Read Lamnso Hibru 5 Bible Online

Hibru 5 - Lamnso bible

Hibru 5

¹Vèn kì jii, á yii shóʼ wír ji taà cù wo kuʼùn, bo á lèm ji wù wáa lìm fo wíri, a tatí Nyùy wùn à wíri. Wù nèn a cù Nyùy, a kwàŋrì antàŋrí, bìʼ vinyo ve wíri jáyí.

²Mo kù dzəə̀n wír fo wìr, a vinyo vi gháʼ sa wun, wù nen kìíy mo wíri lóo yuŋsí, lóo jay vinyo, wù wàa ker áwune ji weè,

³a kwàŋrì antàŋrí vee shooy. A bó yòʼ dzə̀ ji vé wìr vee shooy cáʼcáʼ, wù kwaŋrì sa və́, bìʼ fo wù kù dzəə̀n sá ŋgaà jay.

⁴A bó yòʼ yii shóʼ wír kitú kfə́ ji taà cù wo kuʼùn. Kù yii li Nyùy wír, e bó a lèm mo wù‑uù lèmèn Aaron.

⁵ A dzə̀ réŋréŋ sá mo bó Kristu yòʼ‑oò lo shòʼ kitú kfə́ ji wun wáa ker ntaʼ, a dzə ji taà cù wo kuʼùn. Yì‑iì lèm Nyùy wun mo wù‑uù suuyin kùm wun woo Kristu jii: «À dzə̀ Wán wom, a m sì Tàr won lán.»

⁶ Wù kfən sùúy fomóʼó jii: «À kù wíy a dzə taà cù, e dù, e mày, a dzə moo taà cù woo *Melkisedek.»

⁷Wáa dzə e ghan se Jesus‑eè dzəə̀n é nsay fèn, wù lò, a lon sa bìʼ kitú kfə́. A wù‑uù lón a dzə̀ fo Nyùy wo dzə̀ wù sə̀ wun fo kpu, tóŋ kitávín, sə́ʼər mensíy. Mo wù kù‑uù yú kfə́ a dzə̀ fo Nyùy, Nyùy nèn yù tóŋ rə́.

⁸Yii bèy, mo wù fə̀m‑eè dzəə̀n Wan wun woo Nyùy, wù ku yòʼ yèn ŋgeʼ, e fíʼ yu Nyùy, e yiì vinyo vidzə̀m ve wù taʼà.

⁹Wù màysì, e nèn ghèén e wìr wo dzə̀ wù lùŋèr wír ve á yú kinyo kfə́, a wù kù wíy a lùŋèr bèy ghán sidzə̀m, e dù, e mày,

¹⁰bìʼ fo Nyùy‑iì lèmèn wun ji taà cù wo kuʼùn wo wù wáa lìm moo taà cù woo Melkisedek.

¹¹Vinyo vi dzə̀ shó vinín ve kì dzə̀ vèr wàa fèr kùm Jesus woo taà cù wo kuʼùn və̀n. Yii bèy, a kí gháʼ fó naàrì feyì, é vèn yú, bìʼ fo vèn loòn ne, e mèŋ vinyo.

¹²A kì dzə̀ réŋ, bo kì yéʼey ven wíri lèn. Vèn kfən lò, a tàʼ ji wáa yeʼéy wír ven. Vèn kù dzəə́ méŋ vinyo ve Nyùy, a dzə̀ vee shooy ve dzə̀ wìr kù yèʼéy fo mbìy. Vèn kù dzə̀ə́ moo wón ve bóri ve á nyóŋ a dzə̀ vín, a bó á yòʼ sí yí kifá.

¹³A bó yòʼ dzə̀ wír wo wù dzə̀ə́ e Nyùy kinyò moo wán wo bór, wo wù nyóŋ a dzə̀ vín, wù kìíy móo saáy vinyo, e fəə́r ke dzəə̀n ke ru kí, e màʼày ké kisaŋ ki.

¹⁴Vifá ve yi vìn vi kù dzə̀ kifá ke wìr ve á kuykin ne, e tùúy e Nyùy kinyò, bìʼ fo wìr woo bey mèrìrìn ne, e kìíy móo tàr kinyo, e yen ké ru kí, e yen ke bi kí.