Read Lamnso Atǎr Nsaʼ 1 Bible Online

Atǎr Nsaʼ 1 - Lamnso bible

Atǎr Nsaʼ 1

¹Joshua‑aà kpù, wír veé Israyi lò, e dù beè NYÙY TÀR, e dzə̀r jii, «Rám ye yí yíi tombìy dù fo věr mvəm, e fùnèn wír veé Kanane dzə̀ rəné?»

²NYÙY TÀR bìnèr jii, «A dzə̀ kù tòmbìy dù rám Juda. M wày ne nsay wìr veé Kanan aáwuné kiwo.»

³Wír veé ram Judàa nèn dù, e mbaà afə́r vév veé ram Simeon jii, «Kii vèn, vèn ku fò kiwó e vèr, é vèsən kóʼ, e fùnèn wír veé Kanan e nsay ye NYÙY TÀR‑iì foon ji yéer, é vèr yiì siìr kiwó, é vèsən kaáy, e fùnèn wír ve á dzə́ e nsay ye á foon ji yéen.» Áwune ku nèn làʼáy laʼayín, wùn áwune dú.

⁴Wír veé Judàa kóʼ, NYÙY TÀR wáy wír veé Kanan wùn à veé Perisi aáwuné wo, á laár wír nsə̀kì e ghvə̀m e Besek[1].

⁵Áwune‑eè mèé é Besek, e yèn Adoni‑Besek fo, wùn áwune tám, á gháʼ wun, e nèn tòn wír veé Kanan wùn à veé Perisi.

⁶Adoni‑Besek shóʼ kinyeŋ, á jùm, e koò, e shètì viyìy vé wo wùn à vé wuù ví.

⁷Adoni‑Besek nèn lò, a toyrí jii, «Mò‑oò yòŋ, á shétí viyìy vé wo wùn à viyìy vé wuù vé afòn msaàmbà, á wáa dzə, a siy kfə́ʼ se viyikìr fo mǒ sar kidàŋ. Á bèy, ké lèn ki, Nyùy siìr ne ŋkfə́tír e mò.» Adoni‑Besek yòŋ bèy, á ku nèn lì wun, e dù sho e Jerusalem, wù kpú fó.

⁸Wír vee rám Judàa‑aà fùnèn veé Jerusalem, e tòn áwune, e faàsì nsay yev. Vé‑eè yùyrí wír veé Jerusalem, e tòn ŋkàlaʼ yev e və́yí.

⁹Kee shooy ki shaà, wír veé Judàa nèn a kìʼ mbìv wòŋ yee tsə́n e rə́r sí, a fùnèn wír veé Kanan ve vé‑eè dzə́ e mbìv agwan, a fùnèn ve vé‑eè dzə́ e sar gwan, à ve vé‑eè dzə́ e mbìv wòʼ yee Negevi.

¹⁰Áwune‑eè nyoòrì wír veé Kanan ve vé‑eè dzə́ e Hebron[2], a vé‑eè yoŋ ŋkàlaʼ rə̀n fo ghan ji Kiriat‑Arba. Á tón fó, e yùyrí rám Anak, a yí dzə̀ e taár jii, Sheshay wùn à Ahiman, à Talmay.

¹¹Áwune lò fo fo, e ghìʼ wír veé Debir, a vé‑eè yoŋ Debir fo mbìy ji Kiriat‑Sefer.

¹²Kalev lò, e sùúy jii, «Wìr wo wù fùnèn ŋkàlaʼ yee Kiriat‑Sefer rə̀n, e sə̀, bo m fó wán wom woo Aksa sho ji wíiy və.»

¹³Á bèy, Otniel woo bám Kalev nèn fùnèn, e sə̀. Kalev fó wán və woo Aksa sho ji wiíy, a yír tàr à Otnieli‑iì dzə̀ ji Kenas.

¹⁴Mo Aksa duùn e lum və́ lav, e kù nèn lìʼtì lúm və líʼtin ji wù du, e lòn á kirə́ʼ fo tàr à wun woo Aksa. Nen kfə̀n lò wun woo Aksa, e dù.[3] Wù dù, e lòo səʼə́y fo kitu ke kimbèʼbìy, kitàr kí dzə́r shó jii, «À taʼ ji m yée le e wò?»

¹⁵Wù bìnèr jii, «Kii wò, ku nə̀ʼsín mo, e fò mo ntòŋ sé ndzəv mo à tsənsin ne mo a dzə̀ é kirə̀ʼ ke yumér kí.» Á bèy, Kalev nèn fò wun ntòŋ sé ndzəv sé kùy si wùn à sé tsən sí.

¹⁶Yì‑iì dzə̀ é ghan se wír vee rám Judàa‑aà kóʼ fo Jeriko a yì‑iì dzə̀ ŋkàlaʼ tèn sí, wír veé Kene wìy wùn áwune, aá dzə̀ kév rám tàr à wiiy Mooser. Á wìy bèy, e nèn dù, e dzə̀ʼə̀m e kirə̀ʼ ké woʼ kí ke kí‑iì dzəə̀n é nsay rám Juda fo mbìv yee tsə́n, e ghaa ŋkàlaʼ yee Arad, e kù nèn a dzə wùn à wír vee fóo.

¹⁷Á bèy, wír vee rám Juda wùn aàfə́r vév vee rám Simeone nèn dù, e ghìʼ wír veé Kanan ve vé‑eè dzə́ e Tsəfat, e tòn áwune, e laàr fó. Á nèn a yòŋ kirə́ʼ kin ji Horma[4].

¹⁸Wír vee rám Judàa tón[5] sá ŋkà se laʼ see Gasa, Ashkelon wùn à Ekron, e faàsì wùn à ntèʼ see fó ghaŋ si.

¹⁹NYÙY TÀR‑iì tòm wír veé Juda, á faàsì woŋ wo wú‑uù dzəə̀n áàgwan aàgwan, yii bèy, e làa yòʼ jùm wír ve vé‑eè dzəə̀n é kirə̀ʼ ké mboʼ ki, bìʼ fo áwune‑eè kér *viténtén vé rər vé kishà vi.

²⁰Á nèn fò Hebron e Kalev mo Mooser‑iì kàʼàn. Kalev nèn jùm rám Anak yee taár fo fo.

²¹Yii bèy, bó wír veé ram Benjamine yòʼ‑oò lo jùm wír veé Jebus ve vé‑eè dzə́ e Jerusalem. Wír veé Jebus vìne ku nèn gòʼ, a dzə wùn à wír vee rám Benjamine e Jerusalem, e wìy shem lán.

²²Wír vee kfə́ə Joosevi nèn lò sa kév, e kòʼ, e tsə̀ŋén rə́r wùn à wír veé Beteli, NYÙY TÀR wáa tom áwune.

²³Áwune tsə́nsí vé ŋkiyi é Betel, a vé‑eè yoŋ Betel fo mbìy ji Lus, NYÙY TÀR wáa tom áwune.

²⁴Vé ŋkiy vìyi lòo dù, e yèn wír, a wù fəə́ fo ŋkàlaʼ, áwune nèn a lon wun jii, «Kii wò, ku dìn ver dzə́ə ye yì nəə e ŋkàlaʼ, é vèr yiì nə̀ʼsín wò.»

²⁵Wìr və̀y ku nèn dìn dzə́ə ye yì nəə e ŋkàlaʼ aáwune. Á nəə́, e nèn yùyrí wir dzə̀m fo ŋkàlaʼ fèn, e kù màʼtì cáʼ a dzə̀ wír wo wù kì dìnèn dzə́ə ye yì nəə e ŋkàlaʼ wùn à kfə́ə rəə́.

²⁶Wìr və̀n siíy, e lò, e dù e wír veé Hití wòŋ, e bàʼrì ŋkàlaʼ fo, e nèn shù yír ji Lus. A kù sì yír ŋkàlaʼ yee shooy, e shem lán.

²⁷Wír vee rám Manassèe yòʼ‑oò lo jùm wír ve vé‑eè dzə́ e Bet‑Shean, à ve vé‑eè dzə́ e Taanak, à ve vé‑eè dzə́ e Dor, fə̀m veé Ibleyam, à veé ntèʼ se sí‑iì dzəə̀n aáwuné ghaŋ si, e lì veé Megiddo. Á bèy, wír veé Kanane ku nèn gòʼ, a dzə e nsay foo fèy.

²⁸Wáa dzə fo bàm, a woŋ Israyi tuúy ne, e tàv, áwune nèn lò, e kàn wír veé Kanan vìy ji á kú a lìm a lim se tavkín sí. Yii bèy, a bó wír veé Israyi yòʼ‑oò lo jùm áwune júmen mo yì‑iì dzə̀ á yiì.

²⁹Wír veé ram Efrayime yòʼ‑oò lo jùm wír veé Kanan ve vé‑eè dzə́ e Geser. Wír veé Kanane ku nèn a dzə wùn áwune é Geser.

³⁰Rám Sebulune yòʼ‑oò lo jùm wír ve vé‑eè dzə́ e Kitron, kìn ve vé‑eè dzə́ e Nahalol. Wír veé Kanane ku gòʼ wùn áwune, a lìm lim se tavkín se vé‑eè ghíʼ áwune shó.

³¹Rám Asheri yòʼ‑oò lo jùm wír ve vé‑eè dzə́ e Akko, à veé Sidone, à veé Alavi, à veé Aksivi, kìn veé Helba, à veé Afiki, e bóo lì veé Rehov.

³²Rám Asheri ku nèn a dzə wùn à wír veé Kanan vee aŋgàa nsayi, bìʼ fo á yòʼ‑oò lo fə̀ə́r áwune.

³³Wír vee rám Navtalìi yòʼ‑oò lo jùm wír ve vé‑eè dzə́ e Bet‑Shemesh, à ve vé‑eè dzə́ e Bet‑Anati. Á ku nèn gòʼ a dzə wùn à wír veé Kanan vee aŋgàa nsay vìyi. Yii bèy, rám Navtalìi ku yòʼ ghìʼ áwune, á wáa lìm lim se tavkín sí.

³⁴Ké rám Dan ki wáa dzə, a wír veé Amori tsə́y áwune, á kfə́n é bàm é wòŋ wo wú‑uù dzəə̀n agwan agwan. Bó wír veé Amori yòʼ‑oò lo biìmé ji áwune sə́y é kirə̀ʼ ké mboʼ ki.

³⁵Wír veé Amori‑iì wày wáyín ji áwune kù‑úù wáa dzə e Har‑Heres, a dzə e Ayjalon, e kfə̀n a dzə e Sha‑albim. Yii bèy, wáa dzə e ghan se kfə́ə Joosevi‑iì tuuyin ne, a ker vitaáví, á nèn kàn áwune, á gòʼ, a lìm lim se tavkín se vé‑eè ghíʼ áwune shó.

³⁶Ké bìíy wìr veé Amor, yì kù‑uù kèʼ fó bam Akrabbim, e shaà fo Sela, e kòʼ kóʼón.