Read Lamnso Atǎr Nsaʼ 20 Bible Online

Atǎr Nsaʼ 20 - Lamnso bible

Atǎr Nsaʼ 20

¹Wír veé Israyi ku nèn fəə̀ wir dzə̀m, e kèʼ fo Dan, e dù, e mèé e Beersheba, à fó nsay Gilead, e bàʼtí e NYÙY TǍR si e Mispa ji kitú kimòʼón.

²Vilìmbìy ve ví‑iì sáʼ rám seé Isray sidzə̀m vi fəə́, e dìn vitú vév e wír NYÙY TÀRí, wùn à vé rər ve vé‑eè dév nyùy sé rərí wír nsə̀kì ghii kweè.

³Á báʼtí bey, a wír veé ram Benjamine yú ne ji wír veé Israyi kòʼ ne a e Mispa. Wír veé Israyi kú a dzə fo, a ghaynín mo rə́mrə́m kinyò kee bey ki‑iì ghanen, e bóo koóy.

⁴Wìr woó ram Levi wo yì‑iì dzəə̀n lum wiíy wo á kì yuyrin nèn lò, e fèr jii, «Vèr wiiy wom wo lemèn kì wìy, e mèé e Gibea woo ŋkàlaʼ ye yì dzəə̀n é nsay Benjamin ji vèr wun shiíy fó.

⁵Yiì lòo dzə vitsə́ʼə́, vilum veé Gibeàa kaárí lav, e tàr ji á yúyrí á mo, yii bèy, á nèn bàm a dzə̀ yeè lav wom, e neèm sho, wù kpú.

⁶M nen lì dzə́n wiiy wom, e shètì e vibàr vibàr, e nèn tsə̀nsí ji á javti á e rám seé Isray see nshòv sibaà e ghvə̀m si sidzə̀m. Mò‑oò yiì bey, bìʼ fo wír vìne‑eè yiìn kinyo ke joònè kí e věr mvəm, a dzə̀ nshoórmé feyì.

⁷Ven ve á dzəə̀n fen adzə̀me dzə̀ wír veé Isray, vèn yèn ji vèsən‑éè yée le?»

⁸Wìr dzə̀m woó Isray ŋáʼáy é yuv, e bìnèr jii, «Bó wìr yòʼ dzəə́ kfə́n e bàm e wun laʼ gheéy.

⁹Kinyo ke vèsən lo, e yiì ki dzə̀ jii, vèsən lo, e shweŋ, e shoʼtí wír ámóʼó, aá du, e ghìʼ wír veé Gibea e rə́r sí.

¹⁰Vèsən shóʼ wír ghvə̀m ghvə̀m fo wìr vee wií fó ram sidzə̀m se sí dzəə̀n é Isray. Wíri wáa dzə nsə̀kì, bo á shóʼ vee wií fo áwuné mvəm. Wíri wáa dzə nsə̀kì ghvə̀m, bo á shóʼ vee nsə̀kì. Shóʼó, aáwune nèn a fo viyíkìr e kùʼùn wìr wo wù yíi nəə́ wír veé Gibea[43] e rə́r sí, e fíʼ siìr ŋkfə́tir kinyò ke ŋkàlaʼ yee rám Benjamin rə̀ne‑eè bùʼùn.

¹¹Wír veé Israyi nèn suùsín, e ghìʼ ŋkàlaʼ rə̀n.»

¹²Rám sé wìr veé Isray sidzə̀m si tsə́nsí vilum, á wáa ghanén nsay Benjamin e dzə̀m, aá ghán bèy, fúŋ jii, «Kfə́ə kinyò ke vèn bùʼùn ben ki dzə̀ keé le?

¹³Ké lèn ki, vèn fəə́r vé yiì ye bi víne fo věn mvəm, e fò, é vèr yúyrí, e fíʼ màyìr liì wo bi və̀n fo wír veé Israyí nsàn.» Yii bèy, la wír veé ram Benjamine yòʼ yuùrí kinyo ke afə́r vév vee wír veé Israyi‑iì suuyì.

¹⁴Wír veé Benjamine nèn fəə̀kír fo áwuné ŋkà se laʼ, e dù, e bàʼtí e Gibea ji á du, e fùnèn a afə́r vév vee Isray.

¹⁵Á nèn shòʼtí wír ve vé‑eè dév nyùy sé rər fo áwuné ŋkà se laʼ wír nsə̀kì nshòv ntuùfú e mbaà (26,000), e bóo lì ve vé‑eè shoʼtin fo wír ve vé‑eè dzə́ e ŋkàlaʼ yee Gibeàa, wír ghií saàmbà.

¹⁶Fo mvə̀m wìr vìn adzə̀m, vé‑eè shòʼtí ámóʼó ghií saàmbà ve á dzəə̀n kév jeéy. Vé‑eè dzə̀ aŋkoòvì ve a wìr‑iì lòv ŋgay nəŋ fo wìr kitu e kiŋkoʼ ki, la wù yòʼ sòy fo ghaŋ.

¹⁷Kibér ke wìr veé Isray ke bó yòʼ dzəə̀n rám Benjamin ki nèn shòʼtí kév vé rərí, wír nsə̀kì ghii kweè (400,000).

¹⁸Wír veé Israyi báʼtí rə́r, e nèn kòʼ é Betel, e dzə̀r e Nyùy jii, «Yíi tòmbìy dù la fo věr mvəm, e nəə́ wír veé Benjamin e rə́r sí?» NYÙY TÀR bìnèr jii, «Yíi tòmbìy dù wír veé Juda.»

¹⁹Wír veé Israyi nèn bvəə̀shí, e ŋàʼáy kijàvndzə, e dù, e bàʼtí e ghaa ŋkàlaʼ yee Gibea,

²⁰e yiì lò, e dù ji á funen wír veé Benjamin vìn, e nèn tìír vé rər vév é virə̌ʼ virə̀ʼ, e ghaa ŋkàlaʼ, á wáa taáme rə́r.

²¹Wír vee rám Benjamine nèn fəə̀ fó Gibea, e neèr wír veé Isray e nsay kishiíy kimòʼón wír nsə̀kì nshòv sibaà é mbaà (22,000).

²²Yii bèy, wír veé Israyi kúr shilív, e kfə̀n lèm vé rərí fo vé‑eè lèmèn é kishiíy ké mbìy ki, á wáa kìʼ Gibea.

²³Áwune báʼtí bey, e nèn kòʼ e NYÙY TǍR kirə̀ʼ ké cù, a dìy e wun si kishiíy kifur, a lon ji wù ku tìr áwune á ji a sà dzə̀ áwune kfə̀n dù, e ghìʼ afə́r vév vee wír veé Benjamin e rə́r sí á? NYÙY TÀR bìnèr jii, «Áwune wàá ku dù.»

²⁴Wír veé Israyi nèn kfə̀n nyoòrì veé Benjamin fo kishiíy ke kí meen ji baà.

²⁵Wír veé ram Benjamine kfən fəə̀ fó Gibea, e neèr vé rər wìr veé Isray, wír nsə̀kì nshòv waamé e ghvə̀m (18,000).

²⁶Wìr dzə̀m woó Isray nèn kfə̀n kòʼ e NYÙY TǍR kirə̀ʼ ké cù e Betel, a dìy e wun si, e dìy bèy, e lèm jíŋ kishiíy kifur. Á lèm bèy, e cù NYÙY TÀR e cu ye tonèné, à yé kikòŋnìne.

²⁷A wìr wo wù‑uù leey fo ŋkùv mensàŋ‑eè[44] dzə̀ Finehas woo wan Eleasar woo wan wàn Aaron. Wír veé Israyi nèn dzə̀r e NYÙY TÀR jii, «Vèr kfən dù, e ghìʼ afə́r vér vee wír veé Benjamin e rə́r sí moo ŋgáŋ á?» NYÙY TÀR bìnèr jii, «Vèn du, bìʼ fo m bvəə́shi, e koo áwune, e fo e vèn.»

²⁸

²⁹Wír veé Israyi nèn wàyrí vé rər vév ámóʼó, á laáy, e kaàrí Gibea.

³⁰Kí lòo run ji vishiíy vitaár mo rə́r sí‑ii kèʼèn, wír veé Israyi kfən tìír shuu se rər, sí wáa kìʼ Gibea, kù mo vé‑eè yiìn é ghan sé mbìy si.

³¹Wír veé ram Benjamine fəə́ ji á funen áwune, wír veé Israyi nèn a sə̀ŋrì áwune, a dù sho e dzəə, e màʼtì ŋkàlaʼ e bàm. Wír veé Benjamine nèn kfə̀n kèʼ, a yuyrí veé Isray ámóʼó mo á kù‑uù yuyrin é ghan sé mbìy si. Áwune neèr wír veé Isray e nsay wír mtaár, e dzəə ye yì du e Betel, à ye yì du e Gibea, e yùyrí ámóʼó é kwaʼ see fó.

³²Wír veé ram Benjamine nèn a suúy jii, «Vèr kfə̀n sí ton áwune moó ghan sé mbìy si.» Yii bèy, a wír veé Israyi beynìn kév jii, «Vèsən nyéŋ, e fíʼ sə̀ŋ áwune, aá fəə́ é dzəə sí, e màʼtì ŋkàlaʼ e bàm.»

³³Wír adzə̀me ku nèn a nyeŋkír fo vé‑eè dzəə̀n, e dù, e kfə̀n tìír shúu rər wóv é Baal‑Tamar. Wír vév ve á kì laayin é vighìne nèn meèkír fo áwune virə̀ʼ vé kilìr e ghaa Gibea[45].

³⁴Wír ve á shoʼtin fó mvə̀m wìr veé Isray vee nsə̀kì e ghvə̀m vìne nèn ghìʼ Gibea e rə́r sí. Rə́r sí táv, yii bèy, a bó wír veé ram Benjamine yòʼ‑oò ló a kiíy ji kinyo ke tavín kí yíi kooy a áwune.

³⁵NYÙY TÀR ku tòm wír veé Isray, á tón veé Benjamin. Wír veé Israyi nèn yùyrí vé rər veé Benjamin wír kishóv wiì e nsə̀kì nshòv sitàn e mbaà (25,100) e kishiíy fóo fèy.

³⁶Á bèy, wír veé ram Benjamine nèn yèn ji á tòn ne a áwune. A wír veé Israyi‑iì lo fò kilíŋ e vé Benjamine ji wír vév ve á kì laayin é kighìne fíʼ ŋaʼáy, e sùm Gibea e rə́r sí.

³⁷Wír veé Isray ve vé‑eè laayin víyi ku nèn lò, e ŋàʼáy, e nyèŋ kitávín, e dù e Gibea, e jàvtì vitú ŋkàlaʼ e dzə̀m, e yùyrí wir dzə̀m e nyùy rə̀r.

³⁸Aáwune ve vé‑eè lìrìn é kighìne kì sìysì ne kisəəm kév ké rər wùn à kùʼùn wìr vév jii, aáwune yiì lòo sìn, a kindzə́ʼ ki súm ne ŋkàlaʼ, a koʼ e yuv,

³⁹á kù tùytí kinyeŋ, e bìnkìr, a ghiʼ veé Benjamin. Kù bey, wír veé ram Benjamine nèn lò, e yùyrí veé Isray wír mtaár, a binsí jii, rúrú, á sí ton a wír vìn mo áwune‑eè tònèn é rər sé mbìy si.

⁴⁰Yii bèy, kindzə́ʼ ki nèn lò, e kèʼ, a koʼ fo ŋkàlaʼ moo kikfə́m ke mbàʼ, áwune bínkír, e lèéy bám wóv, e yèn rúrú, a kindzə́ʼ ki súm ne ŋkàlaʼ yev, a koʼ e yuv.

⁴¹Wír veé Israyi nen bìnkìr lèn, e ghìʼ wír veé Benjamin, kindzə́m kí gwár áwune, á ló, a yàʼ yàʼàn, bìʼ fo vé‑eè yenen ji kpúu lì a ne áwune.

⁴²Áwune nèn lì kiwuú e wír veé Israyí mbìy, a leʼ, a dù e mbìv wòʼ. Yii bèy, rə́r sí ku yòʼ koò áwune. Wír veé Israyi fəə́kír fó ŋkà se laʼ see fó ghaŋ, e nyoòrì áwune, e yùyrí.

⁴³Wír veé Israyi‑iì gìŋ wír veé Benjamin, e tàr, e jùm, e dù, e koò é kirə̀ʼ ke kí‑iì dzəə̀n é ŋkìʼnìn Gibea, fo mbìv yee fo shùy yii tó.

⁴⁴Vé‑eè yùyrí wír vee rám Benjamin, wír nsə̀kì nshòv waamé e ghvə̀m (18,000), a kù‑uù dzə̀ vé rər ve tavkíné adzə̀m.

⁴⁵Vé rər veé Benjamin ve vé‑eè bòyìné nèn bìnkìr, a leʼ, a dù e mbìv kwaʼ, e kirùmèn keé Rimmon. Yii bèy, wír veé Israyi yúyrí ámóʼó é dzəə, wír ansə̀kì atàn, e jùm ámóʼó, e dù, e koò é Gidom, e yùyrí wír ansə̀kì abaà.

⁴⁶Á yúyrí wír vee rám Benjamin e kishiíy fóo fèy wír nsə̀kì nshòv sitàn e mbaà (25,000), a kù‑uù dzə̀ vé rər ve tavkíné adzə̀m.

⁴⁷Yii bèy, wíri yú fóo leʼ wír ghií ntuùfú, e dù, e lìr e kirùmèn keé Rimmon, e nèn lò, e shìíy fo ŋwee kweè.

⁴⁸Ké kiber ke wìr veé Benjamin ki‑iì dzə̀, a wír veé Israyi‑iì shèm aáwuné bàm, e yùyrí wir dzə̀m, à wóné, à kifá ke ŋeʼèn kí kidzə̀m, e nèn tònrì ŋka se laʼ sìy sidzə̀m.