Read Lamnso Atǎr Nsaʼ 18 Bible Online

Atǎr Nsaʼ 18 - Lamnso bible

Atǎr Nsaʼ 18

¹Yì‑iì dzə̀ é ghan fóo fèy, a bó wír veé Israyi yòʼ sí kér fon. Kfə́n a dzə e ghan fóo fèy se wír veé ram Dane‑eè taʼ kirə́ʼ ké a dzə sho, bìʼ fo áwune yòʼ‑oò ló ne a ker kirə́ʼ kee ji kév é mvə̀m ràm seé Isray.

²Wír veé ram Dane nèn lò, e tàr melav mev, e shòʼtí wír atàn ve dzəə̀n antav. Á shóʼ, e nèn tùm áwune fó ŋguùŋè Tsora wùn Eshtaol ji á wàá ghán á e wòŋ, e shwèʼ, e tàr mo wú dzəə̀n. Áwune ku nèn a dù, e lòo meé e wòŋ agwan veé Efrayim, e tò e Mayka laʼ, e nèn shìíy fo.

³Mo áwune duùn, a meé e Mayka laʼ, e nèn yù jí wánlè nsùm woó ram Levi, e nèn kìíy ji bó yòʼ dzə̀ á wír woo fó. Á nèn kòʼtí, e dzə̀r shó jii, «Wìy la e wò fèn? À yii ka fen? Lim yée dzə̀ ka?»

⁴Wù nèn naàrì nsìysì wùn Mayka aáwune, e sùúy jii, «Wù lì ne mo, a làʼ ji m wáa dzə taà cù və.»

⁵Á nèn sùúy e wun jii, «Vèr kù lón wò lónén, ku dzə̀r e Nyùy ji ghán ye vèr du rə̀ne sà kù yíi bòŋ a?»

⁶Taà cù nèn sùúy aáwune jii, «Vèn ku dù vèn à nyaáŋ, ghán yéné dzə̀, a kù yíi a dànèr NYÙY TÀR ven.»

⁷Wír vee atàn vìne nèn lò, e dù, e mèé e ŋka Laish, e yèn, a wír vee fóo yòʼ gwarìr kinyo kímóʼ kí ké a fàn, mo wír veé Sidone‑eè lo, á wàa dzə. Aá dzə́ fo ji nyaáŋ, a bó á yòʼ taʼ melaà, a bó wùn à wír ámóʼó yòʼ kér kinyo. Áwune yòʼ‑oò búŋ kifá kímóʼ kí, bìʼ fo nsay yev‑iì dzəə̀n ye juŋ feyì. Aá dzə́ kév kwaʼda fo ŋkàlaʼ yee Sidon, a bó á yòʼ kér wír ámóʼó fó mentsə̀m ve wùn áwune suúsín.[39]

⁸Aŋkiy vìyi kfə́n é bàm, e yèn wír vév é ŋguùŋè Tsora wùn Eshtaol, á dzə́r aáwune jii, «Vèn dù, e yèn a fóo dzə̀ é le?»

⁹Áwune bìnèr jii, «Vèn ŋáʼáy, é vèsən du, e nə̀ə́ Laish e rə́r sí. Vèr dù ne, e yèn a woŋ woo shooyi bór é ŋàŋ. Bó vèn yòʼ yíi yiì kifá fo à? Lá vèn yòʼ ndzə̀y fóo dù, e nəə́, e yòv woŋ woo shooy.

¹⁰Vèn yíi meé fo, aá yén wír ve á dzə́ dzəʼə̀m yév là kindzə́m. Dzə̀ kirə́ʼ, a kí kùʼ feyì, a Nyùy fò ne kirə́ʼ kee shooy e vèn. Kirə́ʼ, a bó kifá keé kitu ke nsay kímóʼ kí yoʼ bùŋ fó fo.»

¹¹Wír veé ram Dane fəə́ fó Tsora wùn à fó Eshtaol, wír ghií ntuùfú, aá báʼtí ne vifá ve rər.

¹²Á fəə́, e nèn kòʼ, e dù tàm kiláʼáy é ghaa Kiriat‑Jearim, a dzə̀ fó mbìv yee fo shùy yii nəə, a fóo dzə̀ é nsay rám Juda. Á nèn sìíy, a yòŋ kirə́ʼ kee shooy ji kiláʼáy ké Dan, e wìy shem lán.

¹³Á lò fo fo, e kòʼ é wòŋ agwan woó Efrayim, e nèn lò, e mèé e Mayka laʼ.

¹⁴Vé ŋkiy vee atàn ve vé‑eè duùn, e lèéy woŋ Laishi nèn sùúy aàfə́r véví jii, «Vèn kì ji lav sìn si dzə̀, a yìmòʼ kér shiŋkèéy shé kikum, kér anyùy veé lav ámóʼó, kfə̀n kér shibvə̀m she á semen, e laàrì kisha e wun wó a? Bo a dzə̀ lèn, vèn lèéy ji á sà‑áà yée le á?»

¹⁵Á nèn bìn e Mayka laʼ fo wánlè nsùm woo wír woó ram Levi dzə́, e nèn shàʼtì wun, e dzə̀r mo vinyo və́ ví gháné.

¹⁶Vé rər vee ghií ntuùfuú nèn gòʼ, a tiy a dzə̀ é shùu kày, aá sí kér vifá vév vé rər.

¹⁷Á bèy, vé ŋkiy vee atàn ve vé‑eè duùn, e lèéy woŋ woo shooyi nèn shaà, e nə̀ə́ e lav fèy, e lì shibvə̀m she á semen, e kfə̀n nàŋsín e *kisha ke mbàm ki, e lì shiŋkèéy shé kikum, e lì anyùy veé lav. Vé‑eè li bèy, a taà cù kù tíy e shùu kày fo vé rər vee ghií ntuùfuú tíyí.

¹⁸Mo wír vìyi nəən e Mayka lav, e lì vifá vìy, taà cù nèn dzə̀r aáwune jii, «Vèn mum kiy a dzə̀ ka?»

¹⁹Áwune bìnèr sho jii, «Sə́tí shuu wóo, a dzə kisə́sə. Á wìy e věr bàm, a dzə tàr wor, e kfə̀n a dzə taà cù wor. Kí bòŋ ji à wáa dzə taà cù wìr mòʼón mo à wáa dzə taà cù wìr dzə̀m woó ram Isray yímóʼó á?»

²⁰Taà cù yú bey, wúné bóŋ wun, wù nen lì shiŋkèéy shé kikum, e lì anyùy veé lav, à shibvə̀m she semén shiy shi, wùn áwune nèn a dù.

²¹Wír veé ram Dane nèn lì dzə́ə, e lòo dù, e shèmér wón fó mbìy, wùn à wír ve á du e nyám si, à ve á du e vifá vi, wíri shém fó bàm.

²²Mo áwune loòn fo Mayka lav, e dù ntàm, Mayka nèn rəə̀mé wír vee wun shweesí, á fəə́, e jùm wír veé Dan, e kòóy,

²³e nèn a suŋnín aáwune, jì wáa tav. Wír veé Dane bìnkìr, e dzə̀r e Mayka jii, «Kinyo kee shó ki dzə̀ ji ka? À wìy vèn à vé melàa ben ji ka?»

²⁴Wù bìnèr jii, «Bó vèn yòʼ kùúy anyùy vém ve mò‑oò fèrìn, e kfə̀n lì taà cù wom, e dù sho à? Bo m gòʼ kém lèn a dzə̀ vèr à ka kí? Vèn kfə́n a dzər e mò ji nyári sà lò fo feé a?»

²⁵Wír veé Dane bìnèr e wun jii, «Vèr yòʼ dzəə́ taʼ, e yu, aà suúy kinyo e věr mvəm. Kí búŋ fo bèy, bo a tàm wír ve á lum e melív mè vìne‑éè lo, aá binkir e wò kitu, e laàr dzəʼə̀m yé, à yé kfəə yée.»

²⁶Wír veé Dane nen kù a dù du yév. Mayka yén ji á tàv á ne, e ghàʼ wun, wù nèn lò, e kfə̀n é bàm e wun laʼ.

²⁷Mo áwune liìn mebvə̀m me Mayka‑aà fèrìn, e kfə̀n lì taà cù və, a dù, e nèn lòo meé e ŋkàlaʼ yee Laish, a wíri dzə́ fo ji nyaáŋ, a bó á yòʼ gwarìr kinyo kímóʼ kí ké a fàn. Wír veé Dane nèn sə̀ʼsí áwune e nyùy rə̀r, e tòn ŋkàlaʼ yev e və́yí.

²⁸Wìr yòʼ‑oò ló a dzə wóo bòyìr áwune, bìʼ fo ŋkàlaʼ yee Sidon‑eè dzəə̀n kwaʼda, a bó áwune yòʼ‑oò lo koò viŋkar wùn à kitúm kímóʼ kí. Ŋkàlaʼ rə̀n‑eè dzə̀ é Kiwoóy ké Bet‑Rehov. Wír veé Dane nèn kfə̀n bàʼrì ŋkàlaʼ yee shooy, a dzə fo.

²⁹Á nèn shù yír ŋkàlaʼ yee shooy ji Dan, a vé‑eè lì a dzə̀ yír tàr à ràm yév wo vé‑eè yoŋ ji Dan, a dzə̀ wan Isray. Yii bèy, a vé‑eè yoŋ yír ŋkàlaʼ yee shooy fo mbìy ji Laish.

³⁰Wír veé ram Dane nèn tìír shibvə̀m she semén shiy fo ji nyùy wov, e nèn lèm Jonatan woo wan Gershom ji taà cù wov, a dzə̀ wan wàn Mooser. Rám rəə́ nèn kù wìy, a shaà fo mbìy, a dzə atàá cu wìr veé ram Dan, e dù, e meé e ghan se vé‑eè koorin wír veé Isray, e dù sho e kwaʼ nsàm.

³¹Á bèy, shibvə̀m she Mayka‑aà semen shiy shi nèn kù a tiy fo, e dù, e meé mo lav Nyùy‑iì[40] dzəə̀n é Shilo.