Read Lamnso Atǎr Nsaʼ 19 Bible Online

Atǎr Nsaʼ 19 - Lamnso bible

Atǎr Nsaʼ 19

¹Yì‑iì dzə̀ é ghan fóo fèy, a wír veé Israyi yòʼ sí kér fon, a wìr woó ram Levi wùmòʼ dzə́ e tím kwaʼ, e wòŋ agwan woó Efrayim. Wù lì wán woo wiíy woo wír woó Betlehem e Juda ji wíiy və wo lemèn.[41]

²Yii bèy, wiíy və̀n wáa shwiíy kilòŋ wùn wun, e nèn lò, e kfə̀n e tàr wóv laʼ e Betlehem e nsay Juda, e dzə̀ʼə̀m fo ŋwee e kweè.

³Lum nèn ŋàʼáy, a dù fo, ji wun fiʼ dù, e boòrì ji wù kfə́n á e bàm. Wù lòo dù, e lì wír və lìm wùn à vimbèʼbìy ví vibaà. Wù dù, e mày fo, wiíy səə́sí wun, e dù sho e tàr wóv lav. Tàr wov yén wun, e səə̀sí wun e kishéʼrì ki.

⁴Tàr à wiíy ku wày wáyín ji wùn áwune ku waà dzə̀ʼtì. Wù nèn dzə̀ʼə̀m wùn áwune vishiíy vitaár, aá shiiy bèy, yíkir kfə̀n nóninè.

⁵Wáa dzə e kishiíy ke kí‑iì meen ji kweè, áwune ŋáʼáy kijàvndzə, wù báʼtí ji wun waà sí lo, tàr à wiíy nèn sùúy e wun jii, «Ku wày kifá ki é shuù, e tàv, e bó a dù.»

⁶Wùn tàr à wiíy nèn dzə̀ʼə̀m, a yikír, a nonín kintatì. Tàr à wiíy nèn kfə̀n lò, e sùúy sho jii, «Ku kfə̀n shìíy lán, e bònen yì kitú ké ki.»

⁷Wìr woó ram Levi və̀n ŋáʼáy ji wun waà sí du, tàr à wiíy kfən siì sùŋnín sho, wù kúvsín kwaʼtì rə́, e kfə̀n shìíy fo.

⁸Kishiíy ke kí‑iì meen ji tàn ki gheén, wù kfən ŋàʼáy kijàvndzə ji wun waà sí du, tàr à wiíy kfən sùúy jii, «Kii wò, ku wày kifá ki é shuù, e màʼtì é shùy rə́ʼə́m, é bo à wáa dù.» Wùn wun nèn kfə̀n yìkír kintatì.

⁹Wù yí, wùn à wiiy və wo lemèn, à wìr lìm və nèn ŋàʼáy ji á waà sí du, sə və woo tàr à wiíy suúy e wun jii, «Leéy, e yèn, ndzə jì ne, a virə́ʼ ví sí sə́né, kii wò, ku shìíy. Kishiíy kí mày ne, ku shìíy, a yi kitú ké ki, yì lóo jàv, áà bvə́y bvəyín, a dù e wò laʼ.»

¹⁰Yii bèy, la wù yòʼ dzəə biìmé, e shìíy. Wù nèn ŋàʼáy, a dù dzə́ə fó Jebus wo á yoŋ lán ji Jerusalem. Wù‑uù lò, a dù wùn à wiiy və wo lemèn, à vimbèʼbìy və́ vee vibaà ví, aá kúr ne vifá e ndzə̀m wó.

¹¹Áwune wáa meé e Jebus, a ndzə jí ne, ŋgaà lìm və suúy shó jii, «Vèsən bin é ŋkàlaʼ wìr veé Jebus fèn, e shìíy fo.»

¹²Tàr wov lìm bìnèr sho jii, «Yòʼ dzə̀ vèsən bìn e vitúm ví ŋkàlaʼ, a bó yòʼ dzə̀ wír veé Isray. Vèsən shaa, a dù fo mbìy e Gibea.»

¹³Wù kfən sùúy e ŋgaà və lìm jii, «Vèsən wáa dù ji vèsən sà‑áà meé é Gibea, kìn é Rama, kìn vèsən‑éè shiíy é kirə̀ʼ fó virə̀ʼ vin.»

¹⁴Áwune nèn a dù, shùy wáa nəə́, aá sì é ghaa Gibea woo ŋkàlaʼ ye yì‑iì dzəə̀n é nsay Benjamin.

¹⁵Áwune nèn bìn ji vé‑éè shiíy á fo, e nèn dù, e dzə̀ʼə̀m e kirə̀ʼ ké kitar keé ŋkàlaʼ, yii bèy, la wìr yòʼ fəə̀sín wóo lì áwune ji wùn áwune du, e shìíy.

¹⁶Áwune kú a dzə fo, ndzə lòo ji, wìr woo ŋgàywìr wùmòʼ wáa kfən fo wù kì lim súm. Wìr və̀n‑eè dzə̀ naaŋkàntì wìr woó wòŋ agwan woó Efrayim, a wù‑uù dzə́ e Gibea.

¹⁷Wìr woo ŋgàywìr və̀y lòo leéy, e yèn ŋgaà ghan və̀y, a wù dzə́ e kirə̀ʼ ké kitar. Wù nèn dzə̀r shó jii, «À wìy fo feé, aà du a dzə̀ feé?»

¹⁸Wù bìnèr sho jii, «Vèr lò fo Betlehem e Juda, a vèr du e tím kwaʼ, e wòŋ agwan woó Efrayim, fo m yii dzə́. Mò‑oo du é Betlehem e nsay Juda, lèn a m sí kfə́n e bàm fó laʼ,[42] yii bèy, a wìr yoʼ fəə̀sín woó lì ver, é vèr áwune du, e shìíy.

¹⁹Vèr dzə̀, a vèr kér viŋgà ve yumér ví ve dzə̀ vimbèʼbìy vém ví yì, kfə̀n kér kibán, à meluʼ mer mè. Vèr kér kifá kidzə̀m ke vèr kér shií shó.»

²⁰Wìr woo ŋgàywìr və̀y suúy jii, «Nyaáŋ wáa dzə e wò dzə̀ʼə̀m, m yíi a leéy fo wò. Bó yòʼ dzə̀ à shìíy é kirə̀ʼ ké kitar.»

²¹Wù nèn lì wun, e dù sho e wun lav, e yìír vimbèʼbìy və́. Áwune yiì sù wuú, wù nèn fò áwune vifá ve yi, à kifá ke áwune nó kí.

²²Kù mo áwune dzə́ yíkir bèy, e lòo sìn, wír ve á ŋaʼàa nèn wìy, e kaàrí lav, e tàr, e nèn a tsəy shúu lav, a yòŋ e ŋgaà lav kitávín jii, «Fəə́r wír ve á wìyìn e wò lav vìyi, é vèr wáa neŋ sho.»

²³Bàá woo ŋgaà lav fəə́, e sùúy aáwune jii, «Ŋkàr sem, m lón ven lonén, lá vèn yòʼ yiì kfə́ə joònè woo ben e wír vìne, dzə̀ kiŋgàn kém.

²⁴Vèn yén, wan wom wo wù yóʼ ne kìíy lumèn və̀ne, a wiíy kiŋgàn kém wo lemèn və̀ne. Vèn maʼti, é m fəə́r áwune, é vèn lóvtí shó mo vèn koŋè. Yii bèy, lá vèn yòʼ mùm fó yiì kinyo ke joònè kee ben e wìr və̀n.»

²⁵Yii bèy, la áwune yòʼ yuùrí. Wìr woó ram Levi və̀y nèn fə̀ə́r wiíy və wo lemèn və̀y, e fò aáwune. Áwune bám, e neèm sho vitsə́ʼ vifur. Ndzə káʼ, á nèn màʼtì, wù wáa dù.

²⁶Wiíy və̀y wìy, a ndzə sí ráné, e nèn gbù e bàá woo ŋgaà lav və̀y shùu lav fo lum və‑əə̀ shiiyin, e neèm fo, ndzə rán.

²⁷Mo ndzə ranen, lum və ŋáʼáy, e mvə̀ʼ shúu lav ji wun waà sí du, e nèn yèn wiíy və wo lemèn və̀y, a wù neém, e ràmsì wó, yí dú, e kùm shúu lav.

²⁸Wù nèn yòŋ wiíy və̀y jii, «Lò é yuv, é wòsò wáa dù,» yii bèy, la wù yòʼ bìnèr kinyo. Wù nèn shùr dzə́n rə́, e neèr e kimbèʼbìy, e nèn a dù sho e wun laʼ.

²⁹Wù dù, e mèé e laʼ, e ghàr shwàʼ, e neèr dzə́n wiíy wo lemèn və̀y, e shètì vibar nshòv sibaà e ghvə̀m, e nèn tsə̀nsí ji á javti á e rám sé wìr veé Isray see nshòv sibaà e ghvə̀m si.

³⁰Á bèy, wìr dzə̀m wo wù‑uù yenen kinyo ke vé kiŋàʼa‑aà yiìn wáa suúy jii, «Kfə́ə kinyò kee ben, ki yòʼ‑oò ghàn ne a e kòóy. A bó wìr yòʼ‑oò ghàn ne yèn á rə́mrə́m kinyò kee bèn, e kèʼ mo wír veé Israyi‑iì fəən á fo Ejiv, e meé e kishiíy fóo fèy. Á kwaʼti á kinyo ke a dzə̀ á yiì kí, e sùúy.»