfə̀n lim sháŋ bìʼ wun.

¹⁰A kinyo ke m lón ki dzə̀ bìʼ wán wom woo Onesimur. Mò‑oò kòóy wun ji wán wom e Kristu kinyò, a m sì é sháŋ fen.

¹¹Wù‑uù dzə̀ fó ŋgùʼ ji wan kisaŋ fo wò. Yii bèy, lèn, a sì wán wo juŋ fo wòsò adzə̀m.

¹²M nén a siìr wun lèn fo wò wùn, áà wáa kiíy ji dzə̀ á tím yém féyì feyì.

¹³Mò‑oò koŋ feyì ji bo m lèm wun e mǒ ghaŋ, wù lí á kirə́ʼ ké, a leéy fo mò é sháŋ wo m lim fèn bìʼ sáʼka woo kùm Jesus Kristu.

¹⁴Yii bèy, m nèn yèn ji bó yòʼ dzə̀ m lèm wan wò fèn, a bó à yòʼ kì á fo fo, bìʼ fo m yòʼ taʼ, a kàn wò kánen ji à wáa sə mo. Ke m koŋ ki dzə̀ jii, à wáa sə mo a dzə̀ á mo kwàʼàn wò fo wò kitu.

¹⁵M nén a shù ké Onesimur jii, ghanmóʼ, bo kí‑iì kòóy ji wù nyéŋ wò, e lày fo wò si shishàr bèy a ji wù fíʼ wìy kfən, é vèn wun wáa dzə lèn ŋkuuŋkùŋ.

¹⁶Kèʼ fo lèn, wù yòʼ dzə̀ə́ cáʼ ji kwàn wó. Wù shaà ne kilíŋ kee shooy feyì. Wù sì fər wò lèn wo dzə̀ à wày é shiliv bìʼ kinyo ke Jesus Kristu. Dzə̀ wír fo mò féyì, a wù yíi a dzə fo wò, e shaà bèy. Vèn wun tàtí ne ji wír Kristu, a wù kfə̀n yíi a lìm fo wò.

¹⁷Kí nén a dzə jii, aà fen yèn ji wòsò dzə̀ rú kintatì, à kù səə̀sí wun réŋréŋ mo dzə̀ à səə̀sí mo.

¹⁸A wù fə̀m‑eè jày kinyo e wò, kìn wù‑uù shwìv a dzə̀ kifá ké, à kù siìr vinyo vee shooy e mǒ kitu.

¹⁹M sùúy ne bèn, yén ri kilíŋ ke ŋwàʼ kìn ki. Sàŋ mo e kiwó kém kí jii, mo woo Por, m wíy làʼ kaá yee shooy. Mo m fə̀m suuy bèn, bó yòʼ dzə̀ m rə̀sí, a fìʼ mo yé yee kaá ye dzə̀ à làʼ mo shóo dzəə̀n. À kér dzəʼə̀m ye à kér lèn a dzə̀ bìʼ mo.

²⁰Fər wom, ku yiì kinyo ke m lón kìn ki, bìʼ fo wòsò tatin ji wír Jesus Kristu. Ku yiì rì bìʼ kintatì kee shooy, é shilív shém shí rəsin.

²¹M sáŋ bèn, a m kì féyì ji à yíi yu a kinyo ke m lón kìn, e kfə̀n kìíy ji à yíi yiì, e shaà bèy.

²²Kímóʼ kí kfə́n a dzə sa jii, à ku nàŋsín a kirə́ʼ ke m wíy wìy, e shiíy sho. M wáy vifií ji Nyùy ku wìy yù á tóŋ ye vèn tóŋ bìʼ mo, e siìr mo, é m wiy, e yèn á ven.

²³Epafar wo vèr áwune dzəə̀n é sháŋ fen bìʼ kinyo ke Jesus Kristu shaʼtì wò.

²⁴Maak wùn à Aritakur, à Demar, à Luk ve vèr áwune tatin, a lìm kinyo ke Jesus Kristùu shaʼtì sa wò.

²⁵M nén a shàʼtì sa, a lon ji Taàtá wòsən Jesus Kristu kú a kòŋ ven, a leéy a fo vèn, a dzə vèn áwune.