Read Lamnso Atǎr Nsaʼ 12 Bible Online

Atǎr Nsaʼ 12 - Lamnso bible

Atǎr Nsaʼ 12

¹Wír veé ram Efrayime nèn lò kév, e bàʼtí a dzə̀ rə́r, e lìysín ndzə́v yee Jordan, e dù, e yèn Jefta e Tsafon, a yòŋ e wun jii, «Yìiy, òó mbaà, à dú ben, e nə̀ə́ wír veé Ammon e rə́r sí, e làa yòʼ jàŋ ver é vèsən du a? Vèr yíi tòn lav e wò kitu.»

²Jefta bìnèr, e sùúy aáwune jii, «Vèr à wír vémé‑eè dzə̀ féyì, a vèr kér kinyam vèr à wír veé Ammone, a kí‑iì tàv é ŋàŋ. M jàŋ ven, yii bèy, la vèn yòʼ sə̀ mo fo áwuné wo.

³Mo mò‑oò yenen ji bó yòʼ dzə̀ vèn sə̀ mo, m nén a tùr kitú kém, e nèn lìysín, a màʼ rə́r vèr à wír veé Ammone. NYÙY TÀR nen wày áwune e mǒ kiwo. Vèn wáa wìy kén a dzə̀ lèn ji vèn wáa màʼ rə́r vèsən bìʼ ka?»

⁴Jefta nèn bàʼtí wír veé Gilead adzə̀m, wùn áwune nəə́ wír veé Efrayim e rə́r sí. Vé‑eè màʼ rə́r sin, e tòn wír veé Efrayim bìʼ jí ye áwune‑eè shweerin ji wír veé Gileadi dzə̀ á wír ve á leʼen rə́r, e bóo wìy a dzə e ŋguùŋè Efrayim wùn Manasse.

⁵Móo sə̀r wír veé Efrayim fo woo mòʼón léʼ, wír veé Gileadi nèn tèʼ tuúmé sé ndzəv seé Jordan se sí líysin e nsay Efrayim sidzə̀m. Wìr woó Efrayim túmnin ji wù léʼé, wíy baʼ e shùu tuumé, wír veé Gileadi dzə̀r shó jii, «À dzə̀ wír woó Efrayim à?» Wù binsìnè,

⁶á nèn yòŋ sho jii, «Yòŋ ó ji Shibbolet.» Wù nèn yòŋ kfə́ ji Sibbolet[28], bìʼ fo bó yòʼ dzə̀ kiláyláy kfə́ kí yòŋ réŋ. Á bèy, á nèn kù bàm wun, e seè é tuumé Jordan. Vé‑eè neèr wír veé Efrayim wír nsə̀kì nshòv sibaà e mkweè.

⁷Jefta‑aà sàʼ wír veé Isray ji tàr nsaʼ[29] kiyá ntuùfú, e wìy kpù, á dzəə̀mè wun aáwuné ŋkàlaʼ yeé Gilead.[30]

⁸Jefta‑aà kpù, Ibsan woo wír woó Betlehem[31] nèn a dzə tàr nsaʼ woó Isray.

⁹Wù‑uù kér wón vee vilum mtaár, kér vee vikìy ve wù‑uù yunrin fó vitum ve sən ví mtaár. Wù kfə̀n‑eè kér sa wón vee vikìy ámóʼó mtaár ve wù‑uù tàʼàn fó vitum vímóʼ ví ji vikǐy won. Wúnwun‑eè sàʼ wír veé Isray ji tàr nsaʼ kiyá saàmbà.

¹⁰Á bèy, Ibsan kpú, á dzəə̀mè wun e Betlehem.

¹¹Mo Ibsan kpuun, Elon woo wír woó ram Sebulun nèn a dzə tàr nsaʼ wìr veé Isray. Wù‑uù sàʼ kiyá e ghvə̀m,

¹²e nèn kpù, á dzəə̀mè wun e Ayjalon e nsay yeé ram Sebulun.

¹³Mo Elon kpuun, Abdon woo wan Hillel woo wír woó Piraton nèn a dzə tàr nsaʼ wìr veé Isray.

¹⁴Wù‑uù kér wón vee vilum mkweè, kfə̀n kér wón won vee vilum mtaár, aáwune vee wír msaàmbà adzə̀me kù dzə̀ ve vé‑eè kóʼ vimbèʼbìy. Wù sáʼ ji tàr nsaʼ wìr veé Isray kiyá waamé.

¹⁵Á bèy, Abdon woo wan Hillel woo wír woó Piraton nèn kpù, á dzəə̀mè wun e Piraton e nsay yeé ram Efrayim e wòŋ agwan woó Amalek.