Read Lamnso 2 Pita 2 Bible Online

2 Pita 2 - Lamnso bible

2 Pita 2

¹Mo vé‑eè tiísi a dzə̀ ntum Nyùy e wíri, yii bèy, wír ámóʼó‑oò ló a dzə sa ve vé‑eè lo a dzə̀ ntum kimboʼtì. A kù dzə̀ réŋréŋ sá mo aŋgàa yeʼéy ámóʼó wíy nànèn e věn mvəm, a boʼtí ven. Áwune wíy lì kimboʼtì, a woór e mvə̀m kinyò ke Nyùy, a tuŋ wuú Taàtá wòsən Jesus wo wù‑uù kpuun ji áwune fiʼ lùŋ. Aá wíy yiì bèy, é Nyùy ku nèn tsə̀m áwune e lòné.

²Aá kù yòʼ wíy lòo boʼtí bèy, é wír aníne shém aáwuné ŋgoo, é wùn áwune tátí, a yiì joonè wo wún wóví taʼ ji á wáa yiì, é wíri wáa leéy kinyo ke Nyùy ke ru kí ntéŋ.

³Mo wír vìne kù taʼ a dzə̀ mbàm, á lo, aá nèn taà vinyo vinín, a boʼtí ven shó ji á fíʼ koóy. A Nyùy kù‑uù shòv ne áwune fó ŋgùʼ, e bàʼtí lòn wo áwune wíy nəə́ sho.

⁴Vèn kì sá jii, Nyùy yòʼ‑oò ló a bavtí nshèelav sə́ se sí‑iì loòn, e kèʼ vinyo ve bi ví. Wù‑uù tàtí áwune, e dòm e biíntùr, a dzə̀ fo á néŋ lèn e ŋòròʼ, shiy a dzə̀ kishiíy ke Nyùy wíy tinén nsaʼ.

⁵A bó wù yòʼ‑oò ló a bavtí sa wír ve vé‑eè méŋ wun fo ŋgùʼ. Wù‑uù fə̀ə́r ndzə́v, yí lì kitú ke nsay kidzə̀m, e bàvtí a dzə̀ Noa wùn à wír vəə́ saàmbà, bìʼ fo wù‑uù din e wíri mo dzə̀ á ghàn é dzəə yee réŋ.

⁶A kù dzə̀ sá mo wù‑uù lovtin e ntèʼ see Sodom wùn Gomorra. Wù‑uù tsə̀nsí və́y fó yuv, wú tòn ntèʼ see shooy, sí shwí, e kfə̀n é kibvə. Wáa dzə kisəəm ké ŋgeʼ ye wù wíy màʼ e wír ve á méŋ wuné kitu adzə̀m.

⁷A wù‑uù lóo tòn fó bèy, e bàvtí Lot wo yì‑iì dzəə̀n wír wo juŋ, leey vinyo ve wír ve bií buʼtì fo, rəm ntéŋ.

⁸Wù‑uù dzə́ e wír vee shooyí mvəm, yén vinyo ve á buʼtì, a kí bír wun feyì, a shilív shí nyár wun, bìʼ fo wù‑uù koŋ kfə́ a dzə̀ vinyo ve juŋ vi.

⁹Vinyo vìn vi nén a dìn mo dzə̀ Nyùy fə̀ə́r wír ve á yú kinyo kfə́ fó ndzə ye bi ye yì gháʼ áwune rə̀n, e kfə̀n a dìn mo wù lóvti e wír ve bií, shiy kishiíy ké nsaʼ,

¹⁰bo taaka ve á yú a dzə̀ fo wún wóví, yii joonè wo mensə́ mev mè taʼà, káy sáʼ e dzə̀m mo aŋgàa yeʼéy ve á bóʼti wíri víne yii. Aŋgàa kimboʼtì vìne guynìn e ŋàŋ, yén a dzə̀ vitú vév, ŋeʼrì gheéy, á wàa kay sa vifá ve ví ghán e ndzə fèn, a ví kér vitaáví.

¹¹Mo kù wíy saʼ Nyùy vifá vìn, bó yòʼ fə̀m dzə̀ nshèelav se Nyùy se sí shaàn aŋgàa kimboʼtì vìn, a sí kér kilíŋ e Nyùy ghaŋ, sí mùm fó a kuùrì vifá vìn e wùn si, a taŋ mo dzə̀ wù lòvtí shó.

¹²Áwune vee aŋgàa kimboʼtì vìne yii vinyo moo nyám se kwaʼ se dzə̀ á koòrí, e seè. Bó á yòʼ kwaʼtì kinyo, e bó a yiì gheéy. Áwune kù yii a dzə̀ kinyo ke kí gheenen áwune, nèn kuurì vifá, a bó á yòʼ kì mo ví dzəə̀n. Aá kù wíy laàr áwune láarin moo nyám si.

¹³Nyùy wíy màʼ ŋgeʼ aáwuné kitu réŋréŋ sá mo áwune bóʼti wíri, danèr, wáy e lòn. Áwune yéʼey kév wíri jii, a dzə̀ wìr kù a yiì a mo mensə́ mvə mè limè, e fíʼ a yu vijuŋ. Á ku nèn a yiì joonè vən, à e shùy sho. Wír vìne shoor kintatì kén féyì. Vèn áwune lo, á tàtí, a yikír, áwune bin fo bàm, á wàa bùʼtì vinyo ve mensə́ mev mè kér shií shó vidzə̀m.

¹⁴Wìr yén wiíy, wù kù a leéy a dzə̀ e sí yímóʼó. Vifií vév ví kù tíy a dzə̀ é vinyò ve bi ví ghán sidzə̀m. Áwune yén wír wo bó wù yòʼ kiìn fo wù dzəə̀n, á nèn bòʼtí, e wày é kinyò ke bi kí. Shií wov kù dzə̀ ji á leeri wír, e kòóy kifá. Á yii bèy, a lǒn Nyùyi koò ne áwune.

¹⁵Áwune màʼtì dzə́ə yee réŋ, e bìn e ye kisaŋ, a yiì mo Balaam[2] woo wan Beor‑iì yiìn. Vé‑eè beè wun e kinyò ke bi kí, wù wáa kòŋ bìʼ mbàm se vé‑eè kàʼàn wun sho.

¹⁶Nyùy nèn yiì, kimbèʼbìy kfə́ kí súŋnín moo wír, e wàm wun fo kiyuŋsì foo fèy, e shèm, la wù yòʼ dzəə tò é jay.

¹⁷Vee shoon vee aŋgàa yeʼéyi dzə̀ moo ntòŋ sé ndzəv se sí yumkin ne, a bó yòʼ dzə̀ wìr lùŋ fó fo, e kfə̀n a dzə moo wuú ye yí kóʼkir, shwéri jùm. A Nyùy lèm ne kirə́ʼ fo wù wíy màʼ áwune, aá wáa neŋ fo e ŋòròʼ.

¹⁸Aáwune kù wíy nəə́ fo bèy, bìʼ fo á ghaŋtì shuu, din vifií, a kù dzə̀ vé vinyò ve kisaŋ vi. Aá yéʼey bèy, nèn lévti wír ve á kù dzəə́ fəə́ fəə́n fo wír ve bó á yòʼ kiìn kinyo ke dzəə̀n ke ru kií mvəm, siir fo, bóʼti áwune ji dzə̀ á wàa yiì a vinyo ve mensə́ mev mè kér shií shó vidzə̀m.

¹⁹Á yéʼey jii, wíri lóo yiì bèy, aá nèn bòy fo nsər se sí kúr áwune, a dzə a fo áwuné vitu. A bó áwune vee aŋgàa yeʼéy vìyi yòʼ fə̀m dzə́ fo áwuné vitu mo á kwaʼtì. Á reŋ a dzə̀ vikwàn fó vinyò ve bi ví, bìʼ fo wìr yii fó kitú e kifá ki, bo wù sì kwǎn kifa kee shooy.

²⁰Vèn wáa kiíy jii, a wìr kìíy ne Taàtá wòsən Jesus Kristu wo wù‑uù tinen vèsən fó lòn, a leʼ vinyo ve ví‑iì bívir wun e ndzə fèn, e kfə̀n lò, a way kiwó e vinyò foo fèy, bo ké ŋgaàŋ ki bìr ne lèn, e shaà kee fó mbìy.

²¹A wìr yii bèy, bo kí‑iì bòŋ ji la wù yòʼ kìíy a dzə́ə ye dzəə̀n ye rù, e shaà fó kiíy, e kfə̀n màʼtì kinyo ke Nyùy‑iì suuyin ji wír vəə́ wáa yiì.

²² Kfə́ə wìr vee béne yii a dzə̀ kinyo ke á maʼ ŋgàn sho jii, «Jwi suʼ kifá fo shuù, yì kfə̀n a yi.» Kfə̀n maʼ jii, «Á su kǔnnyàm, wù kfə̀n dzə̀ŋrí e kishàʼàr.»