Read Lamnso Atǎr Nsaʼ 13 Bible Online

Atǎr Nsaʼ 13 - Lamnso bible

Atǎr Nsaʼ 13

¹Wír veé Israyi kfən lò, a yiì vinyo ve bi ví, a tinsín NYÙY TÀR, wù nèn wày áwune e wír veé Filistiàá sar, á sáʼ áwune kiyá mkweè.

²Wìr wùmòʼ wáa dzə e ghan fóo fèy, aá yoŋ yír rə́ ji Manoa. Wù‑uù dzə̀ wír woó ram Dan, a wù‑uù dzə́ e ntèʼ yee Tsora, a wiiy və‑əə̀ dzə̀ kár.

³Nshìylav NYÙY TÀR lò, e wìy, e yèn wíiy və, e sùúy sho jii, «Rúrú, à dzə̀ kár, yii bèy, aà yíi tiím bvəm, e dzəə́ wán lumèn.

⁴Kí nén a dzə jii, á yen fóo no meluʼ, kìn kifá ke tavín kímóʼ kí, e kfə̀n a yen fóo yi kifá ke nsər yòŋèn ji kí kér *kifàn.

⁵Kí dzə̀ jii, à yíi tiím bvəm, e dzəə́ wán lumèn. Á yen fóo wìy kom kitú ke wan və̀n, bìʼ fo Nyùy‑iì shoʼon ne, é bo á wìy a dzəə́ ji woo jeéy ji wir Nasir[32]. Kù wíy kèʼ wun, a bòyìr wír veé Isray fo veé Filistiàá wo.»

⁶Wiiy Manoa nèn wìy, e sùúy e lum və jii, «Wìr Nyùy wùmòʼ kì wìy, e yèn mo, a wù shwínin nshìylav Nyùy, a dzə̀ wír, a wù beéme feyì. M yoʼ lò dzə̀r fo wù loòn, a wúnwun yoʼ lò yòŋ yír rə́ e mò.

⁷Wìr woo shooy kì sùúy e mò jii, ‹M yíi tiím a bvəm, e dzəə́ wán lumèn. Wù kfə́n a shìvìr ji m wáa yen a fóo no meluʼ, kìn kifá ke tavín kímóʼ kí, e kfə̀n a yen a fóo yi kifá ke nsər yòŋèn ji ke kí kér kifàn. Wù kì sùúy ji lá m yòʼ mùm a, bìʼ fo wan wo m yíi dzəə́, dzə̀ á wo Nyùy shoʼon ji woo jeéy ji wir Nasir, a wù kù sì bey, e kèʼ fo bvə̀m, e dù meé mo wù wíy kpu.› »

⁸Manoa nèn a lon NYÙY TÀR, a suúy jii, «Éè NYÙY TÀR, m lón ji à kfən tsə̀nsí ŋgaà ntum və̀y, é wù wiy, e yèʼéy ver kinyo ke a dzə̀ vèr yiì e wàn wo vèr yíi koóy və̀n.»

⁹Nyùy yú bunrì Manoa, e nèn kfə̀n tsə̀nsí nshìylav rə rə̀y, yì wìy, e yèn wíiy və, a wù dzə́ e sum, a bó wúnwun Manoa kitú kfə́ yòʼ dzə̀.

¹⁰Wiíy shóʼ kileʼ, e dù, e yèn lúm və, e sùúy sho jii, «À bèé, wìr wo wù‑uù wìyìn, e yèn mo é kishiíy kiy və̀y kfə̀n wìy ne, e yèn mo lèn.»

¹¹Manoa túmnín, a jùmrì wíiy və. Wù mày fo wìr və̀y wùn, e dzə̀r shó jii, «Yì‑iì sùúy wò kinyo e wiiy wom a?» Wù bínsí jii, «Dzə̀ mo féyì feyì.»

¹²Manoa dzə́r shó jii, «Kinyo ke à suuyin kin ki yíi fəə ji ke ru kí, bo dzəʼə̀m wan və̀ne wíy a dzə e le, a wù wíy a lìm a dzə̀ ka?»

¹³Nshìylav NYÙY TÀR bìnèr e Manoa jii, «Fo mvə̀m vinyò ve m suuyin e wiiy wò, lá wù yòʼ yiì kilélé e kímóʼ kí.

¹⁴Wù wáa yen fó kfər kifá ke kí loòn fó kitiír ké *vayin ke á yii fer meluʼ e báŋ sə́ sí, a yen fó no meluʼ me á fer sho, kìn ji wù nó kifá ke tavín kímóʼ kí, a yen fó yi kifá ke nsər yòŋèn ji kí kér kifàn.»

¹⁵Manoa suúy e nshìylav NYÙY TÀR jii, «Ku màʼtì, é vèr səə́r wò, e nàá wan bvəy, áà kfə́r.»

¹⁶Nshìylav NYÙY TÀR bìnèr jii, «Mo‑óò goʼ, yii bèy, a m yòʼ yíi yi kifá. Wáa dzə, aà báʼtí a dzə̀ cu ye tonèné, à kù fò e NYÙY TÀR.» A Manoa yoŋ bèy, a wù yòʼ‑oò kì ji dzə̀ á nshìylav NYÙY TÀR.

¹⁷Manoa dzə́r e nshìylav NYÙY TÀR jii, «Yír yée dzə̀ la, é vèr fíʼ yiì a ghvəm wò e ghan se kinyo ke à suuyin kí yíi gheén.»

¹⁸Nshìylav NYÙY TÀR bìnèr sho jii, «À dzə́r yír yém bìʼ ka? Dzə̀ yír, a yí dzə̀ e ghaʼán, a bó yòʼ dzə̀ à kìíy.»

¹⁹Manoa nèn lì wan bvəy, à cú vifa ve yii, e cù NYÙY TÀR shó e kitu ke kilan. Nyùy nèn kù yiì kiŋgaʼnìn ke kinyò, a Manoa wùn wiíy dzə́, yéné.

²⁰Kí nèn kòóy jii, e ghan se kiliímé ke və̀y kí‑ii líy fo kiy cù, kóʼ e yuv, a Manoa wùn wiíy tíy leeyì, nshìylav NYÙY TÀR nèn kù ŋàʼáy, a koʼ e yuv, e mvə̀m kiliìmé ke və̀y. Áwune yén bey, e nèn gbù fo nsay, e tsə̀m sí e nsay.

²¹Mo kí kooyin bey, la nshìylav NYÙY TÀR yòʼ dzəə dìn kitú kfə́ aáwune. Á bèy, Manoa ku nèn kìíy ji wìr və̀y kì dzə̀ á nshìylav NYÙY TÀR.

²²Manoa nèn sùúy e wiiy və jii, «Yímóy, wòsò kù yíi kpu, bìʼ fo wòsò yenen ne Nyùy.»

²³Wiiy və bìnèr e wun jii, «A NYÙY TÀR kì koŋ ji wun yúyrí wòsò, bo bó wù yoʼ lò biìmé cu ye tonèné wùn à yé vifa ve yi ye wòsò kì cuùn wun sho. Bo bó wù yoʼ lò dìn vinyo vìn vidzə̀m e wòsò, a bó yòʼ kì dzə̀ wù kfə̀n fèr kfə́ə vinyò vee ben e wòsò lán.»

²⁴Á bèy, wiiy Manoa nèn wìy dzə̀ə́ wán lumèn, e shù yír ji Samson. NYÙY TÀR wáa leéy fo fo, wù wáa kuy.

²⁵Wù nèn kù a dzə e Mahane Dan wo wù‑uù dzəə̀n é kintìntìn ke mvə̀mlaʼ yee Tsora wùn Eshtaol, Kiyoy ke NYÙY TÀR kí wáa tiy e wun kitu, e kèʼ, a banrí wun.