Read Lamnso Hibru 4 Bible Online

Hibru 4 - Lamnso bible

Hibru 4

¹Kinyo ke Nyùy‑iì kàʼàn ji dzə̀ wìr nə̀ə́ e wùn kirə̀ʼ ké meèmè ki kù tíy fo. Mo vèsən kiìn bey, vèsən ku nèn a yen fo kí wìy kòóy ji á lòo tàr, e yèn á ji wìr fo vèsən yoʼ ghèén, é wù rán vijuŋ vee shooy.

²Vèsən yù ne sáʼka wo juŋ woo shooy réŋréŋ mo vé mbìy vìyi‑iì yuun. Yii bèy, a vé‑eè yú kév, la kí yòʼ a sə áwune, bìʼ fo vé‑eè yú, e làa yòʼ a way shilív shó.

³ Ku nèn a dzə vèsən vin ve á nəə e Nyùy mvə̀m vijùŋ foo fèy, bìʼ fo vèsən yuun késən, e wày shilív shó. A dzə̀ kíwun ke Nyùy‑iì suuyin e vé mbìyi jii: «Wún wómé‑eè lò, e kìn, m lìʼ jii, ‹Bó yòʼ dzə̀ féyì áwune wìy nə̀ə́ e mǒ kirə̀ʼ ké meèmè.› » Wù‑uù suuy bèy, a bó yòʼ dzə̀ ji meemè yee shooyi yòʼ‑oò waà sì. Yí‑iì sì, e kèʼ fo ghan se wù‑uù bomen ndzə, e màysì.

⁴ Yí kù‑uù sì, bìʼ fo vé‑eè lo yòŋ kishiíy kee saàmbà e kirə̀ʼ ké ŋwàʼ kímóʼ kí, e sùúy fo ji, «Lòo dzə e kishiíy kee saàmbà, Nyùy meèmè fo wun lìm e dzə̀m.»

⁵A kù dzə̀ meemè yee shoon ye Nyùy‑iì yòŋèn é ghan se wù‑uù suuyin jii, «Bó yòʼ dzə̀ féyì áwune nə̀ə́ e mǒ kirə̀ʼ ké meèmè.»

⁶Yii bèy, a kí dzə̀ kiránén ji wír ámóʼó kù yòʼ wíy nəə́ sho. A bó wír ve vé‑eè tòmbìy yù sáʼka wo juŋ və̀ne yòʼ‑oò lo nə̀ə́, bìʼ fo vé‑eè yú, ŋwáy ŋwayín.

⁷ Mo á tenen, Nyùy nèn kfə̀n sìysì símóʼ see ghán se dzə̀ á nə̀ə́. A dzə̀ síwun se wù yoŋ ji kishiíy ké lán ki, e yiì, Fòn Davir wìy sìíy, a toʼ ghán sin, a ntàm dár ne feyì mo vé mbìyi‑iì tenen. Dzə̀ kíwun ke vèsən kì yuun ne jii: «A vèn yù, a Nyùy yoŋ ven lán, lá vèn yòʼ a ŋway ŋwayín.»

⁸A bo kirə́ʼ ké meèmè ke Nyùy yoŋ kìn ki yòʼ dzə̀ ke Joshua‑aà liìn wíri, e nə̀ə́ sho e wòŋ wo Nyùy‑iì foon aáwune. A vé‑eè nə̀ə́ é ghan see shooy, bo bó Nyùy yòʼ‑oò lo kfə̀n a kàʼ fo bàm ji kishiíy kímóʼ kí wíy a dzə, aá nəə́ é kirə̀ʼ ké meèmè foo fèy.

⁹Kí nén a dzə jii, kilíŋ ki dzə̀ə́ sho lèn ke dzə̀ wír Nyùyi nə̀ə́ é kirə̀ʼ ké vijùŋ fèn, a meèmè sa mo Nyùy‑iì màysìn lim rə́, kishiíy kí meé saàmbà, wù meèmè.

¹⁰A kí dzə̀ jii, wìr nəə e Nyùy kirə̀ʼ fóo fèy, wù nèn meèmè fo wùn lìm e dzə̀m, mo Nyùy‑iì meèmèn fo rəə́.

¹¹Vèsən ku nèn wày kitávín ji á ku wìy nə̀ə́ e kirə̀ʼ ké meèmè fèn, a yen fo wìr ŋwáy kinyo ke Nyùy, e ràn meemè yee shooy mo vé mbìyi‑iì yiìn, e bóo ran.

¹²Vèn wáa kiíy jii, jí se Nyùy si dzə̀ sigháʼtín, a dzə̀ sí yiì kinyo. Sí lim e wìr shiliv, lim e vifii, njím shaa shwàʼ wo á baàyìn mbìv sidzə̀m. Sí sáyri kwaʼtì wìr e dzə̀m, kìn dzə̀ ye yí tíy e shiliv, kìn ye wù kwaʼtì a dzə̀ fó vifii, kwaŋrì réŋréŋ mo shwàʼ ghàn é nsàn se vighvər.

¹³A bó kifá kímóʼ kí yòʼ dzə̀ shó e ndzə ye Nyùy bomen rə̀n e dzə̀m ke dzə̀ kí lìtì kinyo fo wun gheéy. Wù yén vinyo vév vidzə̀m, a ví néŋ tèéter, kiránén, a vèsən kù kér fó bìnèr a dzə̀ shó.

¹⁴Vèsən wáa kuumé ji vèsən kér taà cù wo kuʼùn wo wù táti vèsən à Nyùy, a dzə̀ Jesus woo Wan Nyùy wo wù‑uù duùn, e mèé e ntoò yùv fo Nyùy dzəə̀n. Vèsən ku nèn ghàr kinyo kfə́ ke vèsən biimen kitávín,

¹⁵a kiíy jii, taà cù wòsən wo kuʼùn və̀n dzə̀ réŋréŋ moo vèsən. A dzə̀ wù kìíy kinyo ke kí gháʼ vèsən kidzə̀m, bìʼ fo wù‑uù dzə́ e nsay fèn, a vinyo vi mum wun réŋréŋ mo ví mum vèsən, a bó wù yòʼ‑oò yiì jày kímóʼ kí gheéy.

¹⁶Mo wù siìn wùn Nyùy bìʼ vèsən, a dzə̀ vèsən wàa wàrkìr lèn, a koʼtí e Nyùy si fo wù dzə́ e wùn kàvàʼ, kóyti vèsən. Vèsən kóʼti bèy, é wù wáa sham vèsən. Kinyo ki lóo ghaʼ vèsən, é wù ku nèn a sə vèsən.