Read Lamnso Atǎr Nsaʼ 17 Bible Online

Atǎr Nsaʼ 17 - Lamnso bible

Atǎr Nsaʼ 17

¹Wìr wùmòʼ‑oò dzə̀ é wòŋ agwan woó Efrayim, aá yoŋ yír ji Mayka.

²Wìy lòo dzə e kishiíy kímóʼ kí, wù dzə́r e yè wov jii, «Yìy, mò‑oò yù, aà shóv shóŋ wo wù‑uù shoŋen vintsə̀m vé kishà ké ke mbàm ke fəvír kí kee kishóv wiì e nsə̀kì. Àshè, yì‑iì lì mo, ví vìne.» Yè wov bìnèr sho jii, «Wàn, mo à biimen ji yì‑iì lì wò, NYÙY TÀR ku səə̀vì wò.»

³Á bèy, wù nèn siìr visha ve mbàm vee shooy e yè wov. Yè wov suúy shó jii, «A dzə̀ ji m tín lòn fo wan wóm kitu, bo mo‑óò fó *kisha ke mbàm ke fəvír kin ji ké NYÙY TÀR, aá ku fèr shibvə̀m she semén shí, e laàrì kisha kìn e wùn wó. Á mo m yíi yiì, é mbàm sìn si kfə́n e wò.»

⁴Mo wù siìrìn kisha ke mbàm kee shooy e yè wov, yè wov nèn fə̀ə́r vintsə̀m ghii baà, e fò e taà kilàm, wù fèr shibvə̀m she sémén shí, e laàrì e kisha ki, á nèn lèm e Mayka lav.

⁵Mayka wáa dzə, a wù kér kfə́ kee kirə́ʼ ké nyùy. Wù‑uù fèr mebvə̀m, e kfə̀n tàr shiŋkèéy shé kikum,[38] e lèm wán və wùmòʼ ji ŋgaà cù və.

⁶Yì‑iì dzə̀ é ghan fóo fèy, a wír veé Israyi yòʼ sí kér fon, a wìr dzə̀m yii kinyo ke kí gheen wun.

⁷Wánlè nsùm wùmòʼ wáa dzə e Betlehem e nsay Juda, a dzə̀ wír woó ram Levi. Wù‑uù wìy, a beè beèn é Betlehem.

⁸Wù nèn lò, e ŋàʼáy fo ŋkàlaʼ yee Betlehem, e mbìv Juda foo fèy, a dù, a tàʼ kirə́ʼ ké a dzə sho, e ghàn wìy, e mèé e Mayka laʼ, e wòŋ agwan woó Efrayim.

⁹Mayka dzə́r shó jii, «À wìy a dzə̀ fó feé?» Wù bìnèr jii, «M dzə̀ wír woó ram Levi, a m wìy fo Betlehem e Juda, a m ghán taʼ kirə́ʼ ké a dzə sho.»

¹⁰Mayka bìnèr sho jii, «Gòʼ wòsò, a dzə tàr wor, e kfə̀n a dzə taà cù wom, lóo dzə e kitu ke kiya, é m wáa fo wò kisha ke mbàm ke fəvír kí, kintsə̀m e ghvə̀m, e kfə̀n a tar ndzə̀y e wò wùn, a fo viyíkìr.»

¹¹Wìr woó ram Levi və̀y yú, kí gheén wun, wùn Mayka nèn a dzə. Wánlè nsùm və̀y nèn a dzə moo wán və woo lumèn wùmòʼ bey.

¹²Á bèy, Mayka nèn lèm wánlè nsùm və̀n ji taà cù və. Wù nèn a dzə e wun lav.

¹³Mayka nèn sùúy jii, «Ké lèn ki, mo m sí kér wír woó ram Levi ji taà cù wom, bo m kì lèn ji NYÙY TÀR yíi yiì, é vinyo vém ví wáa ghan kijuŋ.»