Read Lamnso Jeem 4 Bible Online

Jeem 4 - Lamnso bible

Jeem 4

¹Afə̀r vem, kinyo ke kí yii, bo vèn wáa lò, a taŋnín, a fùnèn ki dzə̀ ka? Kù dzə̀ bìʼ fo vèn kér shií fó vinyò ve mensə́ mè lim e věn wùn, báyir melív men.

²Mo vèn siíme vifá, ví lóo buŋ, vèn nèn a yen ji bo á kì yùyrí wír, e fíʼ koóy. Vèn shií vifá, e làa yòʼ koóy, á nèn kèʼ, a taŋnín, a taŋ rə́r. A kinyo ke kí yii, la vèn yòʼ a koóy ki dzə̀ bìʼ fo vèn yòʼ lón a dzə̀ fo Nyùy.

³A vèn fə̀m kì lóné, la vèn yòʼ kòóy, bìʼ fo vèn yòʼ lón a dzə̀ kifá kee réŋ. Vèn lón kén a dzə̀ kifá ke mensə́ men mè tíy sho.

⁴Vèn màʼày ne Nyùy, e kfə̀n moo wiíy wo wù ghán viŋkar. Bó vèn yòʼ kì jii, a wìr koò viŋkar wùn à vinyo veé ndzə fèn vi, bo wù sí ban Nyùy bánen a? Kí nén a dzə jii, wìr wo wù koŋ, a dzə ŋkar vinyò veé ndzə fèn, ŋgaàŋ lì ne kitú kfə́ á ji ŋgaà vibàn Nyùy.

⁵A dzə̀ vèn yèe, e bó a kwàʼtì ji kinyo ke vé‑eè saŋen é Ŋwàʼ Nyùy ki dzə̀ kisáŋ? Vé‑eè sàŋ jii, «Shilív she Nyùy foon e vèsən shí lo, shí kù a dìy, a ker shií fó vinyò vímóʼ ví vinín.»[1]

⁶ Yii bèy, a Nyùy kù sheŋrì ghán sidzə̀m, a mè kù yòʼ tíy e wun wùn. A dzə̀ kíwun ke vé‑eè saŋen jii, «Nyùy méŋ wír ve á yén vitú vév, nèn leey ve á néŋ e wùn si, shám áwune.»

⁷Vèn ku nèn a neŋ a dzə̀ e Nyùy si, a shaʼnín Satan, é wù nyéŋ á fo věn bàm.

⁸Vèn wáa koʼtí e Nyùy ghaŋ, é Nyùy wáa koʼtí sa e věn ghaŋ. Ven ve á buʼtì vinyo, vèn fəə́r wó yéné fó fo. Ven ve á tíy vèn à Nyùy melív mebaà, vèn fəə́r kwaʼtì ye bií fo věn meliv.

⁹Vèn wáa woomé fo věn vinyò ve bi ví, a sòv kitú, a dìy. Vèn maʼti shéʼe, a toŋ toŋén. Vèn bér kishéʼrì ki, a rə̀m a dzə̀ vitú vén.

¹⁰Vèn wáa gvəʼə́r vitú vén a dzə̀ e Nyùy si, é wù wáa nàn ven.

¹¹Afə̀r vem, lá wìr yòʼ a ghvə̀vrì fə́r və. Wìr wo wù ghvəvrì fə́r və, kìn wù say sàyìn, ŋgaàŋ ghvəvrì a dzə̀ nsər Nyùy, say wun woo Ŋgaà Nsər. A wìr yèn ji dzə̀ wun wàa sayrí nsər se Nyùy, bo bó wù yòʼ dzəə́ yén nsər ji kifá ke dzə̀ wun wàa yu fo fo. Wù wày ne kfə́ ji wun kú a sayrí sayrín.

¹²Vèn wáa kiíy jii, ŋgaà wo wù fer nsər kù jòʼsì e mòʼón, a kù mày wun wo dzə̀ wù wàa sayrí nsər yee shoon. Wù kér vitaáví vée sə wír wo wù gbuùn nsər, é wù luŋ, kfə̀n kér vée màʼ ŋgeʼ e wìr mo nsər suuyì. A wìr kfə̀n lò, a sayrí kinyo ke fər və, bo ŋgaàŋ kwaʼtì ji wun dzə̀ moo la?

¹³Vèn yuúrí, é m suúy kinyo lèn a dzə̀ e wír ve á lo, á wàa sevtí kinyóo. Á lo, á gòʼ jii, kìn dzə̀ lán, kìn dzə̀ kibvəə́shí, é vèr du é ntèʼ fen, e dù e rə̀sə, e kàvnín wáy fó kiyá kifur, e kùúy séʼ.

¹⁴Vèn lóo suúy bèy, a vèn kì kinyo ke kí bvəə́shi, e koóy a? Vèn dzə̀, a dzəʼə̀m yéné dzə̀ moo mbàʼŋkfəə́mé ye á yén lèn, shishàr, yì nèn lày.

¹⁵Ke dzə̀ vèn wàa suúy ki dzə̀ jii, a Nyùy sə̀, vèr wáa dzə sho, é vèr yii kin, e yiì kísə.

¹⁶Vèn lo kén, á nèn a dzə̀v a dzə̀ nsaŋ, a sevtí mo vèn bvəə́shi, e yiì. Vèn wáa kiíy jii, fó a sevtí bèy dzə̀ á kinyo ke kisaŋ ki.

¹⁷Kí nén a dzə jii, a wìr kì kinyo kee réŋ ke wù kì yíi yiì, e làa yòʼ yiì, bo wù yiì ne a dzə̀ kinyo ke bi kí, e lì njò.