Read Lamnso Atǎr Nsaʼ 15 Bible Online

Atǎr Nsaʼ 15 - Lamnso bible

Atǎr Nsaʼ 15

¹Shintàm shi lòo koʼtí, aá sí tín saár, Samson lì wan bvəy ji wun du, e ghan a wiíy və shó. Wù meé fó, e sùúy e tàr à wiíy jii, «Mo‑óò nəə́, e shìíy vèr wiiy wom.» Yii bèy, tàr à wiíy sháʼnín fo wù nəə́,

²e sùúy e Samson jii, «Ké ru kí, m kì yén kém ji à sí ban wun bánen, m nen fò wun e ŋkar yè tìm. Bó bám rəə́ yoʼ tò sí, e shaà wun à? Ku lì woo shooy.»

³Samson bìnèr jii, «Ké lèn ki, wìr yòʼ yíi a bashí mo é kinyò ke m yíi yiì e wír veé Filistiàa.»

⁴Wù nèn dù, e koò akoosàʼ ghii taár, e tàtí kún sí, e kùr áwune abaà abaà, e nèn lì vikaʼày, e kùr é kùn sí wó,

⁵e wàyrí və́y é vikàʼày ve wù‑uù kurin viy, e nèn tsə̀nsí akoosàʼ vìy e wír veé Filistiàá sum sí. Və́yí nen tòn saár ye vé‑eè tíné, à ye yí‑iì dzəə́ tíy e yuví, e kfə̀n tòn sa súm sé vitiír vé vayin, à sé vici vé *oliv si.

⁶Wír veé Filistiàa nèn dzə̀r jii, «Mùm la kfə́ə kinyò kee ben?» Á bìnèr jii, «Mùm Samson woo sə́ wìr woó Timnaa, bìʼ fo ŋgaàŋ səən wíiy və, e fò e ŋkar rə tìm.» Wír veé Filistiàa nèn kòʼ fó, e tòn wiíy və̀y wùn tàr wov, e yùyrí.

⁷Samson suúy aáwune jii, «Bó yòʼ dzə̀ m yiì màʼtì, a bó m siír ŋkfə́tír e věn kitu.»

⁸Wù suúy bey, e nèn gwàtì áwune, e yùyrí anín, e nèn sə̀y, a dzə e mbvə̀ʼ ye yì dzəə̀n é vilála veé Etam.

⁹Wír veé Filistiàa wíy, e bàʼtí e nsay wìr veé ram Juda, e gìm ŋkàlaʼ yee Lehi e rə́r sí.

¹⁰Wír veé Judàa dzə́r aáwune jii, «Vèn wìy, e ghìʼ ver e rə́r sí ji ka?» Áwune bìnèr jii, «Vèr wìy ji vèr koó Samson, e siìr kinyo ke wù‑uù yiìn e vèr.»

¹¹Wír veé Judàa nèn lò ansə̀kì ataár, e sə̀y é mbvə̀ʼ ye yì dzəə̀n é vilála veé Etam, e dzə̀r e Samson jii, «Bó à yòʼ kì ji sáʼ wír veé Filistia ver a? À yiì kin e vèr a dzə̀ ka?» Wù bìnèr aáwune jii, «M siìr a dzə̀ kinyo ke áwune‑eè yiìn e mò.»

¹²Áwune bìnèr e Samson jii, «Vèr wìy bèn ji á koó á wò, e kùr, e fò e wír veé Filistiàa.» Samson suúy aáwune jii, «Vèn liʼ ó ji ven kitú kén, vèn yòʼ yíi yuyrí mo.»

¹³Áwune bìnèr sho jii, «Vèr kù lo, e kur wò kúrín, e fo e wír veé Filistiàa. Rúrú, vèr yòʼ yíi yuyrí wò.» Á bèy, áwune nèn kùr wun aàkfəə̀ ve fíyi abaà, e nèn lì, e fəə̀ shó fo vilála fey.

¹⁴Wùn à Samson wìy, e mèé e Lehi, wír veé Filistiàa nèn a rəəmé, a wìy fo wù‑uù dzəə̀n. Kiyoy ke NYÙY TÀR kí wìy, e wày vitaáví e wun wùn é dzəə ye tavín, wù tiíné akfəə̀ ve vé‑eè kurin kóy sə́ shó mo və́yí tòn làv bèy.

¹⁵Samson yén kighvə́r ké kimbèʼbìy keé kijèʼ, a kí néŋé, e ràmsì kiwó, e lì, e yùyrí vilum veé Filistia sho nsə̀kì,

¹⁶e nèn sùúy jii, «M lì ne kighvə́r ké kimbèʼbìy keé kijèʼ, e yùyrí wír sho, e vikfər vikfər. M lì ne kighvə́r ké kimbèʼbìy keé kijèʼ, e yùyrí wíri shó nsə̀kì.»

¹⁷Wù súŋnín, e màysì, e nèn màʼày kighvə́r ké kimbèʼbìy keé kijèʼ kìy, e nèn shù yír kirə̀ʼ kee shooy ji Ramat Lehi[34].

¹⁸Kilòŋ kí nèn a yum Samson e ŋàŋ, wù tóŋ e NYÙY TÀR, e sùúy sho jii, «À fò ne ŋgaà wò lìm vitaáví, wù yóv nsiì e wír vìné kitu, bo à lo, e màʼtì, é m kpú kilòŋ ke yumén kí, é wír ve á yoʼ sàŋ mbèʼ sév víne koó mo a?»

¹⁹Á bèy, Nyùy nèn yiì, bií shùʼùm e Lehi, mendzə́v mè wáa mee fo fo. Samson nó, mè távír wun. Wù nèn shù yír ntoò ndzə̀v yee shooy ji En‑Hakore[35], a yì dzə̀ə́ e Lehi e shem lán.

²⁰Samson nèn a dzə tàr nsaʼ[36] wìr veé Isray e ghan se wír veé Filistiàa‑aà kér vitaáví é nsay foo fèy, e sàʼ kiyá mbaà.