Read Lamnso Atǎr Nsaʼ 7 Bible Online

Atǎr Nsaʼ 7 - Lamnso bible

Atǎr Nsaʼ 7

¹Yì bvəə́shí, a ran e kishiíy kímóʼ kí, a ndzə dzəə́ káʼ kaʼán, Jerubbaal wo yír yímóʼó‑oò dzəə̀n ji Gidiyon wùn à vé rər vəə́ báʼtí é ghaa ntoò ndzə̀v yee Harod, a wír veé Midiane kì bàʼtí ne kév é mbìv yee kuy e kiwoóy keé ghaa Gwan More.

²NYÙY TÀR suúy e Gidiyon jii, «À kér wír nyanyày, a bó yòʼ dzə̀ m wày wír veé Midian e věn wo. A m wày, tàm é wír veé Israyi yiì a dzə̀v nsaŋ ji á tòn áwune á e vitaáví vév ví, e làa yòʼ a koʼór yír a dzə̀ yém.

³Á bèy, yòŋ e wír vée jii, a dzə̀ wír, a wù yaʼ e shilív shí, ŋgaàŋ wàa kfən a bàm e láʼá wùn, e màʼtì a Gwan Gilead və̀n.» Wù yòŋ bèy, wír vee nsə̀kì nshòv sibaà e mbàá kfə́n é bàm, vee nsə̀kì e ghvə̀me góʼ é gwan foo fèy.

⁴NYÙY TÀR kfən yòŋ e Gidiyon jii, «Wír vée dzəə́ kuʼ e ŋàŋ. Lì áwune, e sə̀y shó e ndzəv, é m taásín áwune, e fò e wò. A m lòo taasín, e yòŋ e wìr ji wù du vèn wun, bo wù du. M yoŋ ji bó wìr yòʼ du vèn wun, bo bó ŋwèrín yòʼ‑óò du.»

⁵Á bèy, Gidiyon nèn lì wír vìy, e sə̀y shó e ndzəv. NYÙY TÀR nèn sùúy e Gidiyon jii, «Jàvsìn wír ve á yíi a la mendzə́v e kiliímé ki moo jwíi fo ve á yíi tsəm ndzəə́, e bóo no mendzə́ví.»

⁶Wíri nèn sèr mendzə́v e wó yéví, a la laán wír ghii taár, kibér ke wìr ki tsə́m ndzəə́, e bóo no mendzə́v.

⁷NYÙY TÀR suúy e Gidiyon jii, «M yíi shaà fo wír vee ghii taár ve á kì serin mendzə́v e wó yéví, e bóo noo, e bòyìr ven, e way wír veé Midian e věn kiwo. Suúy, é kùʼùn wìr wáa kfən fo laʼ.»

⁸Gidiyon nèn siìr màŋgòŋ Isray və̀y, wìr mòʼón mòʼón wáa kfən e wun laʼ. Wù siìr, e màʼtì vee ghii taár, á gòʼ wùn áwune, aá sə́ ne vifá wùn à sóŋ sí fo wír ve á kì kfənen é bàmé. Wùn à Gidiyon nèn a dzə, a wír veé Midiane dzə̀ aáwuné kilaʼáy, e kiwoóy fó ròŋ.

⁹Kú a dzə vitsə́ʼ e kishiíy fóo fèy, NYÙY TÀR suúy e Gidiyon jii, «Ŋáʼáy, e sə̀y é kilaʼáy fo wír veé Midiane baʼtin, e ghìʼ áwune e rə́r sí, bìʼ fo m wayin ne áwune e wò kiwo.

¹⁰Yii bèy, aà fan fóo səy, e ghiʼ áwune e rə́r sí, à lì Pura woo ŋgaà wò lìm, é vèn wun sə́y.

¹¹À yíi dù, e yu ke áwune suuyì, é kí yii, áà wáa yar jíŋ ji à ku ghìʼ áwune e rə́r sí.» Á bèy, Gidiyon nèn lì Pura woo ŋgaà və lìm, wùn wun sə́y, e dù, a meé e ghaa kilaʼáy,

¹²a wír veé Midiane néŋ fo nyanyày wùn à veé Amaleki, à wìr dzə̀m woó mbìv yee fo shùy yii tóo, wo wù tatin áwune, aá meʼèm e kiwoóy moo ŋguùmé, a nyám sév see akamer si sén fo sénén moo síy seé ndzəv, se bó yòʼ dzə̀ á tàŋ.

¹³Kù mo Gidiyon mee e ghaa kilaʼáy bey, e nèn yù, a wìr fer njèm ye yì kì shiin wun e ŋkar rə, suuy jii, «M kì yèn ntuʼ kiban ke saŋ yee *barli, a yì dzə́ŋrí, e wìy e vèsə́n kilaʼáy fen, e wìy, e tsə̀y kibàn kímóʼ kí kitávín, kí gbú, e neèm e nsay tèéter.»

¹⁴Ŋkar rə bìnèr jii, «Kin ki kù din a dzə̀ ji Gidiyon woo wan Joash woo wír woó Isray kù yíi ghaʼ vèsən é shùu rər. Nyùy kù wày ne mànjòŋ woó Midian e dzə̀m e wun kiwo bèy.»

¹⁵Mo Gidiyon yuun njèm rə̀y wùn à nsàv rə, wù nèn tsə̀m ndzəə́, e sùyrì NYÙY TÀR, e lò, e kfə̀n é bàm é kilaʼáy fo áwune kì baʼtin, e yòŋ ji á ŋáʼáy, NYÙY TÀR wày á ne mànjòŋ woó Midian aáwuné wo.

¹⁶Wù nèn tòʼtí wír və́ vee ghii taár vìy akáŋ ataár, e fò sóŋ se toŋén sí e wìr dzə̀m, e kfə̀n fò mbìʼ sí, aá títí ne vikaʼày shó.

¹⁷Gidiyon suúy aáwune jii, «Vèn wáa jùmrì mo, a yiì réŋréŋ mo m yii. M du, mee e ghaa kilaʼáy, lóo yiì mo m yii, vèn kù a yiì réŋréŋ.

¹⁸Vèr à wír ve vèr áwune dzəə̀né yií tóŋ sóŋ, vèn nèn tòŋ sá sén virə́ʼ vidzə̀m fo vèn kaarin kiláʼáy ké wìr vee Midian, e tàr, e nèn a rəəmé jii, ‹nyùy rə̀r dzə̀ a dzə̀ e NYÙY TÀR wùn Gidiyon kiwo.› »

¹⁹Gidiyon wùn à wír və́ vee wií nèn dù, e mèé e ghaa kilaʼáy ké wìr veé Midian, é bo ntìntìn vitsə̀ʼ wáa gheén, a kù dzə̀ é ghan se áwune kì kúvsin vé ŋkiyi. Áwune nèn tòŋ sóŋ sí, e bvə̀ʼtí mbìʼ se áwune‑eè kér e wo.

²⁰Akáŋ vee ataári nèn siì tàtí, e tòŋ sóŋ wir dzə̀m, e bvə̀ʼtí mbìʼ sév, e ghàr vikaʼày lèn e kiwo ke ŋkoòvì ki, aá kér sóŋ se vé‑eè tóŋé e kiwo ke yìy kí, e kù nèn a rəəmé jii, «nyùy rə̀r dzə̀ a dzə̀ e NYÙY TÀR wùn Gidiyon kiwo.»

²¹Wìr mòʼón mòʼón ku tìím e wun kirə̀ʼ mo áwune kì tiimen, e kaàrí kiláʼáy keé Midian, e tàr. Mànjòŋ woó Midian nèn bùʼ a dzə̀ shirəə́, a nyeŋkír e dzə̀m.

²²Mo wír vee ghii taár vìyi‑iì toŋen sóŋ, NYÙY TÀR yiì, wír veé Midiane kéʼ, a fùnèn vitú vév virə́ʼ vidzə̀m, e lò, a nyeŋkír, a dù e Bet‑Shita e dzəə ye yì du e Tsərera, du bèn du, mee e bìíy ŋkàlaʼ yee Abel‑Mehola e ghaa Tabbat.

²³Gidiyon nèn jàŋrì wír veé Isray ve vé‑eè dzə́ e nsay rám Navtali, à veé mbìv rám Asher, e lì wir dzə̀m wo wù‑uù dzə́ e mbìv rám Manasse, á fəə́, a jùm wír veé Midian.

²⁴Gidiyon tsə́nsí vé ntume, á ghánén woŋ agwan woó Efrayim e dzə̀m, aá ghán, suuy jii, «Vèn sə́y, e fùnèn wír veé Midian, e tìnér áwune fó tuumé sé ndzəv, e dù, e meé e Bet‑Bara, e kfə̀n tìnér fo tuumé sé Jordan.» Wír vee rám Efrayime nèn fəə̀kír adzə̀m, e fìnèr tuúmé sé ndzəv sí, e dù, e mèé e Bet‑Bara, e fìnèr sa seé Jordan.

²⁵Áwune nèn lò, e koò Orev wùn Seev vee vilìmbìy veé Midian, e yiì dù, e yùyrí Orev e kilan ke á sí yoŋ ji ké Orev, e yùyrí Seev e bii wo á yii nyeŋ báŋ se á fer meluʼ sho, wo á sí yoŋ ji wó Seev. Á ku nèn a jùm wír veé Midian bèy, e nèn lò, e lì kitú ke Orev wùn à ké Seev ki, e dù, e fò e Gidiyon e mbìv Jordan yìmòʼ.