Read Lamnso Hibru 9 Bible Online

Hibru 9 - Lamnso bible

Hibru 9

¹Ké *mensàŋ mee fó mbìy ki wáa dzə kfə́ jii, vé‑eè kér vitó vé vinyò ve vé‑eè yii e ghan se á cu Nyùy, kfə̀n kér kirə́ʼ ke á naŋsin ji Nyùy wáa dzə sho e nsay fèn.

²A vé‑eè bàʼrì moo lúm kibàn, e tìnén mbìv sibaà. Mbìv yee fó ndzə, á wáa yòŋ ji kirə́ʼ kee jeéy kí, aá tiír kitiir ke lam, e kfə̀n tìír kidàŋ, a neèr kibán sho vishiíy vidzə̀m ji ké Nyùy.

³Mbìv yee fó mvəm ye yì‑iì dzəə̀n é bǎm ndzə̀y se vé‑eè tinmen shó nèn a dzə kirə́ʼ kee jeéy kí féyì ji kikìkìŋ ke wun woo Nyùy.

⁴A dzə̀ fo kíy ye vé‑eè ton kiláy ké Nyùy shoo‑oò tíyí, aá fér a dzə̀ e *kisha ke mbàm ke baar kí. Ŋkùv wáa tiy sa fo, aá yoŋ ji wo mensàŋ me Nyùy gwàrìn wùn à wíri, aá fér e kicí kí, e laàrì e kisha ke mbàm kee shooy ki. Viwaŋ ve tiy ví‑iì dzə̀ shó vibaà, a dzə̀ ve vé‑eè saŋen nsər se mensàŋ mèy sho. Mbìʼí wáa dzə sa e ŋkùv foo fèy, wùn à mbàŋ, aá fér mbìʼ woo shooy sa e kisha ke mbàm ki, e lèm kisəəm ké vifa ve yi vímóʼ ví shó, aá yoŋ ji *manna. Mbàŋ‑eè dzə̀ ye Aaron ye Nyùy‑iì yiìn, yì lò, a tèʼ tèʼèn.

⁵Á fér sá vifá veé yuv vímóʼ ví, ve ví kér vav si, ví wáa taa e kitu ke ŋkùv foo fèy, a dìn ji Nyùy dzə̀ á fo, a dzə̀ fo Nyùy‑iì kwaŋrì vinyo ve wíri. Yii bèy, a bó yòʼ dzə̀ vèr yù fó kwèʼ vinyo vìn vidzə̀m lèn, e naàrì.

⁶Mo virə́ʼ vin vi‑iì dzəə̀n é kibàn fen, atàá cùu nèn a rəsí, a nəə́, a yiì lim yév a dzə̀ é mbìv yee fó ndzə.

⁷A kù nəə taà cù wo kuʼùn é mbìv yee fó mvəm kàŋ mòʼón e kitu ke kiya. Wù lóo nəə́, wù kù a ker mensə́ me nyàm me wù nəə, a kwàŋrì vinyo və́ wùn à ve wír ámóʼó jáy là kiíy sho.

⁸Mo kí dzəə̀n bey, Kiyoy ke Ranén kí nèn a dìn, kí wáa yensín rú jii, yì‑iì dzə̀ é ghan se vé‑eè cu Nyùy e kibàn fóo fèy, a bó dzəə̀ yòʼ dzə̀ ye dzə̀ wìr nə̀ə́ fó mvəm fo Nyùy dzəə̀n.

⁹A vinyo ve vé‑eè yii e kibàn fóo fèy vìn vi‑iì fiʼìr a dzə̀ vinyo ve ví kooy e ghan sin, naarì mo ví dzəə̀n. Mo vé‑eè rə́si cu Nyùy, kwaŋrì antàŋrí é kibàn fóo fèy, a bó yòʼ dzə̀ wìr nə̀ə́ fó mvəm fo Nyùy dzəə̀n, bo kí din ji vinyo vee shooy vi yòʼ‑oò dzə̀ ví nàŋsín wír, wù ghèén fo Nyùy ŋkuuŋkùŋ.

¹⁰Kù‑uù dzə̀ vimfìʼìr ve vinyò, a ví kum a dzə̀ wún, nèn du e mbìv vifa ve yi wùn à ve noón ví, à ve suùn ví. Aá kù‑uù yii vitó vé vinyò vee shooy cáʼ ji á wáa shìy a ghán se Nyùy wíy yiì kinyo ke dzəə̀n sí kíwun.

¹¹Wáa dzə lèn, a Kristu wíy ne, a dzə taà cù wo kuʼùn wo wù yii a dzə̀ sí kíwun ke vé‑eè shiyì, a kibàn ke wù lim sho ki shaà ké mbìy ki. Bó yòʼ dzə̀ kirə́ʼ ke naŋsin wír e mbìv yìmòʼ é ndzə fèn ji ké Nyùy. Wù lim kfə́ a dzə̀ e Nyùy si.

¹²A wù‑uù lo nə̀ə́ kfə́ e Nyùy kibàn keé yuv, e tòsín, e dù a dzə̀ fo Nyùy dzəə̀n. Wù yòʼ‑oò du bèy, kér mensə́ a dzə̀ me nyàm yee moo bvə́y, kìn wan nàʼ. Wù‑uù du kfə́, kér mensə́ a dzə̀ mvə́ə, e nèn tìn wíri fó ŋgeʼ, á bòy ŋkuuŋkùŋ.

¹³Yì‑iì dzə̀ fó mbìy, wìr li *kifàn, bír fó a yiì lim Nyùy, á lì mensə́ me nyàm ntàŋrí, kìn dzə̀ me bvəy, kìn me mbòŋ, kìn á lì a dzə̀ kibvə́ ke nyàm cù ye á tònèn, yì shwí, e rèŋ, e wàŋrí e ŋgaàŋ wùn, wù nèn ràn fó fo.

¹⁴Mo mensə́ me nyàm mè‑eè kér vitaáví fó naŋsín ŋgaà kifàn, bo me Jesus Kristu mè‑eè yiì kinyo, e shaà kee shooy feyì. Mo wù‑uù foon kitú kfə́, e kpù, a bó wù yòʼ kér njò yìmòʼ ye dzəə̀n ji rə́ə, Kiyoy ke Nyùy ke kí gòʼòn kàŋ mòʼón ki nèn yiì, woo shooy woo ntàŋrí náŋsín melív mèsən lèn, vèsən bóy fó vinyò ve vé‑eè yii, a bó yòʼ dzə̀ ví sə̀ wír wù ghèén fo Nyùy. Vèsən nén a dzə lèn vèsən à Nyùy, a lìm fo fo.

¹⁵Fo mvə̀m mensàŋ me fíy mèn, Kristu nén a tiy e Nyùy wùn à wírí nsàn, é wír ve Nyùy‑iì shoʼon ji vəə́ fíʼ a nəə́ e mvə̀m vijùŋ ve wù kàʼàn wír və́ shó, a dzə̀ ve bó yòʼ dzə̀ ví ghàn mày. A dzə̀ áwune kù nə̀ə́ sho, bìʼ fo wìr‑iì kpuun, e tìn áwune fó njò ye vé‑eè liìn bìʼ fo vé‑eè yaʼayin mensaŋ me mbìy mè.

¹⁶Aá kfə̀n nəə, bìʼ fo vijuŋ vee shooy vi dzəə̀n sá vitsə́ʼ ve Jesus lèmèn aáwune. Mo wù‑uù kpuun, bo dzə̀ lèn, á yì,

¹⁷bìʼ fo bó yòʼ dzə̀ wír, wù yì vitsə́ʼ vé wìr, a ŋgaàŋ dzə̀ə́ sho. Bó yòʼ dzə̀ wù dù é kitu wo gheéy, a bó ŋgaàŋ kpú.

¹⁸A kù dzə̀ ke kí‑iì kooyin é ghan se Nyùy‑iì gwàrìn mensaŋ me mbìy mè, é bo mè meé é kinyò.

¹⁹Yì‑iì dzə̀ é ghan see shooy, Mooser tómbìy yòŋ nsər se Nyùy‑iì foon bìʼ mensaŋ mee shooy, wíri yú adzə̀m. Wù nèn lì mensə́ me bvəy wùn à me nàʼ mè, e shwìr é mendzə̀v, e wàŋ é ŋwàʼ wo vé‑eè saŋen nsər see shooy sho, e kfə̀n wàŋ sá e wírí wùn. A wù‑uù lì a dzə̀ kikwiíy ke á yoŋ ji *hisov wùn à wúy njiì ye vé‑eè baàrsìné, e bó a waŋ sho.

²⁰ Wù lóo waŋ, wù wàa suŋnín jii, «Á mensə́ me mè fìnèrìn mensaŋ me Nyùy Tàr gwàrìn vèn áwune, ji vèn wáa tiy sho.»

²¹Wù nèn kfə̀n wàŋrí sa mensə́ mèn e kibàn fo vé‑eè cu Nyùy, e wàŋ sá e vifa ve ví‑iì dzəə̀n shó.

²²A kù dzə̀ mo vé‑eè yii e ghan sé mensàŋ me mvə mè. Kùʼùn vifa‑aà dzə̀ ve dzə̀ á kù wàŋrí mensə́ sho, e bóo naŋsín ji vé Nyùy. A bó yòʼ‑oò dzə̀, á nàŋsín jay wìr, wù ràn fó fo, a bó á seé nyám, mensə́ mè leém.

²³Kí‑iì ló a dzə rú é shií ji á wáa naŋsín vifá ve vé‑eè cu Nyùy sho e mensə́ me nyàm ntàŋrí mè, bo ví wáa gheén fo Nyùy. A vifá vee shooy vi‑iì dzə̀ cáʼ ji vimfìʼìr ve vifa ve ru ví ve ví dzəə̀n a dzə̀ é yuv. Mo kí dzəə̀n bey, bo ntàŋrí wo á yii e kitu ke vifa veé yuv kù kér fó shaà wo á yii a dzə̀ é kitu ke vifa veé nsay fèn.

²⁴A bó Kristu yòʼ‑oò dù, a yiì və́ə woo ntàŋrí é kirə̀ʼ ke naŋsin wír ji ké Nyùy ke kù dzəə̀n vimfìʼìr ve kirə̀ʼ ké Nyùy ke ru kí. Wù yii və́ə a dzə̀ é yuv, fo wù dzə́ lèn e Nyùy si, lón fo vèsən.

²⁵A bó wù yòʼ dzə́ fo bèy ji wun wáa rəsí, a yiì və́ə woo ntàŋrí akàŋ akàŋ mo taà cù wo kuʼùn yii yii e nsay fèn, nəə e Nyùy kikìkìŋ e kitu ke kiya, din mensə́ e Nyùy, a bó yòʼ dzə̀ mvə́ə.

²⁶A kee shooy ki‑iì dzə̀ é shií, bo Jesus kù dzəə́ rə́si kpú, kfə̀n lo kpú, e kèʼ mo Nyùy‑iì bomen ndzə. Ké Jesus ki dzə̀ jii, wù wìy e ghan se ndzə ye mvə sí shaa sìn ji wun mayir vinyo ve bi ví, e fò kitú kfə́, e tàŋrí wíri shó kàŋ mòʼón.

²⁷Wìr kù yii kpú kàŋ mòʼón. Mo wù kpuun, wù nèn a shìy a dzə̀ ghán sé nsaʼ.

²⁸Kù dzə̀ sá mo Kristu‑uù foon kitú kfə́, e kpù fo wíri kàŋ mòʼón, e nèn bèʼèy njò sé wìr anín, á bòy fo nsaʼ. A wù kfə̀n wíy wìy e ndzə fèn ji akàŋ abaà, a bó wù yòʼ dzəə́ wiy bèy ji wun kwaŋri á njò sé wíri. Wù sí wiy lèn ji wun luŋer á wír adzə̀m ve á shiy ji wù wiy.