Read Lamnso Atǎr Nsaʼ 21 Bible Online

Atǎr Nsaʼ 21 - Lamnso bible

Atǎr Nsaʼ 21

¹Yì‑iì dzə̀ é ghan se wír veé Israyi‑iì baʼtin é Mispa, vé‑eè lò, e yiì kilìʼ e NYÙY TÀR jii, bó yòʼ dzə̀ á wìr fo áwuné mvəm wìy fò wán və e wìr woó ram Benjamin ji wiíy.

²Wír veé Israyi tón rám Benjamin, e nèn dù e kirə̀ʼ ké cù e Betel. Á dù, e sèsín e Nyùy si, a gheèsì, a dìy, e meé e ŋkuùr.

³Áwune‑eè diy bèy, suuy jii, «Éè NYÙY TÀR woo Nyùy wìr veé Isray, ke kí kooy ver ben ki dzə̀ ka, ji rám yímóʼó wáa lày fo věr mvəm é ghan fen?»

⁴Áwune dìy bèy, yì bvəə́shí a jàv, áwune ŋáʼáy, e bòm kíy cù fo, e cù NYÙY TÀR e cu ye tonèné wùn à yé kikòŋnìne.[46]

⁵Wír veé Israyi nèn dzə̀r jii, «Wír ámóʼó sà dzə̀ shó e mvə̀m ràm seé Isray, ve bó á yòʼ‑oò lo dù e Mispa fo vé‑eè banen e Nyùy si a?» Vé‑eè dzə́r bèy, bìʼ fo áwune‑eè yiin kilìʼ ji á waà wíy yuyrí a wír wo wù gòʼòn fó Mispa.

⁶Wír veé Israyi‑iì rə́r mendzən me afə́r vév vee rám Benjamin, rə́r bèy suuy jii, «Ke kí kooy ver ben ki dzə̀ ka, ji rám yímóʼó wáa lày fo věr mvəm é ghan fen?

⁷Vèr yíi lì vikìy fó feé lèn, e bóo fo e kibér ke wìr ke kí berin fo áwuné mvəm kí? A vèr‑iì lìʼ ne e NYÙY TǍR si ji bó vèr yòʼ wíy fo wón vér vee vikìy ji vikìy vév.»

⁸Mo áwune kù‑uù dzəə́ túŋ ji kìn káŋ wùmòʼ‑oò lo gòʼ fóo dù a Mispa fo vé‑eè tárnin e Nyùy si, á túŋ bey, kí nèn fəə̀sín ji bó wìr yòʼ‑oò lo wìy a fo Jabesh Gilead, fə̀m à woo mòʼón sho.

⁹Vé‑eè kìíy cér bìʼ fo vé‑eè lòo taŋ wíri, la wìr woó Jabesh Gilead yòʼ fəə̀sín.

¹⁰Wír ve vé‑eè baʼtiné nèn tsə̀nsí vé rər ve á yòʼ‑oò fan kifá, wír nsə̀kì nshòv sibaà e ghvə̀m (12,000), ji á du é Jabesh Gilead, e yùyrí wír vee fó, e lì vikìy wùn à wóné.

¹¹Vé‑eè sùúy aáwune jii, «Kinyo ke vèn du, e yiì fo ki dzə̀ jii, vèn du, vèn laàr vilum adzə̀m, e laàr vikìy adzə̀m ve á kiiyin ne vilum.»

¹²Áwune yiì dù, e lòo tàr, e yèn wónlě ŋgòn veé Jabesh Gilead ve á yóʼ ne kìíy lumèn wír ghii kweè. Á nèn lì wónlě ŋgòn vìy, e wìy sho e kitar keé Shilo, a fóo dzə̀ nsay Kanan.

¹³Màŋgòŋ woó Isray nèn bàʼtí e dzə̀m, e tsə̀nsí ntum kiman e kibér ke wìr veé Benjamin ke kí‑iì dzəə̀n é kirùmèn keé Rimmon, a tiisí aáwune ji nyaáŋ waà sì.

¹⁴Á bèy, wír veé Benjamine nèn kfə̀nkír aáwuné melaʼ, á nèn fò vikìy vee ghii kweè veé Jabesh Gilead ji vikìy vév, a dzə̀ ve vé‑eè bavtin e làa yòʼ yuyrí. Yii bèy, vikìy víne ku dòr dórín.

¹⁵Wíri‑iì rə́r mendzən me rám Benjamin e ŋàŋ, bìʼ fo NYÙY TÀR‑iì yiìn ne, rám yee shooyi wáa tàʼ, e lày fo mvə̀m ràm seé Isray.

¹⁶Vilìmbìy ve màŋgòŋ woó Isray vi nèn a ghay jii, «Mo vikìy veé Benjamine kpuun ne adzə̀m, bo vèr yíi tàʼ vikǐy kiber ke wìr ve á berin ashàr a dzə̀ fó feé?»

¹⁷Áwune nèn yòŋ jii, «Bó yòʼ dzə̀ féyì, á tàtí rám Benjamin e dzə̀m, e sə̀ʼsí fo wòŋ Isray. Wír ve á berin fó ram féne kér fó wìy a ker anjìlaʼ.

¹⁸Yii bèy, a bó yòʼ dzə̀ vèr fò wón vér e wír veé Benjamine ji vikìy vév. Vèr‑iì yì ne kilìʼ ji lòné dzə̀ wó wìr wo wù fó wiíy e wìr woo rám Benjamin.»

¹⁹Áwune nèn kuùmé ŋkǎʼ NYÙY TÀR wo vé‑eè yí e kitu ke kiya e Shilo. Shilo və̀n‑eè dzə̀ e lò fo Betel, a dù duùn é mbìv yee kuy, a kfə̀n dzə̀ é ghaa dzəə ye yì lo fo Betel, du e Shekem, a dzə̀ fó mbìv dzəə̀ ye yì kiʼ fo shùy yii tó. Lò fo Lebona, Shilo nén a dzə e mbìv yee tsə́n.

²⁰Á nèn tìr wír veé ram Benjamin ve vé‑eè dzəə́ taʼ vikìy jii, «Vèn du, e lìr e mvə̀m sùm sé vitiír vé *vayin,

²¹a shweʼ, wónlě vikìy veé Shilòo fəə́ ji á dzə́n kidzə́n, vèn meèkír fó sum, é wìr wáa bam və́ə woo wiíy, é wìr wáa bam və́ə. Vèn koóri bèy, é wìr nèn a lì və́ə, a dù sho e wun lav e věn mbìv wòŋ.

²²Kí kooy bèy, atàr véví wiyì, kìn wìy afə́r, a ndzəkír, é vèr kú a boòrì boòrìn ji á ku rə̀r á mendzən men bìʼ ver, bìʼ fo vèr yòʼ‑oò lo kòóy vikìy vée fo e vèn é ghan se vèr‑iì tònèn Jabesh Gilead. A vèr kù yíi suúy aáwune ji bó áwune yoʼ yàʼáy a kilìʼ kév, bìʼ fo áwune yoʼ fò wón vév e vèn foón ji vikìy vén.»

²³Wír veé Benjamin vìyi ku nèn yiì mo á kì tirin áwune, e koòrí vikìy ve á kì du kidzə́n e Shilo vìy, á gheén mo áwune‑eè dzəə̀n, e nèn dù sho aáwuné nsay yee vitsə́ʼ vév. Á dù, e kfə̀n bàʼrì ŋkà se laʼ sév, e nèn a dzə fo.

²⁴Kú a dzə mo á kooyin vikìy é ghan fóo fèy, kibér ke wìr veé Isray ki nèn lò, a wìr mòʼón mòʼón kfə́n fo rám yéví dzə́, du, dzə́ wùn à kfə́ə rəə́ fo kéŋ rəə́ dzəə̀n.

²⁵Yì‑iì dzə̀ é ghan fóo fèy, a bó wír veé Israyi yòʼ sí kér fon. A wìr dzə̀m kù yii a dzə̀ kinyo ke kí gheenen wun.