Read Lamnso Hibru 12 Bible Online

Hibru 12 - Lamnso bible

Hibru 12

¹Mo vèsən sí yén wír nyanyày e vèsə́n ghaŋ mbìv sidzə̀m, a dzə̀ ve á din mo dzə̀ wìr wày shilív e Nyùy wùn, vèsən ku nèn a yiì moo áwune, e màʼtì vinyo ve dzə̀ ví jàvsìn vèsən à Nyùy vidzə̀m. Vèsən maʼay vinyo ve bi ve ví rə́ʼəy vèsən, e wày ŋàŋ, a leʼ a dzə̀ kileʼ ke vèsən sí léʼé,

²a leéy a dzə̀ fó mbìy fo vèsən du, e jòʼsì, a dzə̀ e Jesus wùn. Dzə̀ wun wo wù yiìn, vèsən wáa way shilív e Nyùy wùn, a kù wíy lì wun vèsən, e way e Nyùy kiwo ŋkuuŋkùŋ. Wù‑uù dzə̀ é nsay fèn, e biìmé ji wun ku yiì mo Nyùy sìysìn, e kpù é kintam moo ŋgaà jay, e làa yòʼ a ci woómé se sí dzəə̀n é kfəə kpu foo fèy. Wù‑uù leey kfə́ a dzə̀ vijuŋ ve ví dzəə̀n fó mbìy. Wù nén a dzə lèn e yuv, a dzə e Nyùy ghaa kàvàʼ, e koy yìyí.

³Vèn kuúmé mo wun woo Jesus‑eè dzəə̀n là jay, e kù yòʼ biìmé, vé jayi wáa nyàvrì e wun. Vèn lóo kuumé wun, é la melív men mè yòʼ dzə́ə a weèy, é vèn wáa dor fo Nyùy kinyò.

⁴Ŋgeʼ si lóo koóy ven, vèn wàa kiíy jii, mo vèn fə̀m tuutì ji vèn kú a tiy vèn à Nyùy, e làa yòʼ a way kiwó e kinyò ke bi kí, bó kí yóʼ ne mèé e kiliŋ ke dzə̀ á yùyrí wír yúyrín bìʼ kinyo kee shooy.

⁵ Vèn kuúmé sá ntir ye Ŋwàʼ Nyùyi tír ven shó, yoŋ ven ji wón Nyùy, suuy jii: «Wan wòm, Nyùy Tàr lóo sə̀r wò fo kinyò, à yuùrí. Wù lóo saʼ wò, lá à yòʼ a weèy.

⁶Wù kù yii sər a dzə̀ wír wo wù koŋè, wívti a dzə̀ wír wo wù yén ji wán və.»

⁷Vèn ku nèn biìmé ŋgeʼ sidzə̀m, a kiíy ji Nyùy sər ven shó sə́rin moo wón və́. Bó wàn yòʼ dzə̀ shó wo bó kitàr kí yòʼ yii sáʼá.

⁸Vèn wáa kiíy jii, a Nyùy dzə̀ là fó a sə̀r ven, mo wù yii sər wón və́ adzə̀m, bo kí din ji vèn yòʼ dzə̀ á wón və́ gheéy, bo vèn dzə̀ atáfójiy.

⁹Vèsən kér sa atàr vesən é nsay, aá kù sər vèsən, a vèsən yuúri, ghvə́m áwune. Mo vèsən yú bèy, bo dzə̀ vèsən yù Tàr wòsən wo dzəə̀n Nyùy, e shaà, e fíʼ wìy lùŋ.

¹⁰Atàr vesəné kù‑uù sər vèsən fo shintàm she vèsən‑eè dzəə̀n atérí, a vé‑eè sər a dzə̀ mo áwune kwaʼà. Nyùy nén a sə̀r kfə́ vèsən, a wù kì féyì mo dzə̀ wù sə̀r, é vèsən fíʼ a dzə moo wun, a dzə wír və́ ve ruú.

¹¹Dzə̀ rú, á lóo màʼ ŋgeʼ e wìr ji á fíʼ sə̀r wun, wù wàa yu a dzə̀ nyár e ghan see shooy, e làa yòʼ a sheʼrí gheéy. Yii bèy, lóo yìi dzə fo bàm, wìr wo á sə̀rìn ne, wù sə́ʼə́m, nèn a yiì vinyo a dzə̀ ve juŋ vi, a ker dzəʼə̀m yee nyaáŋ.

¹²Ven ve ŋgeʼ si lóo koóy, wó yéné nèn weèy, vèn ghár Nyùy lèn kitávín, a tiy a dzə̀ vèn áwune.

¹³Vèn wáa ghan lèn a dzə̀ é dzəə see tìítiy, é wìr wo wù teesì bìʼ fo wù‑uù ghán e kighìn, bónén lèn bónmén, e làa yòʼ màysì, e kivkír.

¹⁴Vèn wáa mùm kitávín ji vèn à wíri wáa dzə dzə́ ye juŋe ji nyaáŋ, e kfə̀n a mùm feyì ji vèn wáa ker a dzəʼə̀m ye yí wáa dzə e juŋ, là nsem, a kiíy jii, a wìr bùŋ dzəʼə̀m yee bey, bo bó yòʼ dzə̀ á wù wìy yèn Nyùy.

¹⁵Vèn wáa yen fo wìr maʼay Nyùy, e ràn kilíŋ ke wù bùʼùn wun sho, a yen sa fo wìr wáa màʼ ŋgoòy kinyò ke bi kí, é kí ram e věn mvəm, e bìvír wír anín.

¹⁶Vèn kfə́n a yen sa fo wìr wáa ker liì kisaŋ, a jàŋ kinjàŋ, a ghan viŋkar. Lá wìr yòʼ kfə̀n a lì kinyo ke Nyùy fo tèr moo Esav wo wù‑uù fiìnèn kilíŋ ke Nyùy‑iì foon e wun ji wán woo ŋgàywìr bìʼ kimbéʼ ke kiban keé ghan see shó.

¹⁷A vèn kì sá ji wù‑uù sìíy, e kfə̀n a tàʼ kilíŋ kee shooy, a lon ji tàr wov ku tìr kpú e wun, tàr wov sháʼnín. A bó dzəə̀ yòʼ‑oò dzə̀ə́ ye dzə̀ wù bìnèr shilív shé tàr wov shó, a wù fə̀m‑eè tóŋ, sə́ʼə́r mensíy e le.

¹⁸Vèn kuúmé kirə́ʼ ke vèn tíy sho lèn, e Nyùy si. Vèn yòʼ tíy e kirə̀ʼ, a dzə̀ keé nsay fèn mo wír veé Israyi‑iì tíy e sar Gwan Sinay, a və́yí baári fo kitu ke gwan ji vùŋ vùŋ, ndzə sə́n, virə́ʼ ví wáa kìʼ ji cùm, a kinsəm ki shaa ji kìkìkì.

¹⁹Aá yú mo sóŋé súŋninè, a jì wun woo Nyùy súŋnin sa. Wún wóví beémé, á wáa lon ji lá wù yòʼ waà dzəə sùŋnín a aáwune.

²⁰ A vé‑eè fan bèy, bìʼ fo Nyùy kì suuyin kinyo, kí beémé wún wóv. Wù‑uù sùúy jii, «A kifá ki mùm, e làʼ kiwuú é gwan, a fə̀m dzə̀ nyám, á kù tsə̀mrí e tíyí, e yùyrí.»

²¹ Vinyo ve áwune‑eè yenen fó vi‑iì beèmé é ŋàŋ, Mooser kitú kfə́ wáa suúy jii, wun fàn feyì, wúné ló, a yàʼ wun a yáʼan.

²²Vèn nén a dzə kén, aá wíy, a tiy a dzə̀ é Gwan *Sion, a dzə̀ láʼ wun woo Nyùy wo wù gòʼòn kàŋ mòʼón, kfə́n a dzə Jerusalem wo wù dzəə̀n a dzə̀ é yuv. A dzə̀ fó, fo nshèelav se Nyùy si yii dzə́ ansə̀kì ansə̀kì, kwá Nyùy.

²³Vèn tíy kén a dzə̀ é mvə̀m kintatì ke wìr ve Nyùy‑iì shoʼon ji wón və́ mbìyi, e sàŋ yír sév e wùn ŋwàʼ woó yuv. Vèn wìy ne lèn, a tiy e wun woo Nyùy wo wù tínen nsaʼ se wìr dzə̀m si, a wù tátí ne vèn à viyoy ve wìr ve vé‑eè wìyìn ne fo mbìyi, ve wù‑uù naŋsin ne ji wír və́ ŋkuuŋkùŋ.

²⁴Vèn áwune wìy ne, e yèn Jesus wo wù‑uù tiimen e Nyùy wùn à wírí nsàn, bo wù gwar *mensaŋ me fíy mè wùn à wíri. Vèn nén a tiy a dzə̀ e wun woo Jesus kitu ke mensə me mè‑eè tinen ven tínén fó lòn, e làa yòʼ way ven é lòn wáyín mo me Abel mè‑eè wayin Keen.

²⁵Vèn wáa yen rì fó ŋway kinyo ke Nyùy wo wù súŋnin e vèn ŋwáyín. Vèn kì sá ji wù‑uù lo màʼ ŋgeʼ e wír ve vé‑eè ŋwáy kinyo ke ŋgaà wo wù‑uù lèmèn é nsay fèn ji wù wáa tir wíri. Mo kí dzəə̀n ben, bo bó wìr wo wù ŋwáy kfə́ a dzə̀ kinyo ke wun woo Nyùy súŋnin fo yuv yòʼ wíy bòy fo ŋgeʼ gheéy.

²⁶ Wù‑uù lo sùŋnín fo mbìy, nsay sə̀ʼ. Lèn və̀n, a wù káʼ ne jii, «Wun kfə̀n wíy sə̀ʼsì kitú ke nsay, a bó yòʼ jòʼsì nsay cáʼ, wun wíy sə̀ʼsì saa yúv.»

²⁷Mo wù suuy ji wun kù kfə̀n dzəə́ wìy sə̀ʼsì ndzə, bo kí din ji wù wíy shàʼàr vifá ve wù‑uù bomen vin vidzə̀m, é bér ve ví‑iì siìn, ve bó yòʼ dzə̀ ví sə̀ʼ.

²⁸Mo sáʼ Nyùy ye vèsən wíy nəə́ shoo dzəə̀n, a bó yòʼ dzə̀ yí sə̀ʼ, vèsən ku nèn a beèrì wun bìʼ kee shooy, a ghvəm wun, a yu a dzə̀ fó fo, a kiíy ji dzə̀ vèsən wàa fàn a wun,

²⁹bìʼ fo wù dzəə̀n rú moo və́y wo dzə̀ wú laàr kirə́ʼ láarin.