Read Lamnso Atǎr Nsaʼ 4 Bible Online

Atǎr Nsaʼ 4 - Lamnso bible

Atǎr Nsaʼ 4

¹Yì‑iì dzə̀ é ghan se Ehud‑iì kpuun, wír veé Israyi kfən siì yiì vinyo ve bi ví, e tìnsín NYÙY TÀR.

²Á bèy, NYÙY TÀR wáy áwune e Jabin kiwo wo yì‑iì dzəə̀n fon wìr veé Kanan wùmòʼ, a wù sáʼ e ŋkàlaʼ yee Hasor[11]. Kitú ke vé rər və́ kí‑iì dzə̀ Sisera, a wù‑uù dzə́ e Haroshet‑Ha‑Goyiim.

³Jabin‑eè kér *viténtén vé rər vé kishà vi[12] ghií bvə̀ʼə̀. Wù‑uù nyàvrì e wír veé Israyi kiyá mbaà. Wír veé Israyi nèn lò, a lon ji Nyùy ku sə̀ á áwune.

⁴Yì‑iì dzə̀ é ghan fen, a *ŋgaà ntum Nyùy woo wiíy wùmòʼ sáʼ wír veé Isray, tínen nsaʼ sév, a yír rəə́ dzə̀ Debora, a dzə̀ wiiy Lappidot.

⁵Wù‑uù yám dzə́ e sar kici ké ten ke vé‑eè yoŋ ji ké Debora, a kí‑iì dzə̀ é kintìntìn ke Rama wùn Betel, e wòŋ agwan woó Efrayim, a wír veé Israyi wiy e nsaʼ sév sí, a wù tínenè.

⁶Wáa dzə e kishiíy kímóʼ kí, Debora tsə́nsí ntum, á jàŋ Barak woo wan Abinoam, a wù‑uù dzə̀ é ntèʼ yee Kedesh, ye yì‑iì dzəə̀n ntèʼ é nsay rám Navtali. Wù wìy, wù suúy shó jii, «NYÙY TÀR woo Nyùy wìr veé Isray suuy jii, ‹Dùu, e bàʼtí vé rərí é Gwan Tabor. Ku nə̀ə́ e rám Navtali, e nə̀ə́ e yé Sebulune, e lì wír fo fo nsə̀kì e ghvə̀m, e dù sho fo.

⁷M yíi lì Sisera woo mfòóme rə̀r Jabin wùn à viténtén və́ ve səŋ nyám se ŋkoʼ vi, à vé rər vəə́, e dù sho e ndzəv yee Kishon, e way áwune e věn wo.› »

⁸Barak bìnèr e Debora jii, «A dzə̀ ji wo‑óò du wòsò, bo m du. Wáa dzə ji à yòʼ‑óò du, bo bó yòʼ dzə̀ m dù.»

⁹Debora bìnèr jii, «Rúrú, m yíi dù wòsò. Yii bèy, fə̀m du ye à du rə̀n, á yíi tòn áwune, é la yír yée yòʼ fəə̀sín, bìʼ fo NYÙY TÀR yíi way Sisera a dzə̀ e wiíy kiwo.» Á bèy, Debora nèn lò, a dù wùn wun e Kedesh.

¹⁰Á meé fó, Barak jàŋ rám Sebulun wùn à yé Navtalìi, á wìy e Kedesh. Wíri nèn lò, a jùmrì wun nsə̀kì e ghvə̀m. Debora wáa dù sa wùn áwune.

¹¹Wáa dzə e ghan fen, a Heber woo wír woó ram Ken fəə́r ne kitú kfə́ fo wír veé Kene, e dù, e bàʼrì kibàn kfə́ é ghaa kici kee *oak, e Tsa‑Anannim e mentsə̀m me Kedesh. A wír veé Kene‑eè ràm fo Hobav wo yì‑iì dzəə̀n tàr à wiiy Mooser.

¹²Sisera yú ji Barak woo wan Abinoam kì kòʼ á ne e Gwan Tabor,

¹³wù nèn bàʼtí viténtén və́ ve səŋ nyám se ŋkoʼ vidzə̀m, a ví‑iì dzə̀ ghií bvə̀ʼə̀, e kfə̀n bàʼtí wír və́ adzə̀m, wùn áwune lò fo Haroshet‑Ha‑Goyiim, e dù, e bàʼ e ndzəv yee Kishon.

¹⁴Á wìy fo, Debora suúy e Barak jii, «Báʼtí, e dù. Lán dzə̀ kishiíy ke NYÙY TÀR wayin ne Sisera e wò kiwo. NYÙY TÀR kù sí shém e wò mbìy.» Á bèy, Barak nèn sə̀y fó Gwan Tabor wùn à wír ve vé‑eè jumrì wune nsə̀kì e ghvə̀m.

¹⁵Barak giímé áwune e rə́r sí, NYÙY TÀR bvəə́r vifií vé Sisera. Viténtén və́ vé rər, à vé rər vəə́, à kifá kidzə̀m ki tátí, e bvəə̀rí bvəərín. Sisera nèn sə̀ʼə́y fo wun kitentén, e nyèŋ e kiwuú kí.

¹⁶Barak jùm aŋgàa vibàn vin wùn à viténtén vév ví, e dù, e mày e Haroshet‑Ha‑Goyiim, e yùyrí vé rə́r Sisera adzə̀m, la wìr yòʼ bèr.

¹⁷Sisera‑aà nyèŋ e kiwuú kí, e dù ji wun laáy á e Jael woo wiiy Heber woo wír woó Ken kibàn, bìʼ fo wír Jabin woo fon woó Hasor wùn à kfə́ə Heberi‑iì suùsín, a dzə shuu e mòʼón.

¹⁸Jael fəə́ ji wun səə́si Sisera, e sùúy sho jii, «Nəə́, e meèmè, lá à yòʼ a fàn.» Á bèy, wùn wun nèn nə̀ə́ e kibàn, wù kfə́vsí wun e bvə̀ràŋgí.

¹⁹Wù lón jii, «Kii wò, ku fò mo mendzə́v, é m nó, kilòŋ kí yúm mo.» Wù nèn mvə̀ʼ mbǐʼ vin nàʼ, e fò vín sho, wù nó. Wù nèn kfə̀n kfə̀vsí wun.

²⁰Sisera nen kfə̀n sùúy e Jael jii, «Kú a tiy e shùu kibàn, a leéy. A wìr wìy, a dzər ji wìr sà dzə̀ fen a, la à yòʼ biìmé.»

²¹Sisera‑aà ghàn ne e yuv, e dòr féyì, e nèn neèm, a fòy mbuùné. Jael woo wiiy Heber nèn lì kicí ke á yii tám ndzə̀y sé kibàn shó, e lì sa kibur, e nyàʼáy ji nyaáŋ nyaáŋ, e tà kicí kin e Sisera kibàn, kí sə́y, e tàŋ wun e nsay. Wù nèn kpù.

²²Mo Barak jum, wiyì, ji wun taʼ a Sisera, Jael nèn fəə̀, wùn wun tárnín. Wù suúy shó jii, «Á wìy, é m din wír wo à taʼà.» Barak nèn nə̀ə́ e Jael kibàn, e yèn Sisera, a wù néŋ fo, a kicí kí shúʼ ne kitú, e tòsín, wù kpú.

²³Á bèy, Nyùy nèn wày Jabin woo fon woó Kanan e wír veé Israyí kiwo e kishiíy fóo fèy.

²⁴Vitaáví vé wìr veé Isray vi nèn kù a kuy, a dù duùn, á wáa fùnèn Jabin kitávín kitávín, e meé e ghan se vé‑eè laàrìn wun woo fon woó Kanan.