Read Lamnso Atǎr Nsaʼ 5 Bible Online

Atǎr Nsaʼ 5 - Lamnso bible

Atǎr Nsaʼ 5

¹Wáa dzə e kishiíy kee shooy, Debora wùn Barak woo wan Abinoam wáa yòv luŋ, a taŋ jii:

²«Á wáa burí NYÙY TÀR, bìʼ vilìmbìy ve ví danèr Isray, a wíri fó vitú vév.

³«Éè afon, vèn fó vituʼùr ví. Éè atǎr wòŋ, vèn yuúrí. M yíi a yòv luŋ e NYÙY TÀR. M yíi a yòv luŋ, a burí NYÙY TÀR shó, NYÙY TÀR wìr veé Isray.

⁴«Àwáa, NYÙY TÀR, yì‑iì dzə̀ é ghan se wò‑oò loòn fó Seir, ghán se wò‑oò lév, fəə́ fo nsay Edom, kitú ke nsay ki‑iì sə̀ʼsì, wuú wáa lo fo yuv, mendzə́v mè wáa cuùrìn fo mbàʼ.

⁵NYÙY TÀR, wò‑oò wìy, agwane sə̀ʼsì e wò si, Gwan Sinay sə̀ʼsì e wò woo Nyùy wìr veé Isray si.

⁶«Yì‑iì dzə̀ é ghan sé Shamgar woo wan Anat, a kfə̀n‑eè dzə̀ e Jael ghan, wíri‑iì baʼàr dzə́ə se kuʼkìn sí, ghán a dzə̀ e se woonén sí.

⁷Ntèʼ seé Isray si‑iì tíynin kisáŋ, e kù a tiynín, e meé mo mò‑oò fəəsin, mo woo Debora, ji yìy à wìr veé Isray.

⁸Wír veé Israyi‑iì lò ne, a ghvəm anyùy kisaŋe, rə́r sí nen nə̀ə́ aáwuné wòŋ, a bó wìr woó Isray yòʼ kér ŋkeè, kìn kòŋ, a fə̀m dzə̀ wír e mòʼón fo wíri nsə̀kì mkweè.

⁹Shilív shém shí kù‑uù tíy e vilìmbìy veé Isray ví wùn, áwune ve vé‑eè foon vitú vév, a tom rə́r. Á wáa burí NYÙY TÀR.

¹⁰«Ven ve vèn kóʼ vimbèʼbìy ve fəvír ví, ven ve vèn kúr ndzə̀y sé laʼ, e lì ven ve vèn ghán kén e kiwuú kí, vèn yuúrí yòv wo wù koóne, kwá NYÙY TÀR.

¹¹Vèn yuúrí, e yù kiléŋléŋ ké vé yòvi, mo á yov e virə̀ʼ ve á tú mendzə́v fó fo. Á yov, táŋ nsiì NYÙY TÀR, nsiì wìr və́ veé Isray. «Wír NYÙY TÀRí‑iì lò, a lev, a səy e virə̀ʼ ve á tínen vinyo veé wòŋ fo. [13]

¹²Debora, ŋáʼáy, ŋáʼáy é yuv. Ku ŋàʼáy, e lì mbìy, a màʼ luŋe. Barak, túmnín, e dù e kwaʼ rər. Wan Abinoam, ku tùmnín, e koòrí wíri, e wìy sho.

¹³Vilum ve vé‑eè berin é wòŋe nèn a səy, a yen vilìmbìy vév. Wír NYÙY TÀRí wìy, e yèn wun[14] woo Debora, aá dzə̀ kibáʼtín fóo màʼ rə́r.

¹⁴Ámóʼó‑oò lò fó Efrayim wo rám yéví‑iì fəərin wír veé Amalek fo nsay fèy. Rám Benjamin, vèn‑eè jumrì áwune vèn à wír véné. Vitú ve rər ví‑iì lò kév fó Makir, ve vé‑eè béʼ kòŋ sé mfòómeé ló fó Sebulun.

¹⁵Atǎr wòŋ veé Issakari‑iì dzə̀ wùn à Debora, à Barak. Barak‑iì lóo nəə́ e kiwoóy, áwune wàa jùmrì wun. Yii bèy, a bó rám Rubene yòʼ‑oò lo wìy, bìʼ fo mbvəərì‑iì dzəə̀n aáwuné nsàn.

¹⁶Vèn kì laàtí é vibìn vé anjiì bìʼ ka? Vèn kì taʼ ji vèn yú mo anshìyi yii jaŋ anjiì à? Rúrú, mbvəərì‑iì dzə̀ e rám Rubené nsàn.

¹⁷Gilead‑iì gòʼ kfə́ é ndzən Jordan, Rám Dane ku gòʼ a dzə̀ é shùu vikoŋ. Rám Asheri‑iì gòʼ kév é ŋguùŋè rìbà ndzə̀v, a laáy e shuù se ndzəv fo á tsəər vikóŋ.

¹⁸Yii bèy, wír veé Sebulune‑eè lì dzəʼə̀m yév, a baa kibaá sho e kitu ke koŋ. Veé Navtalìi lí sá yév yee dzəʼə̀m, e dù sho e shùu rər.

¹⁹«Afone‑eè wìy, a fùnèn Isray e Taanak. Afon veé Kanane‑eè funèn Isray e ghaa ndzəv yee Megiddo. Vé‑eè fùnèn, la wìr yòʼ kòóy nsàʼmboʼ, bó wìr yòʼ‑oò lo faàsì *kisha ke mbàm ke fəvír kí, e dù sho.

²⁰Mejiy meé yuv mè kaáy. Mo mè‑eè ghánen e yuv, kù dzə̀ mo mè‑eè funèn Sisera wùn à wír vəə́.

²¹Ndzə́v yee Kishone‑eè kùúy áwune, e dù sho. Ndzə́v yee Kishon, a dzə̀ kimvə́mvə ké ndzəv. Á bèy, m kù yíi a lev, a lev, a dù feyì vèr à vitaáví ví.

²²Rúrú, nyám sév sé ŋkoʼ si‑iì túyri wuú kitávín, sí‑iì túyri wuú, shuʼtì nsay sho.

²³«Nshìylav NYÙY TÀR suúy jii, ‹Á shòv ne ŋkàlaʼ yee Meros, á shòv ne áwune é dzəə ye biibí, bìʼ fo áwune yòʼ‑oò lo tòm NYÙY TÀR, e tòm ji wù funen antav vee vé rərí.›

²⁴«Kisəəvì ke ghaʼán kí dzə̀ ké Jael, woo wiiy Heber, woo wír woó ram Ken. Fo vikìy ve á shiiy e mvə̀m vibàné, kisəəvì kfə́ kí shaà ké wìr dzə̀m.

²⁵Sisera‑aà lòn mendzə́v, Jael fó wun vín nàʼ, wù nó. Wù kfən fò vín ye yí wurin ne, wù yí fó kighin ke yii yíkir atǎr wòŋ fo fo.

²⁶Jael‑iì lì kicí ke á yii tám kibàn shó e kiwó ke ŋkoòvì ki, e ràmsì ké yìy kí, e lì kibur ke vé lìme, e kùm kicí kiy e Sisera kitu, kitú ki bvə́ʼkír.

²⁷Sisera‑aà rə̀vkír, e wìy, e gbù e Jael wuù. Fo wù‑uù gbuùn, kù dzə̀ fo wù‑uù kpuun.

²⁸«Yìy à Sisera leéy wun fo shùu wundu, wù túytí sí fo vintaà, e lò, e waàmé jii, ‹Á ndzəy e kiténtén kfə́ kí ji ka? Nyám sə́ sé ŋkoʼ si ghvəə́ bèn ji ka?›

²⁹Wónlě ŋgòn və́ vee afií fó binèr e wun, yii bèy, wù ku gòʼ, a ghay a dzə̀ wún jii,

³⁰‹Bó áwune yòʼ bóŋri a dzə̀ nsàʼmboʼ e jàv, é wìr wáa ker wiíy e mòʼón, kìn abaà a? Ndzə̀y yeé kilùm wíy a dzə ye Sisera, ndzə̀y ye á tsəmen, yì wáa to sí, é ndzə̀y ye á tsəmen mbìv sibaà wáa dzə ye m yíi a keèrì e kilòŋ.›[15]

³¹«Éè NYÙY TÀR, ku laàr aŋgaà vé vibàné adzə̀m láarin moo Sisera, é wír ve á koŋ wòo wáa dzə moo shúy ye yì tó kijàvndzə, yì kù nèn a ban a dù duùn fó mbìy.» Á bèy, nyaáŋ ku nèn a dzə e nsay Isray kiyá mkweè.