Read Lamnso Atǎr Nsaʼ 16 Bible Online

Atǎr Nsaʼ 16 - Lamnso bible

Atǎr Nsaʼ 16

¹Wáa dzə e kishiíy kímóʼ kí, Samson dù e ŋkàlaʼ yee Gasa ye yì‑iì dzəə̀n é wòŋ woo Filistia, e yèn sàkì wùmòʼ fó, e nèn dù, e shìíy wùn wun.

²Wír veé Gasàa yú ji Samson waà wìy, e nèn kaàrí ŋkàlaʼ, a teʼ wun vitsə́ʼ vifur e shuù wo wú nəə e ŋkàlaʼ. Áwune kù‑uù dzə́ fo vitsə́ʼ vifur, yeʼ yèʼèn, bìʼ fo vé‑eè kwaʼ ji á yíi yuyrí wun a dzə̀ kijàvndzə, a virə́ʼ ví sí raáne.

³Yii bèy, Samson neèm kfə́, ntìntìn vitsə̀ʼə́ gheén, wù túm é yuv, e dù, e ghàr shuu se sí‑iì nəə e ŋkàlaʼ, wùn à mboòmè si, à kisha ke vé‑eè fìnèn shó ki, e shòʼóy, e neèr e wun mbèʼ, e bèʼèy, e kòʼ shó e kitu ke gwan wo wù‑uù kiʼ Hebron.

⁴Kee shooy ki shaà, Samson koó viŋkar wùn wiíy wùmòʼ, aá yoŋ ji Delila, a wù dzə́ e Mboʼ Sorek.

⁵Vé saʼ veé Filistiàa wìy, e yèn wiíy və̀n, e sùúy sho jii, «Ku lèvtí Samson, é wù suúy e wò fo vitaáví və́ ví lo, é vèsən fiʼ kiíy dzə́ə ye dzə̀ á ghàn, e bóo kiv kóy və́, e kur wun, e səʼə́r wun e nsay. Aà yiì kin, bo wìr mòʼón mòʼón fo vèr lo, e fo wò vintsə̀m vé kishà ke mbàm ke fəvír kí, kishóv wiì e nsə̀kì.»

⁶Delila nèn yiì lò, e dzə̀r e Samson jii, «Ku sùúy e mò fo vitaáví vé vi lo. Ku sùúy e mò mo a dzə̀ wìr msòŋ kùr wò, e fíʼ sə̀r wò.»

⁷Samson bìnèr jii, «Aá lì akfə̀ə́ jùv ve á yóʼ ne yùm saàmbà, e kùr mo shó, bo m kù sí lo, e wèʼ moo wír ámóʼó.»

⁸Vé saʼ veé Filistiàa nèn wìy aàkfə̀ə́ jùv ve á yóʼ ne yùmé saàmbà, e fò e Delila, wù nèn kùr Samson sho.

⁹Kúr bèy, a wù kér wír ámóʼó ve vé‑eè laayin é mvə̀m lav, e nèn sùúy e Samson jii, «Wír veé Filistiàa víne, aá sí wiyì.» Samson nèn tiìné akfəə̀ viy, kù mo və́yí koò é lav. Á bèy, áwune yòʼ‑oò lo kìíy fo vitaáví və́ ví lo.

¹⁰Delila kfən sùúy e Samson jii, «À bòʼtí ne kimboʼtì, a sheʼ mo. Kii wò, ku sùúy e mò lèn kifá ke a dzə̀ á kùr wò sho ki.»

¹¹Wù bìnèr e Delila jii, «Aá kùr mo áàkfəə̀ ve fíyi ve á yòʼ‑oo yií ne kùr kifá sho, bo m kù wèʼ ne, a dzə moo wír ámóʼó.»

¹²Delila nèn lì akfəə̀ ve fíyi, e kùr wun sho, e nèn njàʼàm jii, «Yímóy, wír veé Filistiàa víne, aá sí wiyì.» A wù suuy bèy, a wíri laáy ne e mvə̀m lav, a teʼ Samson. Yii bèy, wù ku tiìné akfəə̀ viy fo wun koy mo dzə̀ á làv bèy.

¹³Delila bìnèr e Samson jii, «E meé lèn, à kù dzəə́ bóʼti mo, shéʼ mo. Ku sùúy e mò mo dzə̀ á kùr wò.» Samson bìnèr sho jii, «Aà lì viŋkur ve nəŋ ve ví dzəə̀n e mǒ kitu saàmbà, e tàtí, e bà e ndzə̀y se sí dzəə̀n é kiraŋ si, e sə̀n e mbàŋ kiraŋ, bo m yíi wèʼ, a dzə moo wír ámóʼó.»

¹⁴Á bèy, mo Samson neèmèn, a buuné, Delila nèn lì viŋkur və́ vé kitu vee saàmbà, e nèn tàtí, e bà e ndzə̀y se sí dzəə̀n é kiraŋ si, e sə̀nrì e mbàŋ kiraŋ, e nèn rəə̀mé jii, «Samson, wír veé Filistiàa sí méʼ wò.» Samson túmnín fó mbuùné, e sə̀ŋ nə́ŋ sə́ fó kiraŋ.

¹⁵Delila suúy shó jii, «A dzə̀ à wàa yòŋ ji à koŋ mo, a bó shilív shé shi yòʼ tíy e mǒ wùn a? À bòʼtí ne mo akàŋ ataár, e tèn fóo suúy e mò fo vitaáví vé ve ghaʼán vin vi lo.»

¹⁶Wù nèn kù cì kwán, a dzətí wun njèʼèr njèʼèr, kishiíy kidzə̀m. Samson jòy njèʼèr wo Delila‑aà fó e wun, e yù a yì‑iì dzə̀ wù kpù kpuún.

¹⁷Á bèy, Samson nèn fèr bvəm rə́ shó e dzə̀m, e sùúy jii, «Keme yòʼ‑oò ghàn ne kùm kitú kém, bìʼ fo Nyùy‑iì shoʼon ne mo ji wir Nasir woo jeéy, a m dzə̀ə́ e yè wór bvə̀m. Aá lòo dzə, e kòm kitú kém, bo vitaáví vém ví mày ne. Bo m kù sí lo, e wèʼ wèʼèn, a dzə moo wír ámóʼó.»

¹⁸Mo Delila yenen ji wù mvə̀ʼ ne a bvəm rə́ e dzə̀m e wun, wù nèn tsə̀nsí ntum e vé saʼ veé Filistiàa jii, «Vèn kfən wìy, bìʼ fo wù fèrìn ne bvəm rə́ e mò e dzə̀m.» Á bèy vé saʼ veé Filistiàa nèn wìy, e yèn wun, aá sí kér mbàm sìy aáwuné wo.

¹⁹Delila nèn ŋèv, wù buúné e wun nsàn vibìy. Wù nèn jàŋ wír, wù wìy, e kòm viŋkur və́ vé kitu vee saàmbà vìy. Á mo Delila‑aà kèʼèn, a səʼə́r wun e nsay, é bo vitaáví və́ ví wáa mày.

²⁰Wù nèn siì rəə̀mé e Samson jii, «Wír veé Filistiàa sí ghíʼ wò, e koo.» Samson túmnín fó mbuùné, a kwàʼ ji wun‑éè fəə́ réŋréŋ á mo wun yii fəə́, e yàsì virə́ʼ və́, é ví caʼ. A bó wù yòʼ‑oò kì ji NYÙY TÀR yòʼ kì dzə̀ə́ a wùn wun.

²¹Wír veé Filistiàa nèn koò wun, e fə̀tí sí rə́, e lì wun, e sə̀y shó e Gasa. Á meé fó, e nèn kùr wuú rə́ aàsháŋ ve á fèrìn e kisha kee *brons ki, e lèm wun, wù wáa jò kibán e laʼ sháŋ.

²²Wù wáa dzə fo bèy, kitú kfə́ ke vé‑eè komen kí nèn kù a kuy.

²³Vé saʼ veé Filistiàa nèn yiì lò, e bàʼtí ji á yii á cu ye kuʼùné e nyùy wov woo Dagon, a sheʼrí wun sho. Vé‑eè suuy jii, «Nyùy wòsən wày ne Samson woo ŋgaà wòsən vibàn e vèsə́n wo.»

²⁴Mo wíri yenen, aá wíy ne e Samson, e nèn a burí nyùy wov, a suúy jii, «Nyùy wòsən wày ne ŋgaà vibàn wòsən e vèsə́n wo. Wír wo wù‑uù laar woŋ wosən, yúyrí wíri agháʼán.»

²⁵Áwune nèn a yiì ŋkàʼ, e lòo yi, wúné wáa tekír áwune, á nèn sùúy ji á du, e fə̀ə́r a Samson fo sháŋ, e wìy sho, é wù wáa sheʼér a áwune. Á ku nèn dù, e fə̀ə́r wun fo laʼ sháŋ, wù wìy, a sheʼér áwune, aá tiír wun e ntìntìn vitom vibaà.

²⁶Samson yiì lò, e sùúy e wan woo lumèn wo wù kì gharin wun e kiwo jii, «Màʼtì mo, é m ghár vitóm ve ví tóm lav, é m fiʼ yèʼtí sho,» a wù suuy bèy, a

²⁷vikìy wùn à vilum‑eè rùn é lav fèn, e lì vé saʼa adzə̀m veé Filistia. Vilum wùn à vikìy ámóʼó wáa dzə sa e kitu ke lav foo fèy ansə̀kì ataár ve vé‑eè leey mo Samson yii vinyo, shéʼer áwune shó.

²⁸Samson nèn tòŋ e NYÙY TÀR jii, «Éè NYÙY TÀR woo Taà Ndzə, ku yù tóŋ yémé. M lón wò ji à ku fò mo vitaáví. Éè Nyùy, ku kfə̀n tàvír mo lèn və̀n cáʼ, é m fíʼ siìr ŋkfə́tír e wír veé Filistiàa, bìʼ sí yém yee baà ye áwune fətin.»

²⁹Samson nèn ràmsì wó, e làʼ é vitóm veé kintìntìn ke lav vee vibaà ve ví‑iì kér lav, e toòmé kímóʼ kí e kiwó ke yìy kí, e toòmé kímóʼ kí e kiwó ke ŋkoòvì ki,

³⁰e nèn waàmé jii, «Bòŋ é m kpú vèr à wír veé Filistiàa.» Wù yòŋ bèy, e nèn dòm vitóm vìy e vitaáví və́ ví vidzə̀m, lav nèn keèsì e vé saʼá kitu, à e wìr dzə̀m wo wù‑uù dzəə̀n é lav. Á bèy, Samson nèn yùyrí wíri é ghan se wù‑uù sí kpú, aá kúʼ, e shaà ve wù‑uù yúyri e ghan se wù‑uù yii vinyo.

³¹Afə́r və́ wùn à kfə́ə tàr wov e dzə̀me nèn sə̀y, e lì dzə́n rə́, e kòʼ shó, e dzəə̀mè e Manoa woo tàr wóv sày, a yí dzə̀ é kirə̀ʼ kímóʼ kí é kintìntìn ke Tsora wùn Eshtaol. A Samson‑eè dzə̀ tàr nsaʼ[37] wìr veé Isray kiyá mbaà.