Read Lamnso 2 Pita 3 Bible Online

2 Pita 3 - Lamnso bible

2 Pita 3

¹Ŋkàr sem, ŋwàʼ wo m sáŋ fo vèn və́ne dzə̀ wo wú meen ji baà. A m lóo saŋ, m kù a ratí a dzə̀ vinyo ve vèn kiiyin ne vìn, e fíʼ a yìmrì vifií vén, é ví kú a tiy a dzə̀ é vinyò foo fèn.

²A m taʼ ji vèn wáa kuumé a vinyo ve aŋgàa ntum Nyùyi‑iì suuy fo ŋgùʼ ji ví wíy a koóy vidzə̀m, e kfə̀n a kuumé kinyo ke aŋgàa ntum Jesuse‑eè fiʼtì e vèn ji Taàtá wòsən wo wù‑uù tinen vèsən fó lòn‑eè suuy ji vèsən wáa yiì.

³Kinyo ke kuʼùn ke m taʼ ji vèn kiíy kí dzə̀ jii, ndzə wíy kèʼ may, é wír ámóʼó fəə́, a sheʼ kinyo ke Nyùy shéʼén, a yiì a dzə̀ vinyo ve mensə́ mev mè koŋ vidzə̀m.

⁴Aá wíy a kèŋ ven kéŋen, a dzər jii, Kristu‑uù kàʼ ji wun wíy kfən, wù bèé lèn? Mo wù‑uù kàʼàn bey, atàr vesəné sìíy ne, e kpùkír, a vinyo vidzə̀m vi kù tíy e ŋkfə́né, a bó kímóʼ kí yoʼ kùvsín, e kèʼ mo vé‑eè bomen ndzə.

⁵Aá keŋ bèy, nèn laysìn ji Nyùy‑iì sùúy fó shuù a ji yúv wùn à nsay wáa dzə, ví ku nèn a dzə. Wù suúy ji ndzə́ví fəə́r nsay, nsay ku nèn fəə̀.

⁶Wù kfən wìy lì a dzə̀ ndzə́v yee shooy, e laàr kitú ke nsay ke ndzə́ví‑iì fəərin kee shooy sho.

⁷A kù dzə̀ mo wù‑uù suuyin sá ji nsay wùn à yúv wo wú dzəə̀n lène waà wíy shwi, a wù shiy a dzə̀ kishiíy ke wù wíy saʼ wír ve á méŋ wun adzə̀m, e laàr.

⁸Ŋkàr sem, ke dzə̀ vèn wàa kiíy ki dzə̀ jii, Kristu yòʼ kì á ghán símóʼ sí jeéy. Kiyá nsə̀kì ki yoʼ kùʼ fo wun, e shaà kishiíy kimòʼón. A bó kishiíy kee kimòʼón ki yoʼ dòr fo wun, e shaà kiyá nsə̀kì.

⁹Kinyo ke wír vìne keŋ ji Kristu kàʼ, e kfə̀n a ndzə̀y ki yòʼ dzə̀ bey. Ke kí dzəə̀n kí dzə̀ jii, wù kfə̀mén, a leéy a ji wíri biner melív mev adzə̀m, bìʼ fo wù yòʼ koŋ ji wìr mòʼón lay.

¹⁰A kishiíy ke Kristu wíy a kfən kìn ki wíy sàsìn, e bvəy moo shóŋ. Kí wíy gheén, aá yú mo yúví bayin ji mbǎŋ, e nèn tàʼrí, e lày, é vifá ve á bomen ndzə sho vi yaáné, e mày. Nsay wùn à vifá ve ví dzəə̀n shó vidzə̀m vi wíy shwi, e bvəʼə́y.

¹¹Mo vèn kiìn ji vifá vidzə̀m vi wíy bvəʼə́y, vèn wáa kwàʼtì ji dzə̀ vèn wàa dzə e ndzə fèn lèn, a yèe le? A dzə̀ vèn kù a way vinyo vén vidzə̀m a dzə̀ e Nyùy kiwo, a yu fo fo,

¹²a shìy kishiíy ké Nyùy kìn, a yaŋrí ji kí wiy. Kishiíy, ke yúví wíy shwi, e bvəʼə́y, é vifá ve á bomen ndzə sho vidzə̀m vi yaáné, e mày.

¹³Vèsən shiy bèy, aá leey a dzə̀ yúv wùn à nsay ye fíy ye Nyùy‑iì kàʼàn ji wun wíy fəə́r e ghan see shooy. A dzə̀ ndzə ye wíri wíy a dzə sho, a yiì a dzə̀ vinyo ve juŋ vi.

¹⁴Á bèy lèn ŋkàr sem, mo vèn sí shiy kishiíy ke Kristu wíy kfən, vèn ku tìír vifií vén féyì ji vèn à Nyùy wáa dzə a kiránén, é melív men mè wáa neŋ ji nyaáŋ, é la vèn yòʼ a fàn kinyo kímóʼ kí gheéy.

¹⁵Vèn wáa kuumé ji Taàtá wòsən Kristu kfə̀mén, a ndzə̀ytì bèn ji wíri fiʼ bìnèr a melív mev, e wìy lùŋ. A kù dzə̀ mo fər wòsən Por wo vèsən koŋ adzə̀m‑eè saŋen fo vèn, wun wo Nyùy foon wun vifií, wù sáŋ aŋwàʼ anín.

¹⁶Wù kù‑uù suuy sa kinyo kìn aàŋwàʼ foo fèy adzə̀m. Yii bèy, a m kì ji wù‑uù sáŋ vímóʼ ví, a ví taávi fo wíri wáa yu, a wír ámóʼó nèn tóyir vinyo vee shooy, binèr e yéev yee dzə́ə. A kù yii wír ve bó á yòʼ kiìn kinyo ke dzəə̀n ke ru kí, a bó á yòʼ kì fo á tíyí. Áwune nén a toyír vinyo vìn réŋréŋ mo á tóyir veé Ŋwàʼ Nyùy vímóʼ ví. Aá yii bèy, wáy a dzə̀ lòn aáwuné vitu.

¹⁷Ŋkàr sem, mo vèn kiiyin ne bèy, vèn wáa yen fó biimé kimboʼtì ke wìr ve á méŋ Nyùy vìn, e ran kilíŋ ke Nyùy foon e vèn.

¹⁸Vèn ku wày kén vifií ji vèn à Taàtá wòsən Jesus Kristu wo wù‑uù tinen ven fó lòn nəə́nín, é vèn wáa tiy e dzə̀ʼə̀m ye wù bùʼùn ven shó, a kiíy wun, a dù duùn fó mbìy. Vèsən kú a burí wun, a koʼór yír rə́, e kèʼ fo lèn, e dù, e mày. Amen.