Read Lamnso Atǎr Nsaʼ 11 Bible Online

Atǎr Nsaʼ 11 - Lamnso bible

Atǎr Nsaʼ 11

¹Jefta woo wír woó Gilead‑iì dzə̀ ntav, a wù yòʼ‑oò bin ndzə̀m e kifá ki. Tàr wov‑iì dzə̀ Gilead, a wù‑uù dzə̀ə́ wun e visàkì.

²Wiiy Gilead nèn wìy dzə̀ə́ sá wón vee vilum ámóʼó, á kúykír, e nèn jùm Jefta fo laʼ. Jum bèy, suuy sho jii, «Mo à dzəə̀n wan sàkì, bo yòʼ dzə̀ à yì vitsə́ʼ vé tàr wor.»

³Jefta nèn lèʼ fo afə́rí ghaŋ, e dù, a dzə e nsay Tov. Wír ve á kér liì kisaŋe wáa kaarí e ghaŋ wo, wùn áwune wáa nəə́ rə́r é virə̀ʼ.

⁴Wáa dzə e ghan see shooy, a kù dzə̀ ghán se wír veé Ammone nəə wír veé Isray e rə́r sí.

⁵Vilìmbìy veé Gilead vi nèn lò, e dù ji á li Jefta fo nsay Tov.

⁶Á dù, e sùúy e Jefta jii, «Wìyi, a dzə kilìmbìy kér, é vèsən maʼ wír veé Ammon e rə́r sí.»

⁷Jefta bìnèr aáwune jii, «Bó vèn yòʼ‑oò lo bàn mo, e jùm fo tàr wór laʼ à? Ŋgeʼ si nə̀ə́ ven, vèn wáa wìy, e yen mo é gha lèn?»

⁸Á bìnèr sho jii, «Vèr wiy, e yen wò, bìʼ fo vèr kér shii wò. Aà lòo dzə, e wìy, e shèm mbìy, vèsən maʼ wír veé Ammon e rə́r sí, bo vèr lo, e lèm wò ji taà saʼ, áà wáa saʼ wír veé Gilead adzə̀m.»

⁹Jefta nèn bìnèr e vilìmbìy veé Gilead vi jii, «A vèsən dù, e màʼ wír veé Ammon e rə́r sí, Nyùy yii, m ton áwune, vèn kù yòʼ lèm rú mo ji taà saʼ won á?»

¹⁰Vilìmbìy veé Gilead vi bìnèr sho jii, «Vèr yíi yiì mo à suuyin, a NYÙY TÀR yíi a tiy vinjen.»

¹¹Jefta wùn à vilìmbìy veé Gilead vi nèn dù, á nèn lèm wun ji kilìmbìy kév, wù wáa wam vé rərí. Jefta nèn rùvtí jí sìn sidzə̀m e Mispa, a dzə̀ e NYÙY TǍR si.

¹²Jefta ló fó fo, e nèn tsə̀nsí vé ntume ji á ku dù, e dzə̀r e fòn woó Ammon a jii, «Wùn wun sà kér ka, é bo wù wáa nəə́ rə́r e wun nsay a?»

¹³Fòn wìr veé Ammon nèn dù, e bìnèr e vé ntum Jeftàa jii, «Ven veé Israyi‑iì lòo fəə fo Ejiv, e sə̀ nsay yem, e kèʼ fo ndzəv yee Arnon, a koʼ e ndzəv yee Jordan, e dù, e mèé e yeé Jabbok. Ké lèn ki, vèn siir ri e jì yee weè.»

¹⁴Jefta nèn kfə̀n siìr vé ntum vìy fo fòn woó Ammon wùn.

¹⁵Á dù, e tiìsí sho ji Jefta suuy a jii, «Bó wír veé Israyi yòʼ‑oò lo sə̀ nsay wìr veé Moav, kìn ye wìr veé Ammon.

¹⁶Ke kí‑iì dzəə̀n kí dzə̀ jii, wír veé Israyi‑iì lò fó Ejiv, e tòsín wóʼ, e dù, e bàʼ e Rìbà Ndzə̀v wo Baar[26], e nèn bìn, e wìy e Kadesh.

¹⁷Mo á wìyìn, e nèn tsə̀nsí vé ntume fo fòn woó Edom wùn ji wù ku màʼtì, aáwune shaa á fo wun nsay. Á tiísí, la fòn woó Edom yòʼ yuùrí. Á kfən tùm ámóʼó fo fòn woó Moav wùn, wù ku dù, e shàʼnín shaʼnín. Wír veé Israyi nèn gòʼ e Kadesh.

¹⁸Fo bàm, áwune nèn dù dzə́ə fó woʼ, e dù, a ghan, a gwàm nsay Edom wùn à yeé Moav gwámen. Á meé é bìíy Moav, e nèn a gwaàmè e mbìv ye shùy yii tó fo fo, e dù, e dzə̀ʼə̀m e ŋguùŋè ndzə̀v yeé Arnon yeé mbìv fésə. Bó áwune yòʼ‑oò lo làʼ kiwuú kév é nsay Moav, bìʼ fo Arnon‑eè dzə̀ bìíy wòŋ woo Moav.

¹⁹Wír veé Israyi nèn tsə̀nsí vé ntume fo Fòn Sihon wùn, Fòn Sihon woo fon wìr veé Amor wo wù‑uù dzə́ e Heshbon. Ntum rə̀n‑eè dzə̀ ji wù ku màʼtì, aá shaa dzə́ə fo wun nsay, e dù aáwuné wòŋ.

²⁰Fòn Sihon yòʼ‑oò lo biìmé feyì ji wír veé Israyi shaa fo wun nsay. Á bèy, wù nèn fə̀ə́r a dzə̀ vé rər və́, á dù, e bàʼtí e Jahas, e nèn a tsəŋén a dzə̀ rə́r wùn à wír veé Israyi.

²¹NYÙY TÀR woo Nyùy wìr veé Isray nèn wày Fòn Sihon wùn à wír vəə́ e wír veé Israyí wo, á tón áwune. Wír veé Israyi ku nèn sə̀ nsay wìr veé Amor ye vé‑eè dzə́ sho e wòŋ foo fèy, e sə̀ e dzə̀m.

²²Áwune‑eè sə̀ virə́ʼ ve wír veé Amori‑iì kérí vidzə̀m, e kèʼ fo ndzəv yee Arnon, e dù, e meé e ndzəv yee Jabbok, e nèn kfə̀n kèʼ fo woʼ, e dù, e bàʼ e ndzəv yee Jordan.

²³Yì‑iì jùm wun woo NYÙY TÀR woo Nyùy wìr veé Isray wír veé Amor fo nsay fèy, e fò e wír və́ veé Israyi. Á bèy, Sihon, a dzə̀ wò, à fə̀ə́r áwune fó fo lèn e le?

²⁴À yòʼ‑óò wáa ker kifá ke nyùy wò woo *Kemosh[27] foon e wò à? Fo kér kí, vèr yòv ne nsay wìr ve NYÙY TÀR woo Nyùy wor faàsìn, e fò e vèr.

²⁵À kwaʼtì ji à kér kilíŋ, e shaà Balak woo wan Tsippor woo fon woó Moav à? Wù‑uù ló a wìy e nsaʼ ji wùn à wír veé Israyi wáa taŋ nsay a? Wù‑uù lo ghàn fəə̀ rə́r féyì wùn áwune á?

²⁶Sì kiyá ghii taár mo wír veé Israyi dzə̀ʼə̀mèn é Heshbon, ámóʼó wáa dzə e Aror, aámóʼó dzə́ e ŋkà se laʼ seé ŋguùŋè ndzə̀v yee Arnon, e bóo lì ntèʼ see fó ghaŋ. Yì‑iì ghàʼ ka fo vèn sə́ virə́ʼ vee shooy e bàm é ghan fóo fèy?

²⁷Bó m yoʼ jày kinyo e wò. Jày wò e mò, bìʼ fo à maʼ rə́r wòsò. Ku màʼtì, é NYÙY TÀR wo kù yii tar wun kinyo, tar kesò lán, e yèn ó ji sà jày wír veé Isray moo wír veé Ammon a.»

²⁸Ŋgaà ntum tiísí bey, la fòn woó Ammon yòʼ a ker ghán é kinyò ke Jefta‑aà suuyì.

²⁹Kù é ghan see shooy, Kiyoy ke Nyùy ki wìy, e bànrí Jefta, wùn à vé rər vəə́ ŋáʼáy, a shaà e mvə̀m wòŋ Gilead wùn Manasse, e dù e Mispa e nsay Gilead foo fèy, e bóo dù, e ghiʼ wír veé Ammon.

³⁰Á bèy, Jefta nèn yiì kilìʼ e NYÙY TÀR, e sùúy jii, «Aà yiì wày wír veé Ammon e mǒ kiwo,

³¹m wáa yòv mbeeteé, a wìy fo kwaʼ rər, bo wìr wo wù tombìy fəə fo mǒ lav ji vèr wun tárnín, kìn dzə̀ vəné, bo kù sì kifá ke NYÙY TÀR ke m yíi yiì cu ye tonèné shó.»

³²Jefta nèn tùmsín, e màʼ rə́r wùn à wír veé Ammone, NYÙY TÀR wáy áwune e wun kiwo.

³³Wù‑uù tòn áwune, e kèʼ fo Aror, e dù meé e Minnit, a ŋkà se laʼ si‑iì dzə̀ fó mbaà, e kfə̀n dù bèn, e dù meé e Abel‑Keramim. Vé‑eè yùyrí wíri é mfòn. Wír veé Israyi yiì, vitaáví vé wìr veé Ammon vi wèʼ.

³⁴Mo Jefta loòn, a kfən fo laʼ e Mispa, rúrú, wìr wo wù‑uù fəən ji wù səə́sí wun kù‑uù jòʼsì màyshó wan və woo wiíy wo wù‑uù kum nshùm, dzə́n, wiyì. Jefta yòʼ kfə̀n‑eè kér wán wùmòʼ, à woo wiíy, à woo lumèn, e shaà woo shooy.

³⁵Mo wù yenen wán və̀n, e nèn saàsì ndzə̀y sə́, a toŋ jii, «Óò wan wòm, à kèr ne tím yém. Kí ghàn é le, é bo lo wò, e yiì ji m wáa yu nyár. Mò‑oò yiì ne kilìʼ vèr NYÙY TÀR, a bó yòʼ dzə̀ m dzəə kòr.»

³⁶Wàn bìnèr jii, «Tàr wor, aà kì yiì ne kilìʼ vèn NYÙY TÀR, à yiì e mò mo à kì kàʼàn, bìʼ fo NYÙY TÀR wayin ne aŋgaà vé vibàn vee wír veé Ammon e wò kiwo.»

³⁷Yii bèy, wàn kfən sùúy jii, «Kinyo ki dzə̀ kimòʼón ke m lón fo wò. Ku fò mo ŋwee e baà, é m ghánén áàgwan, e dìy vèr à ŋkar sém sí, bìʼ fo m sí yiì a kpu, a m yoʼ kìíy lumèn.»

³⁸Jefta nèn biìmé jii, «Á dù rì», e nèn màʼtì wun, wù dú, wùn à ŋkar sə́ sí wáa ghan, a dìy aàgwan ŋwee e baà, bìʼ fo wù yòʼ dzəə́ wìy kiíy lumèn.

³⁹Ŋwee woo bàá shaà, wù kfə́n fo kitàr kí wùn, Jefta ku nèn yiì e wun mo wù‑uù lìʼìn. Wàn ku nèn kpù, a wù yoʼ kìíy lumèn. Kinyo kìn ki nèn kfə̀n ji liì wòŋ Isray woo jii,

⁴⁰yii lóo dzə e kitu ke kiya kidzə̀m, wón vee vikìy veé Israyi wàa koʼ aàgwan, a dìy wan Jefta woo wír woó Gilead vishiíy vikweè.