Read Lamnso 1 Joon 2 Bible Online

1 Joon 2 - Lamnso bible

1 Joon 2

¹Wòn vem, m sáŋ ŋwàʼ və̀n fo vèn ben fo vèn kfə́n a jay vinyo. A wìr lòo dzə, e kfə̀n jày kinyo, wù wàa kiíy ji wìr wùmòʼ dzə̀, a bó wù yòʼ kér njò, a wù tíy e Tàr wov Nyùy si, búʼ wó bìʼ vèsən, a ŋgaàŋ dzə̀ Jesus Kristu.

²Nyùy laysìn ajay vesən a dzə̀ bìʼ Jesus Kristu və̀n wo wù‑uù kpuun ji wun fíʼ taŋrí vèsən. A bó wù yòʼ‑oò kpù bìʼ ajay vesən cáʼcáʼ gheéy. Wù‑uù kpù bìʼ ajay wìr dzə̀m.

³Kímóʼ kí wáa dzə jii, a dzə̀ vèsən kù a lèm nsər se Nyùy, e bóo kiíy rú ji vèsən kì á wun.

⁴A wìr suuy ji wun kì Nyùy, a bó wù yòʼ lem nsər sə́, bo wù bóʼti, a bó wù yòʼ koŋ kinyo ke dzəə̀n ke ru kí gheéy.

⁵Wìr wo wù koŋ Nyùy shilív shidzə̀m dzə̀ wír wo wù yú kinyo kfə́, lemè. Kinyo ke dzə̀ kí dìn bo wìr kiíy ji wun tíy rú wùn Nyùy ki dzə̀ jii,

⁶a wìr suuy ji wun tíy kfə́ wùn Nyùy, wù kù a ker a liì a dzə̀ wo Jesus‑eè kérí.

⁷Ŋkàr sem, nsər ye m sáŋ fo vèn lèn rə̀n yòʼ dzə̀ e fíy. Kù dzə̀ kinyo ke vèn‑eè sí yú fo ŋgùʼ, e kèʼ mo vé‑eè kèʼèn, a fìʼtì kinyo ke Nyùy e vèn.

⁸A Jesus‑eè ló a lèm nsər yee shoon, á wáa yen e fíy. Aá kfə̀n sí yén sa lèn mo vèn lemè. A dzə̀ yìwun ye m sáŋ fo vèn, a yì yénsin e fíy, bìʼ fo ndzə ye sənér sí shaa, a ye ranén wiyì.

⁹Kí nén a dzə jii, a wìr suuy ji wun ghán e Nyùy mvə̀m ran, kfə̀n ban fə́r və, bo wù kù dzəə́ ghán e ndzə ye sənér.

¹⁰Wìr wo wù koŋ fə́r və dzə̀ wír wo wù ghán rú e Nyùy mvə̀m ran. Mo wù ghán bèy, bó yòʼ dzə̀ wù kfə̀n jày dzə́ə gheéy.

¹¹Wìr wo wù ban fə́r və ghán kfə́ a dzə̀ é ndzə ye sənér, ghaa virə́ʼ gháan, a bó yòʼ dzə̀ wù kìíy fo wù du.

¹²Wòn vem, m sáŋ vinyo vìn fo vèn adzə̀m, bìʼ fo vèn dzəə̀n wír, a Nyùy làysìn ne vinyo vén ve bi ví bìʼ kinyo ke Jesus‑eè yiìn.

¹³A m sàŋ fo vèn ve siìn atàrí, bìʼ fo vèn kiiyin ne Nyùy wo wù‑uù siìn fó kèʼ, e sàŋ fo vèn vee wàʼbìn, bìʼ fo vèn soon ne Satan woo ŋgaà vinyò ve bi ví.

¹⁴M nen sàŋ, bìʼ fo ven vee wón vémé kiiyin ne Tàr wòsən wo dzəə̀n Nyùy, ven ve siìn atàrí kiíy wun woo Nyùy wo wù‑uù siìn, bo ndzə wìy a kèʼ, a ven vee wàʼbìn dzə̀ rú antav. Vèn tíy kén a dzə̀ e Nyùy kinyò, e kfə̀n sò Satan woo ŋgaà vinyò ve bi ví.

¹⁵M nen kfə̀n a tir ven jii, lá vèn yòʼ wày shilív é ndzə ye bi fen, a yiì vinyo veé ndzə foo fèn. Vèn wáa kiíy ji wìr wo wù wáy shilív shó yòʼ dzə̀ á wù kfə̀n wày sá e Nyùy Tǎr wùn.

¹⁶A vinyo veé ndzə vìn vi dzə̀ jii, wíri lo, á wàa yiì vinyo a dzə̀ ve mensə́ mev mè taʼà, yén vifá, á wàa siimé, e kfə̀n a yiì vinyo vímóʼ ví vinín ji á fíʼ a koʼór wún. A bó vinyo vee shoon vi yòʼ lo fo Nyùy gheéy, dzə̀ veé ndzə fèn.

¹⁷A ndzə rə̀n wíy mày, é vifá ve wíri siíme vìn vi may sá. Yii bèy, wìr wo wù yii kfə́ a dzə̀ kinyo ke Nyùy koŋè wíy shaàrì, a dzə ghán sidzə̀m.

¹⁸Wòn vem, ghán se ndzə rə̀n wíy mày si sì fó mentsə̀m. A vé‑eè ló a suúy e vèn ji ndzə wíy lòo mày, é Ŋgaà Vibàn Kristu wàá wiy, aá wìy ne lèn anín. Mo á wìyìn ne, vèsən nèn a kiíy rú ji ndzə rə̀n waà sí mayì.

¹⁹A wír vìne kù fəə́kir a dzə̀ fo vèsə́n mvəm. A bó yòʼ‑oò dzə̀ wír vee vèsə́n mvəm. A yì‑iì dzə̀ vee vèsə́n ŋgoo rú, bo bó á yoʼ kfə̀n fəə̀kír. Mo á fəəkin, kí nen dìn kiránén ji bó á yòʼ‑oò lo tàtí a vèsən.

²⁰Bó vèn yòʼ dzə̀ moo wír vee shooy. Jesus Kristu fò ne ven Kiyoy ke Ranén kí, vèn wáa kiíy kinyo ke dzəə̀n ke ru kí.

²¹A bó m yòʼ sáŋ ŋwàʼ və̀n fo vèn ben ji vèn dzəə́ méŋ a vinyo ve ru ví. M sáŋ bìʼ fo vèn kiiyin ne. A vèn kì sá kijuŋ ji wìr wo wù tíy kfə́ a dzə̀ e Nyùy kinyò ke ru kí yòʼ dzə̀ á wù wàa boʼtí kimboʼtì.

²²Mo vèn kiiyin ne bèy, bo ŋgaà kimboʼtì dzə̀ la lèn? Bó yòʼ dzə̀ wír wo wù kinèn ji bó Jesus yòʼ dzə̀ *Mfə̀ə́r wo Nyùy‑iì tumen a? A wìr woo shooy dzə̀ Ŋgaà Vibàn Kristu. Wù káy Wan Nyùy, kfə̀n káy sa Nyùy woo Tàr wov.

²³A wìr káy Wan Nyùy, bo ŋgaàŋ káy sa Nyùy. Wìr wáa yu Wan Nyùy, bo wù yú sa Nyùy.

²⁴M nén a suúy e vèn jii, vèn kú a tiy a dzə̀ é kinyò ke vèn‑eè tòmbìy yù kí. Vèn lóo tiy sho bèy, é vèn à Wàn Nyùy nèn a dzə kintatì, é vèn wáa dzə sa vèn à Nyùy.

²⁵Vèn wáa kuumé ji yì‑iì kàʼ Wan Nyùy və̀n ji wun wíy fo vèsən dzəʼə̀m yee là may.

²⁶Á vinyo vìn ve m kì taʼ, e saŋ fo vèn, bìʼ wír ve á taʼ ji á wáa boʼtí ven.

²⁷M sáŋ bèn, a m kì ji Kiyoy ke Ranén kí ke Jesus‑eè foon e vèn kí kù dzə̀ə́ e věn meliv, yéʼey ven, a vèn kiiy vinyo vidzə̀m, la shií yòʼ a dzə wo kfə́n a yeʼéy wír ven. A Kiyoy ke Ranén kí yéʼey ven a dzə̀ kinyo ke ru kí, a bó yòʼ dzə̀ kí bòʼtí ven. Bìʼ bey, m nén a tir ven ji vèn kú a yu a dzə̀ á fo fo, a suusín vèn à Jesus Kristu.

²⁸Wòn vem, vèn ku nèn a suusín vèn à Jesus Kristu bèy, wíy lóo dzə e ghan se wù wiyì, é la vèsən yòʼ a woomé, a tàʼ, e laáy, aá fan a dzə̀ fó yen wun.

²⁹Mo vèn kiìn ji Nyùy dzə̀ e juŋ, là jay, a dzə̀ vèn kìíy sá ji wìr wo wù yii vinyo və́ là jay dzə̀ á wan wun woo Nyùy.