Read Lamnso 1 Pita 1 Bible Online

1 Pita 1 - Lamnso bible

1 Pita 1

¹Ŋwàʼ və̀ne sàŋ mo woo Pita wo dzəə̀n ŋgaà ntum Jesus Kristu. A m sàŋ a dzə̀ fo wír ve Nyùy shoʼon ji və́ ve á sàmèrìn wún, a beè e wòŋ see Pontur wùn à Galatia, à Kapadosia, à Asia, e lì woó Bitinia.

²Nyùy woo Tàr wòsən‑eè shòʼ ven a dzə̀ mo wù‑uù sìysìn ne fo ŋgùʼ. Wù nèn wìy tùm Kiyoy kfə́, kí wìy, e nàŋsín ven ji və́ vee wír. A wù‑uù yiì bey, ji vèn wáa dzə, a yu a dzə̀ á fo Jesus Kristu, é mensə́ mvə mè táŋrí ven, é vèn boy fó njò. M nén a lon jii, Nyùy kú a shaà fo mbìy, a leéy fo vèn, a yiì, é melív men mè wáa dzə nyaáŋ.

³Vèsən ku nèn a beèrì Nyùy woo Tàr à Taàtá wòsən Jesus Kristu. Wù‑uù rə̀r ne mendzən fo vèsən é ŋàŋ, e yiì, vèsən wáa dzə wír və́ bìʼ Jesus Kristu. Mo Kristu‑uù kpuun fo vèsən, e kfə̀n fəə̀ fó kpu, vèsən nén a dzə wír ve á dzəə̀n afíy. A vèsən sí dzə́ lèn, njeʼ feyì, leey a dzə̀ fó mbìy ji

⁴vèsən wìy nə̀ə́ e mvə̀m vijùŋ ve Nyùy‑iì naŋsin, e lèm e wír vəə́ vidzə̀m. A wù lèm a dzə̀ e wùn wòŋ woó yuv fo ví kù wíy a dzə ghán sidzə̀m, a bó yòʼ dzə̀ ví ŋeèmé, e lày, a bó yòʼ dzə̀ sá ví bìr fó gheéy.

⁵Kù wíy a dzə vijuŋ vén, ven ve á wáy shilív e Kristu wùn, a vitaáví vé Nyùy vi shiy ven, e meé e ghan se wù wíy fəə́r dzəʼə̀m yee là may rə̀n e ghan sé bàm sí.

⁶Vèn kú a kuumé a dzə̀ kinyo kee shoon ki ghán sidzə̀m, a sheʼrí. Mo ŋgeʼ si fə̀m kooy ven fó shintsə̀mén shé ghan fen, vèn ku yòʼ a sheʼrí,

⁷a kiíy jii, sí kooy bèy, aá fíʼ yen ji vèn wày rú shilív e Kristu wùn. Mo á kù yii mum kisha ke á fer mbàm sho e və̀y, e bó a shèŋrì, a dzə̀ kifá ke kí wíy mày, bo dzə̀ á kù mùm sa ven, é vèn fíʼ màysì, e wày shilív e Kristu wùn, wíy lóo dzə e kishiíy ke wù wíy kfən, aá wáa burí ven, a meér yír yén.

⁸Lèn və̀n, mo bó vèn yóʼ ne fə̀m yèn Kristu, vèn sí koŋ wun. Vèn kfə́n a way sa shilív é wùn wó, a bó á yòʼ yéné. Vèn nén a dzə, a ker kishéʼrì ke kuʼùn kí, a bó móo fìʼ yòʼ dzə̀,

⁹bìʼ fo vèn kiìn jii, mo vèn wáy shilív e Kristu wùn, vèn waà wíy lùŋ, e nəə́ e dzə̀ʼə̀m yee là may.

¹⁰A mbùʼmé wo Nyùy wíy bùʼ ven shó və̀n dzə̀ wo aŋgàa ntum Nyùyi‑iì sí fiʼtì fo ŋgùʼ, a bó á yòʼ kì mo wù dzəə̀n. Á nén a rəsí, a nəə́ e mvəm wó, a ŋeèvì ji á kiíy á mo wíri wíy ghan, e bóo lùŋ.

¹¹Kiyoy ke Kristu ke kí‑iì dzəə̀n aáwuné meliv kí‑iì rə́si yii, aáwune tiísi ji Kristu kù wíy yen ŋgeʼ, fo bàm, é bo Nyùy kóʼór á wun. Á ku nèn a sòvìr ji á kiíy á ghán se vinyo vìn vi wíy koóy, e kfə̀n kìíy saa mo ví wíy ghan, e bóo koóy.

¹²Nyùy nèn yiì, áwune kiíy ji vinyo ve áwune rə́si tiísi vìn vi yòʼ waà wíy koóy aáwuné ghan. Ví wìy sìíy, a koóy a dzə̀ e věn kiwo. Nén a dzə víwun ve vèn sí yú lèn fo wír ve á fiʼtì sáʼka Nyùy wo juŋ e vèn, aá fiʼtì a dzə̀ mo Kiyoy ke Nyùy‑iì tumen fó yuv kí bánri áwune, réŋréŋ mo wù‑uù bánri vee fó mbìy. A vèn nə̀ə́ ne lèn e vinyò a dzə̀ ve nshèelav se Nyùy si diy feyì ji á kiíy á mo ví dzəə̀n.

¹³Vèn ku nèn wày vifií, a dzə kibáʼtín fó a yiì moo wír Nyùy. A kí dzə̀ jii, vèn tiír á vifíi vén a dzə̀ é vijùŋ ve Nyùy wíy bùʼ ven shó e ghan se Jesus Kristu wíy wìy.

¹⁴Vèn kú a yu a dzə̀ fo wun woo Nyùy, e làa yòʼ dzə́ə a yu a dzə̀ mo mensə́ mè lim e věn wùn, a yiì mo vèn‑eè rə́si yii, a bó á yóʼ ne kìíy Nyùy.

¹⁵Mo Nyùy wo wù liìn ven ji wír və́ dzəə̀n e ránén là jay, vèn kú a yiì vinyo vén vidzə̀m, é ví wáa dzə viránén là jay.

¹⁶ A dzə̀ kíwun ke vé‑eè saŋen ji Nyùy suuy a jii, «Vèn kér fó a dzə aránén, bìʼ fo m dzəə̀n e ránén.»

¹⁷Mo vèn yii lóo bùnrì, vèn wàa yòŋ Nyùy ji Tàr won, kí nen ghèén ji vèn wáa yu wun moo wón və́ é ndzə ye vèn bee sho béen rə̀n, a tiír kiwúu kén, a fìʼ, a kiíy jii, Tàr won Nyùy woo shoon kù yii sáʼ wir dzə̀m a mo kinyo ke ŋgaàŋ ki dzəə̀n. A bó wù yòʼ yii bin nsaʼ mbvə́nkíwó.

¹⁸Vèn kú a kuumé ji Nyùy‑iì yiì á kinyo ke ghaʼán kí, e bóo fəə́r ven fó mvə̀m liì kisaŋ wo atàr véné‑eè dànèn ven shó. Wù‑uù tìn ven fó lǒn liì woo shooy, a bó wù yòʼ‑oò tìn a dzə̀ e kifá kee moo mbàm se dzə̀ sí mày, a fə̀m dzə̀ *kisha ke mbàm ke baar kí, kìn ke fəvír kí.

¹⁹Wù‑uù tìn a dzə̀ e mensə́ me Kristu mè, a dzə̀ kifá kigháʼán, bìʼ fo Kristu dzəə̀n kfə́, a bó wù yòʼ kér jay wùmòʼ gheéy. Wù nén a dzə moo wan njiì woo là shilóm, wo á seé, e taŋrí wíri shó.

²⁰A Nyùy‑iì yiì ne shòʼ wun, é bo ndzə wìy a kèʼ ji wù ghàn tìn wíri fó lòn. Wù nen tùm a dzə̀ lèn wo ndzə sí du, e dù, e jòʼsì və̀n, é vèn fíʼ kiíy wun.

²¹Vèn nén a way shilív e Nyùy wùn lèn, a dzə̀ bìʼ Kristu wo wù‑uù tumen, wù wìy, e kpù fo vèn. Wù kfən fə̀ə́r fo kpu, e bùʼ e vikuʼùy və́ ví. Melív men mè nén a tiy lèn a dzə̀ e Nyùy wùn, vèn wáa leéy fó mbìy ji wù li sá ven, e wày e wùn mvə̀m vijùŋ foo fèy.

²²Mo vèn kù sí tíy a dzə̀ e Nyùy kinyò ke ru kí, vèn nén a ker melív me juŋ mè lèn, me dzə̀ vèn wàa kòŋ afə́r vén ve vèn áwune tíy e kinyò fèn kijuŋ. Vèn ku nèn a kòŋnìn bèy shilív shidzə̀m,

²³a kiíy jii, jí se Nyùy se sí tíy fo ghán sidzə̀m, fó dzəʼə̀m ye fíyi, si yiì ne, á dzəə́ ven afíy. A bó yòʼ dzə̀ ji wón wìr wo dzə̀ wù kpù, vèn sì wón Nyùy wo wù gòʼòn kàŋ mòʼón.

²⁴ A dzə̀ mo vé‑eè saŋen é Ŋwàʼ Nyùy jii: «Wìr dzə̀ moo viŋgà, a vijuŋ və́ ví dzə̀ moo vibuushì. Viŋgà, a ví yúm, vibuushì ví keèsí,

²⁵a jí se Nyùy si kù tíy kfə́ fó ghán sidzə̀m.» Vé‑eè sáŋ bèy, a jí se Nyùy sìn si dzə̀ sáʼka Nyùy wo juŋ wo vé‑eè fiʼtì e vèn.