Read Lamnso Hibru 13 Bible Online

Hibru 13 - Lamnso bible

Hibru 13

¹Vèn ku nèn a yiì moo wír wun woo Nyùy, é wìr wáa kòŋ wùmòʼ mo wìr yii koŋ fə́r və.

²Lá vèn yòʼ a làysìn fó a səəsí viŋgwìy e věn melav. Vèn wáa kiíy ji wír ámóʼó‑oò yiì ne bèy, e səə̀sí a dzə̀ nshèelav se Nyùy, a bó á yòʼ kì kì.

³Vèn kú a kuumé wír ve á túŋ sháŋé, a kuumé wír ve á nyavrì sho adzə̀me, é kí wáa dzə mo yén vèn áwune ŋgeʼ see shooy wír adzə̀m.

⁴Kee kùm dzəʼə̀m yeé lav, kí nén a dzə jii, wìr dzə̀m kú a ghvəm nsər see kùm wiíy wùn lum, é la wiíy kìn lúm yòʼ fəə̀, e dù, a tàʼ wír wo sən. Vèn wáa kiíy ji Nyùy wíy màʼ ŋgeʼ e wír ve á yii vinyo ve kisaŋ vi, bívir nsaàlav sho.

⁵ Wìr dzə̀m wáa sheʼrí a dzə̀ kifá ke wù kérí, e màʼtì shií woo kùm mbàm. Nyùy‑iì sùúy jii, «M yòʼ wíy màʼtì wò, a bó m yòʼ wíy màʼày wò e ghan símóʼ sí gheéy.»

⁶ Bo dzə̀ vèsən wàa suúy lèn feyì mo wìr wùmòʼ‑oò suuyin jii: «Leey Nyùy fo mò, a bó yòʼ dzə̀ m wàa fàn kifá. A dzə̀ wìr yiì ka e mò?»

⁷Vèn wáa kuumé wír ve vé‑eè tòmbìy dàn ven é kinyò ke Nyùy fèn. Vèn kuúmé mo vé‑eè dzə́, yú a dzə̀ fo Nyùy, wíri yú vijuŋ bìʼ áwune. Vèn kú a bìʼnìn, a yu fo Kristu moo áwune.

⁸Jesus Kristu və̀n yòʼ yii kúvsinè. Mo wù‑uu dzəə̀n é yooné, kù dzə̀ mo wù dzəə̀n lán, a kù dzə̀ mo wù wíy a dzə bèy, e dù, e mày.

⁹Vèn wáa yen fo wíri taa vinyo vímóʼ ví, a boʼtí ven shó, é vèn maʼti dzə́ə yee rú. Vèn wáa kiíy ji dzə̀ wìr kù lòn a dzə̀ fo Nyùy, é bo shilív sə́ shí wáa tiy e Nyùy wùn kitávín. A bó yòʼ dzə̀ shí wàa tiy ji bìʼ fo wù yí vifá ve yi, nyaʼ vímóʼ ví ji bìʼ Nyùy. Nsər see ben si yòʼ fə̀m sə́ wír ve á lemè gheéy.

¹⁰Vèn wáa kiíy jii, wír ve á tíy kév é ntàŋrí wo á yii e wír veé Judàá lav cùu yòʼ dzə̀ á wàa ker kilíŋ e mvə̀m ntàŋrí wo Jesus‑eè yiìn fo vèsən, mo áwune lo, á wàa tatí, a yi vév vee vifá ve ntàŋrí.

¹¹Ntàŋrí wo Jesus‑eè yiìn shwínin wo taà cù wo kuʼùn lo, wù wàa yiì e lav cù bìʼ ajay wíri. Wù yii li kfə́ a dzə̀ mensə́ me nyàm, wù nə̀ə́ shó fo mvəm, é kirə̀ʼ kee jeéy kí féyì, e dìn e Nyùy. Á nèn lì nyám yee shooy, e fəə̀sín ntèʼ shó, e tòn, yì shwì, e rèŋ, la wìr yòʼ kfə̀r.

¹²Jesus ku nèn kpù é bǎm laʼ yeé Jerusalem fó dìn ji wun yiì ntàŋrí a dzə̀ á wo kuʼùn. Wù‑uù bèʼèy ajay wíri, mensə́ mvə mè leém ji á fíʼ a dzə a wír Nyùy.

¹³Vèsən ku nèn fəə̀sín sa fo ntèʼ ye dzəə̀n vinyo veé nsay fèn, e dù, e tàtí vèsən à Jesus, e yùtí sa mo vé‑eè shoor wun.

¹⁴A dzə̀ vèsən kù dù bèy, bìʼ fo vèsən kiìn ji bó á yòʼ kér a láʼ yímóʼó é nsay fèn ye yí jòʼsìn ŋkuuŋkùŋ. Vèsən sí leey a dzə̀ láʼ yesən yeé yuv ye yí wíy wìy.

¹⁵Vèsən ku nèn a tiy e Jesus wùn ghán sidzə̀m, a burí Nyùy, é wáa dzə cu ye wír ve á yoŋ yír rəə́ cu wun sho.

¹⁶Lá vèn yòʼ a làysìn sa fó a yiì vinyo ve juŋ vi, a jàv vifá vén, a sə wír ámóʼó shó. Vèn wáa kuumé jii, vèn lóo yiì bèy, bo dzə̀ á cu ye Nyùy koŋè.

¹⁷Vèn wáa yu vilìmbìy vén ví, a yiì mo áwune suuyì. Lèm Nyùy áwune, á wáa shìy melív men fo wìr jáy dzə́ə, a kù kíyri Nyùy lim yév. Vèn kú a yiì, aáwune wáa yiì lim yév, a wàrkìr. Aá lim, rəm ntéŋ, bo bó yòʼ dzə̀ kí sə̀ ven gheéy.

¹⁸Kér kí dzə̀, a bó melív mer mè yòʼ sáʼ ver fo věr lìm gheéy. A dzə̀ mo vèr taʼ ji kí ku wìy a dzə bèy, a vèr fə̀m yii a dzə̀ ka. Vèn ku nèn a bùnrì ji Nyùy wáa sə ver.

¹⁹A m kfə̀n lón feyì ji vèn wáa bùnrì bèy, é Nyùy sə́, é m tav kfə̀n, e yèn ven.

²⁰Nyùy wo wù yii, a melív mèsən mè dzə́ nyaáŋ kú a leéy fo vèn. Dzə̀ wun wo wù‑uù fəərin Taàtá wòsən Jesus fo kpu, wù wáa dzə lèn ji Nshìy Njiì wo Kuʼùn, a leéy fo wír Nyùyi adzə̀m. Yì‑iì cùtì wun mensə́ mvə, e bóo way wíri e Nyùy mvə̀m *mensàŋ me bó yòʼ dzə̀ mè wìy mày.

²¹Nyùy ku fò ven vifá ve juŋ vi vidzə̀m, é vèn wáa yiì vinyo və́ shó. Wù ku yiì, é Jesus Kristu wáa sə ven, é vèn wáa yiì a dzə̀ vinyo ve ví boŋ wun woo Nyùy. Á kú a burí Kristu ghán sidzə̀m, là may. Amen.

²²Afə̀r vem, m nén kfə̀n a lon jii, vèn ku yuùrí a vinyo ve m saŋen, a tir ven shó vìn ji nyaáŋ. Ví yoʼ dàr dàrìn é ŋàŋ gheéy.

²³A m kfə̀n taʼ, e yiì, é vèn kiíy ji fər wòsən Timoti fəə̀ ne a fo sháŋ. A wù ben tàv wìy, e yèn mo, bo wiy vèr wun, e yen ven.

²⁴Vèn shaʼti vilìmbìy vén ví vidzə̀m, e fò e mò, e kfə̀n shàʼtì wír ve dzəə̀n vé Nyùy adzə̀m. Afə́r vesən ve á wìyìn fó wòŋ Itali, e yèn mo féne shaʼtì ven.

²⁵M nén a màysì, a lon jii, Nyùy kú a kòŋ ven, a leéy a fo vèn adzə̀m. Amen.