Read Lamnso Hibru 7 Bible Online

Hibru 7 - Lamnso bible

Hibru 7

¹Melkisedek və̀n‑eè dzə̀ Fon woó kirə̀ʼ kímóʼ kí ke á yoŋ ji Salem, e kfə̀n a dzə taà cù wo wù‑uù lim fo Nyùy woo Taà Vitu. Wáa dzə e ghan se Abraham‑eè duùn rə́r, e yùyrí afon ámóʼó, a kfən e bàm, Melkisedek wìy, wùn wun tárnín, wù səə̀vì Abraham.

²Wù səə̀vì bèy, Abraham nèn jàv vifá ve wù kì kuuyin fó shùu rər viy kirə́ʼ e ghvə̀m, e fò kee kimòʼón ki shó, a yír sé taà cù və̀n si din vinyo vibaà. Ké mbìy ki dzə̀ jii, wù dzə̀ fon yiì ye réŋé mo nsàv yìr rə́ yee Melkisedek‑iì dzəə̀n. Vee vibaà jii, wù kfə̀n dzə̀ sáa fon nyaáŋ, bìʼ fo wù dzəə̀n Fon woó Salem, a nsàv Salem dzə̀ ji nyaáŋ.

³Bó wìr yòʼ kì fo Melkisedek və̀n‑eè loòn, a bó á yòʼ kì tàr wov wùn yè wov, a bó á yòʼ kì rám yév. Bó á yòʼ kì sá ghán se vé‑eè dzəən wun, a bó á yò kì se wù‑uù kpuun. Wù nén a dzə moo Wan Nyùy, a dzə̀ taà cù wo wù gòʼòn kàŋ mòʼón, e dù, e mày.

⁴Vèn yén ri kilíŋ ke Melkisedek və̀n kér ki. Abraham dzə̀ tàr à ràm yeé Isray, a wù‑uù lo fò kitó ké taà cù e Melkisedek, bìʼ fo wù‑uù jàvìn vifá ve wù‑uù kuuyin fó shùu rər kirə́ʼ e ghvə̀m, e fò mbìv yee mòʼón e Melkisedek.

⁵A *Nsər Mooser‑iì lo sìíy fo bàm, a suúy jii, atàá cù ve dzəə̀n rám Levìi wáa ker kitó fo afə́r vév ve dzəə̀n sá rám Abraham moo áwune.

⁶Ké Melkisedek ki nèn shaà ké atàá cù vee rám Levi vìn. Wù yòʼ‑oò dzə̀ rám Abraham, a wù‑uù ló a ker kitó fo Abraham, e kfə̀n a taŋ mo Nyùy wíy bùʼ Abraham və̀n wo Nyùy‑iì sí fó aŋkàʼmé sho anín.

⁷A wìr dzə̀m kì là méŋnín ji wìr wo wù súŋnin e wìr kitu, táŋ vinyo və́, kùʼ, e shaà ŋgaàŋ.

⁸Kímóʼ kí nen kfə̀n a dzə jii, atàá cù vee rám Levìi‑iì kér kitó ké atàá cù, aáwune dzə̀ wír, aá wíy kpukír, Melkisedek wáa ker kfə́ moo wír wo wù shaàrìn.

⁹A dzə̀ á wàa suúy jii, mo Abraham‑eè foon kitó ké atàá cù e Melkisedek, bo Levi‑iì lo fò sá, wun woo Levi wo wón vəə́ dzəə̀n atàá cù lèn, sə́ vitó vé atàá cù.

¹⁰A dzə̀ á wàa suúy bèy, bìʼ fo Levi dzəə̀n mensə́ me Abraham. Mo Melkisedek‑iì wìyìn, e yèn Abraham, wù fó kitó shó, a wun woo Levi dzə̀ə́ e Abraham bvə̀m, bo wù‑uù lo fò sá.

¹¹Vèsən kì jii, Nyùy‑iì lóo fo ntò se cù e wír veé Israyi, e wày a dzə̀ e rám Levìí kiwo ve kù yii dzə́ atàá cù vév. A bó cu yéví yòʼ‑oò dzə̀ ye dzə̀ yí màyìr vinyo ve wìr wùn Nyùy ŋkuuŋkùŋ. A yí‑iì mayìrì, bo bó shií yòʼ‑oò ló a dzə wo Nyùy kfən lèm taà cù wo sən wo wù‑uù wíy fəə, a yiì vinyo və́ moo Melkisedek, e làa yòʼ a yiì moo atàá cù vee rám Levi.

¹²A kù dzə̀ mo kí yii dzə́. Á kúvsin lav taà cù, fó e kfəə ye səné, bo ntò se vinyò si kér fó kuvsín sa.

¹³A wìr dzə̀m kì ji Tàr wòsən Jesus wo dzəə̀n taà cù wo á yoŋ fèn yòʼ‑oò lo fəə̀ fó rám Levi. Wù‑uù lò kfə́ a dzə̀ fó rám Juda ye Nsər Mooser yòʼ‑oò lo koò ji wáa dzə atàá cù.

¹⁵Dzəə̀ ye taà cù wo fíy və̀n‑eè fəən shó nen kfə̀n màysì, e dìn feyì ji vinyo vi kùvsín a ne. Wù‑uù fəə̀ kfə́ moo *Melkisedek.

¹⁶Wù yòʼ‑oò dzə̀ taà cù bèy ji vé‑eè dzə̀ə́ wun e kfəə ye nsər suuy ji wáa dzə yé atàá cù. Wù‑uù dzə̀ kfə́ taà cù a dzə̀ bìʼ kinyo ke kí dzəə̀n e wùn dzə̀ʼə̀m, bìʼ fo dzəʼə̀m rəə́ dzəə̀n, a bó yòʼ dzə̀ yí mày.

¹⁷ A vé‑eè lo sàŋ é Ŋwàʼ Nyùy bèy, e yòŋ wun jii: «À kù wíy a dzə taà cù, e dù, e mày, a dzə moo taà cù woo Melkisedek.»

¹⁸Kí nén a dzə jii, Nyùy tsə̀ʼ ne dzə́ə ye mvə ye wù‑uù foon ji á wáa cù wun sho, bìʼ fo yee shooy yee dzə́ə yòʼ‑oò ló a ker vitaáví, a bó yòʼ‑oò dzə̀ wìr lùŋ fó fo.

¹⁹Ntò se cù se Mooser‑iì wìyìn shó si yòʼ dzə̀ sí yiì, wìr ràn fo Nyùy. Yii bèy, a Nyùy fò ne vèsən dzə́ə ye fíy lèn ye vèsən wáa tiír vifií shó, a yì bòŋ feyì, e shaà ye mvə, bìʼ fo vèsən sí shaa sho, kóʼti e Nyùy si.

²⁰Yì kfən bòŋ, e shaà, bìʼ fo Nyùy‑iì lóo lèm taà cù woó dzəə ye fíy rə̀n, e tàvír e kilìʼ kí, a bó á yòʼ‑oò yiì ne lòo lèm taà cù wùmòʼ, e yiì kilìʼ.

²¹Yii bèy, Nyùy lòo lèm Jesus, e lìʼ mo wù‑uù suuyin shó jii: «Mo woo Taà Vitu lìʼ jii, ‹À kù wíy a dzə taà cù, e dù, e jòʼsì.› M lìʼ ne bèn, a bó yòʼ dzə̀ m kfə̀n kùvsín jí yem.»

²²Mo Nyùy lìʼìn bey, Jesus nèn a dzə kisəə́y ke kí kúr *mensaŋ me mè gheenen, e shaà mee fó mbìy.

²³Yì‑iì dzə̀ fó mbìy, aá dzəə́ cu Nyùy e dzəə ye mvə, atàá cùu kù‑uù kér fó a dzə anín, bìʼ fo áwune dzəə̀n wír ve dzə̀ á kù kpù, a bó yòʼ dzə̀ wìr lìm, e dù, e jòʼsì.

²⁴Jesus wáa dzə kfə́, a bó yòʼ dzə̀ wù kpù, e nèn a dzə taà cù ghán sidzə̀m, e dù, e jòʼsì.

²⁵Wù nèn a dzə mo dzə̀ wù lùŋèr wír ve á bee wun, e bó a koʼtí e Nyùy si. A wù luŋèr áwune ŋkuuŋkùŋ, bìʼ fo wù dzəə̀n shó ghán sidzə̀m, tíy e Nyùy si, lón bìʼ áwune.

²⁶Wù nen ghèén feyì e taà cù wo kuʼùn wo dzə̀ vèsən wàa ker, e bóo fíʼ lùŋ. Wù kù dzə̀ kfə́ ji wir Nyùy cáʼ, a bó wù yòʼ kér njò yìmòʼ gheéy, a bó shilóm shi yòʼ dzə̀ é wùn wó gheéy shishàr, e bó a dor. Wù tíy kfə́ jeéy fo wíri adzə̀m, bìʼ fo áwune dzəə̀n aŋgàa jay. Nyùy kfən lì wun, e kòʼór e ntoò yùv.

²⁷Wù kfə́n a dzə jeéy fo atàá cù ve kuʼkìné vee fó mbìy ve á kù‑uù kér fó a rəsí, a taŋrí antàŋrí vishiíy vidzə̀m. Aá kù‑uù kér fó tòmbìy kwàŋrì vév vee vinyo, e bó a kwàŋrì vé wìr ámóʼó. Jesus nèn yiì və́ə woo ntàŋrí kàŋ mòʼón, wù ku nèn ghèén. Wù‑uù lì a dzə̀ kitú kfə́, e tàŋrí wíri shó adzə̀m.

²⁸Wù dzə̀ rú jeéy fo taà cù wo kùʼùn woó dzəə ye mvə. Vé‑eè lo, lóo shoʼ wír ji taà cù wo kuʼùn, kù a dzə wír, a wù kér sa jay. Yii bèy, Nyùy wìy lò, e yiì kilìʼ, e gwàr dzə́ə ye fíy, e nèn lèm a dzə̀ Wán və wo bó wù yòʼ kér jay, a wù ghèén e taà cù wo kuʼùn, e dù, e mày.