Read Lamnso Atǎr Nsaʼ 14 Bible Online

Atǎr Nsaʼ 14 - Lamnso bible

Atǎr Nsaʼ 14

¹Samson wìy lò e kishiíy kímóʼ kí, e sə̀y é Timnaa, e dù, e yèn wánlè ŋgòn woo wan wìr Filistia wùmòʼ fó.

²Wù nèn kfə̀n é bàm fó laʼ, e mbaà tàr wov wùn yè wov jii, «M yèn ne wiíy, a dzə̀ wan wìr Filistia, a wù dzə́ e Timnaa, vèn du, e tàʼ ji wíiy wom.»

³Tàr wov wùn yè wov dzə́r shó jii, «À kì du, a tàʼ wiíy fo wír veé Filistia ve á méŋ Nyùyí mvəm ji ka? Bó yòʼ kì dzə̀ à tàʼ wiíy fo vèsə́n ram a, fə̀m fo wír vesəné mvəm a?» Yii bèy, Samson bìnèr e tàr wov jii, «Ku tàʼ, e fò e mò, wù ghèén mo féyì.»

⁴Wù yòŋ bèy, la tàr wov wùn yè wov yòʼ kìíy ji kì danèr a NYÙY TÀR wun. A NYÙY TÀR‑iì taʼ a dzə̀ kintóʼ kée shaà sho, e bóo màʼ wír veé Filistia. Yì‑iì dzə̀ é ghan see shooy, a wír veé Israyi sə́ sáʼ a dzə̀ fo wír veé Filistiàa.

⁵Samson wùn à tàr wov, à yè wov nèn lò, e ŋàʼáy, a səy e Timnaa, e lòo meé fo, a shaà e ghaa sum sé vitiír vé *vayin, Samson lòo sìn, e yèn wan bvərə̀ʼ, a wù nyamkìr, wiy e wun wùn.

⁶Kiyoy ke NYÙY TÀR kí wìy, e wày vitaáví e wun wùn é dzəə ye tavín, wù sàr bvərə̀ʼ mo wìr sàr wan bvəy, a wù yòʼ fə̀m kér kifá kímóʼ kí e wun kiwo. Yii bèy, bó wù yòʼ‑oò lo sùúy kinyo ke kí‑iì kooyin e tàr wov wùn yè wov.

⁷Samson nèn sə̀y, e sùŋnín wùn wiíy woo shooy. Wù dù, e yiì kinyo kí gheén wun feyì.

⁸Vishiíy ví lòo shaà, Samson nèn a kfən e bàm é Timnaa ji wun yii á vijín. Wù lòo dù, e bìn ji wun leéy á dzə́n bvərə̀ʼ rəy, e nèn yèn, a yúu sí shoó ne sho, e fèr vilu.

⁹Wù nèn tsə̀nsí kiwó, e bèʼ gham yímóʼó, e nèn a dù, a la. Wù dù, e yèn tàr wov wùn yè wov, e fò vímóʼ ví aáwune, áwune lá sá. Yii bèy, wù yòʼ‑oò lo sùúy aáwune ji wun kì yì vilu vee shooy a dzə̀ á fo dzə́n bvərə̀ʼ.

¹⁰Tàr à Samson dù aà wiíy laʼ, Samson nèn yiì ŋkǎʼ vijin fó réŋréŋ mo wánlè nsùm yii nəə wiíy, wù yiì.

¹¹Mo wír veé Filistiàa yenen Samson, e nèn fò wónlě nsùm mtaár ji á wáa dzə wùn áwune.

¹²Samson nèn lò, e sùúy aáwune jii, «Mo‑óò maʼ shitìítiy, a vèn lòo dzə, e shù e mvə̀m vishìíy vé vijin vee saàmbà, bo m yíi fo ven kitú ke ndzə̀y mtaár se á fèrìn e làv wo fəvír woo fèm, à kitú ke ndzə̀y símóʼ sí é kitu wo mtaár.

¹³Yii bèy, shí gháʼ fo vèn shu, bo vèn yíi fo mo kitú ke ndzə̀y se á fèrìn e làv wo fəvír woo fèm mtaár, à ndzə̀y símóʼ sí é kitu wo mtaár.» Áwune nèn sùúy sho jii, «Màʼ ri shitìítiy shé shi, é vèr yú.»

¹⁴Wù nen sùúy aáwune jii, «Kifá ke yi ki kù lo, a dzə̀ fo wìr wo wù yí, a ke kí nyom ki kù fəə́ a dzə̀ fo ntav.» Kí nén a dù vishiíy vitaár, aáwune yóʼ ne kìíy nshù.

¹⁵Kishiíy kee kweè[33] ki gheén, áwune nèn sùúy e wiiy Samson jii, «Ku lèvtí lum wò, é wù suúy nsàv shitìítiy shìn e wò, áà suúy e vèr. Kí búŋ fó bèy, bo vèr‑íì ton wò, à lav tàr won. Vèn kì jaŋ ver ji vèr wiy, é vèn shwiv ver a?»

¹⁶Wiiy Samson lì tóŋ e shuù, e dù, e yòŋ sho jii, «À dzə̀ ben, aà ban mo, bó à yòʼ koŋ mo gheéy. À màʼ ne shitìítiy ji wír vérí shu, yii bèy, aà yoʼ naàrì nsàv e mò.» Samson bìnèr sho jii, «A dzə̀ kinyo, a bó m yoʼ naàrì e tàr wor wùn yè wor, m wìy, a naàrì e wò à?»

¹⁷Wù nèn kù a toŋ e Samson ghaŋ vishiíy vé ŋkàʼ viy vidzə̀m. Kí meé e kee saàmbà ke ŋkàʼá‑aà yíi mày ki, Samson nèn fèr shitìítiy shìy e wiiy və, bìʼ fo wù‑uù yiìn ne njèʼèr e wun e ŋàŋ. Á bèy, wiíy nèn dù, e fèr e wír vəə́ mo á yii shu shitìítiy shìy.

¹⁸Wáa dzə, é bo shùy yiì a nəə́ e kishiíy kee saàmbà kee shooy, vilum veé ŋkàlaʼ fèyi suúy e Samson jii, «Kifá ke kí nyòmèn, e shaà vilu ki dzə̀ ka, a ke kí tavin, e shaà bvərə̀ʼ kí dzə̀ ka?» Samson bìnèr jii, «A là fo vèn kì shèvìn súm, a dzə̀ e nàʼ wom, bo bó vèn yoʼ lò kìíy móo shù shitìítiy shém.»

¹⁹Kiyoy ke NYÙY TÀR kí wìy, e wày vitaáví e wun wùn é dzəə ye tavín, wù sə́y é Ashkelon, e yùyrí vilum mtaár, e lì vifá ve wìr vee shooy, e nèn fò ndzə̀y e wír ve vé‑eè shuùn shitìítiyi. Wù nèn kfə̀n é bàm e tàr wóv laʼ, a dòʼshwiíy sí kív wun kivín.

²⁰Á nèn lì wiiy Samson, e fò e ŋgaà və ŋgoo wo yì‑iì dzəə̀n ŋkar rə tìm e kirə̀ʼ ké vijin.