Read Lamnso Jeem 5 Bible Online

Jeem 5 - Lamnso bible

Jeem 5

¹M nén a suúy kinyo kímóʼ kí lèn a dzə̀ e vé bùʼu. Vèn wáa dìy, a ghèʼsìn. Ŋgeʼ yíi gbù e věn kitu.

²Bùʼ won fòy ne. Séʼ si là ne ndzə̀y sén.

³Nyàŋ bìvír ne mbàm sén sidzə̀m, a wù din réŋréŋ mo wún wóné wíy rèŋ mo wú shwì a dzə̀ é və̀y. Ven ve vèn rə́si báʼti bùʼ, e làa yòʼ a kuumé ji ndzə wíy mày, yì sí may lèn.

⁴Vèn‑eè rə́si bóʼ aŋgaà vén lìm. Á ghitìr, káv vifá vén fó sum, vèn kfə̀n yì vilaʼày vév. Vèn yuúrí ri mo á tóŋ fo kwaʼ. Aá tòŋ ne, Nyùy Tàr woo Taà Mànjòŋ yú.

⁵Vèn‑eè sí nyavnìn, yí vitú vén é ndzə fèn. Vèn yìkír ne, e fàŋkìr, a sənín vinsòŋ ve nyàm ve ví koʼon ne, e ghèén, aá kù sí seé lèn lèn.

⁶Vèn‑eè lo, á gòvtì wír là jay, e kù tìnén nsaʼ ji á yúyrí, a bó yòʼ dzə̀ wù wàa ker shuu wo dzə̀ wù bìnèr kinyo sho.

⁷Afə̀r vem, kí nén a dzə jii, vèn kú a dzə ji nyaáŋ, a shìy ghán se Taàtá wòsən Jesus wíy wìy. Vèn kú a dzə moo ŋgaà sùm wo wù leey ji wun wíy kav vifá ve juŋ vi fo wùn sum. Wù kù yii dzə́ ji nyaáŋ, shiy a dzə̀ kimgbù ke wuu. Yí sə́ʼəyì, wù nèn a shìy a dzə̀ ye yí wáa manrí vifá.

⁸Kù dzə̀ sá mo vèn ghár shilív, a dzə ji nyaáŋ, a shìy, a kiíy jii, kishiíy ke Taàtá wòsən Jesus wíy a wìy ki sì á fo mentsə̀m.

⁹Vèn lóo shìy, afə̀r vem, lá wìr yòʼ a ghvə̀vrì fə́r və, fó dzə̀sì rə́ə yee njò. Vèn wáa kiíy ji wìr wo wù wíy a tàr kinyo ke wìr dzə̀m sí tíy e shùu lav.

¹⁰Afə̀r vem, vèn ku lì kisəəm kí a dzə̀ fo wír ve vé‑eè tiísi ntum Nyùy fo ŋgùʼú. Áwune‑eè yén ŋgeʼ sinín, kù dzə́ ji nyaáŋ.

¹¹Vèsən kì ji áwune sí yú vijuŋ a dzə̀ á vé Nyùy, bìʼ fo á kù‑uù tíy a dzə̀ e Nyùy wùn, e dù, e jòʼsì. Vèn kfən yù sá mo ŋgeʼ si‑iì kooy Jov, a wù kù tíy a dzə̀ e Nyùy wùn. A vèn kì mo Nyùy‑iì yiìn. Wù‑uù bìnèr ŋgeʼ sə́ siy ji vijuŋ, bìʼ fo wù yii shám wíri, rə́r mendzən fo áwune.

¹²Afə̀r vem, kinyo ke kuʼùn kí wáa dzə jii, vèn lóo suúy kinyo, wìr wàa yen a fó a kàn kinyo. Kin wù kan a dzə̀ yúv, kìn dzə̀ nsay, kìn dzə̀ kifá kìka. Ke dzə̀ vèn wàa yiì ki dzə̀ jii, wìr biíme kinyo ji eè, kù a dzə a ji eè. Wù sháʼnin ji àáy, kù a dzə a ji àáy. Vèn lóo yiì bèy, é la wìr yòʼ dzəə wìy gbù fo wùn shuù.

¹³A wìr fo vèn lò, a ker ŋgeʼ, wù kù a lon a dzə̀ fo Nyùy, é wù sə́ wun. Wìr wáa dzə e vijùŋ, wù wàa yòv luŋ, a sùyrì Nyùy sho.

¹⁴A wìr lò, a jòy, wù jàŋrì atǎr kintatì, aá wiy, e bùnrì fo wun. Á lóo bùnrì, á yòʼrí e meŋgvə́r mè, a lon e yír Taàtá wòsən Jesus ji Nyùy sə́ á wun, é wù bónén.

¹⁵Aá fèn lón bèy, biíme ji Nyùy yíi sə, bo ŋgaà yàsí woo shooy yíi bonén, é Nyùy kfən làysìn vinyo ve bi ve wù‑uù yii.

¹⁶M nén a tir ven jii, wìr jáy kinyo e wìr, wù tuùné kitú kfə́ e ŋgaàŋ, é wìr kfə́n a lon ji Nyùy sə́ wùmòʼ woo wír. Vèn lóo yiì bèy, é Nyùy nèn a fèr ayàsí vén. Vèn wáa kiíy jii, a wìr tíy réŋ wùn Nyùy, e kàn wun e kinyò, Nyùy kù yiì kinyo ke tavín kí.

¹⁷Vèn kuúmé Elija. Wù‑uù dzə̀ wír fo wìr réŋréŋ moo vèsən. Wáa dzə e ghan símóʼ sí, wù tóŋ fo Nyùy feyì kitávín ji wù ku tìír a wuú. Wù nèn tìír, la yí yòʼ shèm é wòŋ foo fèy e bǎm viya vitaár e kimbéʼ ki.

¹⁸Wù nèn kfə̀n lò, e lòn, Nyùy tsə́nsí wuú, yí cuùrì fo yuv, nsay rə̀, vifá vi kfən fəə̀.

¹⁹Afə̀r vem, a wìr fo vèn lò, e jày dzə́ə, e màʼtì kinyo ke dzəə̀n ke ru kí, wùmòʼ woo wír yén, e naàrì wun, e lì, e kfə̀n shó e bàm, bo dzə̀ kinyo ke juŋ ki féyì.

²⁰Vèn wáa kiíy jii, a wìr bìnèr wír wo wù toon é vinyò ve bi ví, wù kfə́n é bàm, e màʼtì dzə́ə rə kisaŋ rə̀y, bo ŋgaàŋ fə̀ə́r wír woo shooy a dzə̀ fó kpu, e yiì, Nyùy láysín nyanyày vinyò ve bi ví.