Read Lamnso Atǎr Nsaʼ 9 Bible Online

Atǎr Nsaʼ 9 - Lamnso bible

Atǎr Nsaʼ 9

¹Abimelek woo wan Jerubbaal siíy, e lò, e dù fo afə́r yè woví wùn é Shekem, e sùúy aáwune wùn à kfə́ə yè woví e dzə̀m jii,

²«Vèn dzə́r e vilum veé Shekem adzə̀me jii, ‹Sà bòŋ ji wón Jerubbaal vee msaàmbàa tátí, a saʼ áwune mo bòŋ ji wáa saʼ woo mòʼón a?› Vèn kuúmé ji vèsən dzə̀ mensə́ memòʼón.»

³Afə́r yè woví nèn dù, a sàmèr jí sə́ e wun yir, wìr dzə̀m woó Shekem wáa yu. Shilív shév shí nèn kù tìím a dzə̀ e Abimelek wùn, bìʼ fo áwune kù‑uù bínsi ji wù dzə̀ á lúmér yev.

⁴Áwune nèn fə̀ə́r visha ve mbàm ve fəvír ví fo nyùy woo Baal‑Berit lav msaàmbà, e fò shó. Abimelek lì mbàm sìn, e làʼ wónlè ve á ŋaʼà, kfə̀n kér liì kisaŋ, á wáa jùmrì wun.

⁵Wù nèn lò, e dù e tàr wóv laʼ e Ofra, a yuyrí afə́r və́ vee wón Jerubbaal, aá dzə̀ wír msaàmbà, wù wáa seerí áwune e kitu ke tiy e mòʼón. Ku jòʼsì Jotam wo yì‑iì dzəə̀n wán wo terí wo wù‑uù gòʼòn, bìʼ fo wù‑uù lìrìn.

⁶Wír veé Shekem wùn à veé Bet‑Millòo nèn bàʼtí, e dù e sar kici ke kuʼùn kee *oak ke kí dzəə̀n é ghaa ŋkàlaʼ fo á tuyin kitóm, e nèn kòʼór Abimelek fo ji fon.

⁷Jotam yiì yù, e nèn kòʼ, e tìím e kitu ke Gwan Gerisim, e bùʼ shirəə́, a jàŋ, a suúy jii, «Vilum veé Shekem, vèn yuúrí kinyo kém kí, é Nyùy fiʼ yiì yuùrí sa kén.

⁸Yì‑iì dzə̀ é ghan símóʼ sí, vicí ví sìysì ji á kóʼór á fon wo wù wáa saʼ áwune. Ví nèn sùúy e kicí ké *oliv ki jii, ‹Kú a saʼ ver.›

⁹Kicí ké *oliv ki bìnèr jii, ‹A dzə̀ m yàr fó a fəə́r meŋgvə́r me á sheʼér anyùy wùn à wíri shó ji m wiy a saʼ vicí a?›

¹⁰Vicí ví nèn sùúy e kicí ké *fig ki jii, ‹Wìy, a saʼ ver.›

¹¹Kicí ké fig ki bìnèr jii, ‹A dzə̀ m yàr fó a koóm báŋ se sí nyomè ji m wáa saʼ ven á?›

¹²«Vicí ví nèn sùúy e kitiír ké *vayin ki jii, ‹Wìy, a saʼ ver.›

¹³Kitiír ké vayin ki bìnèr jii, ‹A dzə̀ m màʼtì meluʼ me á yii fer e báŋ sém sí, ji m wiy a saʼ vicí a? Meluʼ, a mè yii, aànyùy wùn à wíri yú vijuŋ.›

¹⁴Vicí vidzə̀m vi nèn sùúy e kijáʼ[22] kí jii, ‹Wìy, a saʼ ver.›

¹⁵Kijáʼ kí bìnèr e vicí ví jii, ‹A fèy dzə̀ rú ji vèn kóʼor mo ji fon won, vèn wìy, e beè e mǒ sar kindzə̀ə́ndzəm. Kí búŋ fó bèy, və́yí kù fəə̀ fo mǒ wùn, e tòn vimà vé vicí vé *sidar veé Lebanon.› »

¹⁶Jotam nen kfə̀n shaà fo mbìy, a dzətí jii, «Vèn‑eè lo tàr e shilív she juŋ shi, là kiloʼ, e bó a koʼór Abimelek ji fon a? Vèn‑eè lo yiì kijuŋ e Gidiyon wùn à kfə́ə rəə́ mo a yì‑iì dzə̀ vèn yiì á?

¹⁷Vèn kù yòʼ kuúme ji tàr wor‑iì funèn vindzəʼ vén a yì‑iì dzə̀ wù lày dzəʼə̀m rə́ á? Vèn kuúme ji a yì‑iì dzə̀ á yùyrí wun bìʼ fəə́r ye wù‑uù fəərin ven fo wír veé Midiané wo a?

¹⁸Ké lèn ki, vèn ló, e sə̀sín a dzə̀ e kfə́ə tàr worí kitu, a yuyrí wón və́ vee msaàmbà e kitu ke tiy e mòʼón à? Vèn kòʼór a dzə̀ Abimelek woo wan wiíy woo kwàn və́ ji fon woó Shekem ji bìʼ fo wù dzəə̀n fə́r won a?

¹⁹A dzə̀ ji kinyo ke vèn‑eè mùmèn e Gidiyon woo Jerubbaal wùn à kfə́ə rə́ kí‑iì dzə̀ kinyo kee réŋ kí, á bèy, vèn wàa yu vijuŋ ve Abimelek, é wù wáa yu sa vén.

²⁰Yii bèy, a dzə̀, a bó vèn yòʼ‑oò lo yiì a dzə̀ e shilív she juŋ shi, və́yí kù fəə̀ fo Abimelek wùn, e sə̀ʼsí wír veé Shekem wùn à veé Bet‑Millòo, é wú kfən fəə̀ sá fo wír veé Shekeme wùn à fo veé Bet‑Millòo, e nèn laàr Abimelek.»

²¹Jotam yòŋ bèy, e nèn nyèŋ, e dù e Beer, a dzə fo, bìʼ fo wù‑uù fan Abimelek woo wan tàr wov.

²²Abimelek sáʼ Isray viyá vitaár,

²³Nyùy nèn tùm kiyoy ke bi kí, kí wìy, e màʼ melaà e Abimelek wùn à wír veé Shekemé nsàn, á kèʼ, a sə kóy áwune áwune.

²⁴Nyùy‑iì yiì kinyo kìn bèn ji Abimelek wùn à wír veé Shekem ve vé‑eè tomen wune fíʼ a ker ŋgeʼlàʼ bìʼ kinyo ke áwune‑eè bùʼùn, wù wáa yuyrí afə́r və́ vee wón Jerubbaal vee msaàmbà.

²⁵Wír veé Shekeme nèn lèm wíri, á laáy é kitu ke gwan, a shoŋ vifá ve wìr dzə̀m wo wù‑uù shaa dzə́ə fó fo, e fíʼ sèn sáʼ Abimelek. Á ku nèn fèr e Abimelek.

²⁶Gaal woo wan Ebed nèn lò, e wìy e Shekem wùn aàfə́r vəə́. Wír veé Shekeme wìy, a way vifií e wun wùn.

²⁷Wáa dzə e ghan fóo fèy, wíri wáa fəə e kwaʼ, a baʼtí báŋ se vitiír vé vayin, a fèr meluʼ sho, e nèn lò, e wìy, a yi ŋkàʼ e nyùy wóv lav. Áwune wáa yinín, a nonín, á nèn lò, a shov Abimelek.

²⁸Gaal woo wan Ebed nèn lò, a wamnín jii, «Abimelek dzə̀ kfə́ ji la? Wù yòʼ fə̀m dzə̀ wír woó ram Shekem. A dzə̀ vèr ghàn é le, e bó a lìm fo wun? Wù yòʼ kù dzə̀ cáʼ ji wan Gidiyon, a Sebul kù dzə̀ ji taà ntoʼ və a? A dzə̀ vèsən wàa lìm fo wun ji ka? Á wáa ghvəm a dzə̀ Hamor woo tàr à ràm yee Shekem.

²⁹A dzə̀ ji wír veé Shekeme kì dzə̀ a dzə̀ e mǒ sar saʼ, bo m kì jùmrì Abimelek, e sùúy sho ji wù dzəsi á vé rər və́, e fəə̀, aá tsəə́m rə́r.»

³⁰Sebul wo wù‑uù sáʼ ŋkàlaʼ yú jí se Gaal woo wan Ebed, sí tínsín wun.

³¹Wù tsə́nsí aŋgàa ntum bámbám ji á du, e yèn Abimelek, e sùúy sho a jii, «Á yen, Gaal woo wan Ebed wùn aàfə́r vəə́ wìy ne e Shekem, a bayír wíri ji á wáa sə kóy vèn áwune.

³²Á bèy, ku lì vé rər vée, é vèn áwune ŋáʼáy vitsə́ʼə́, e dù, e làáy e vighìn.

³³Shùy bvəə́shi lóo to kijàvndzə, à tàv ŋàʼáy, e ghìʼ ŋkàlaʼ. Gaal wùn à wír vəə́ lóo fəə ji vèn áwune tám, áà ku yiì ke dzə̀ à yiì.»

³⁴Abimelek wùn à wír vəə́ nèn jàv akáŋ akweè, e ŋàʼáy vitsə́ʼə́, e dù, a neŋnín e ghaa Shekem, a shìy.

³⁵Áwune lòo sìn, a Gaal fəə́ ne, e tìím e shùu kày, á nèn keèmè, e fəə̀ fo á kì laayin.

³⁶Gaal yén áwune, e nèn sùúy e Sebul jii, «Yén, wíri vísə, aá sə́y fo loògwan.» Sebul bìnèr jii, «À yén a dzə̀ vindzə̀ə́ndzəm, a ví shwínin mo dzə̀ á wíri bey.»

³⁷Gaal kú a ruvtí jii, «Leéy, dzə̀ wíri mo á sə́y fo loògwan, a ŋgoo yìmòʼ wiy dzə́ə fó ghaa kici kee *oak ke wìr ve á shwéŋ vinyo.»

³⁸Sebul nèn bìnèr jii, «Shuu wo à kì fáŋé, dzə́r ji Abimelek sà dzə̀ la, é bo vèn wáa lìm fo wune bèé lèn? Bó yòʼ dzə̀ wír ve wò‑oò ŋwáy vìy bèn à? Shaà ri, e dù, é vèn áwune maʼ rə́r.»

³⁹Gaal nèn shèm mbìy wìr veé Shekem, wùn áwune wáa fùnèn Abimelek.

⁴⁰Abimelek dù, e ghàʼ Gaal, a jùm. Gaal wáa leʼ, wír aníne wáa lemkír, a neŋnín bèn, e kòʼ, e dù, e mèé e shùu kày yeé ŋkàlaʼ.

⁴¹Abimelek siíy, e dù, a dzə e Aruma. Sebul jùm Gaal wùn aàfə́rí, e fə̀ə́r fo Shekem.

⁴²Ndzə bvəə́shí, e ràn, wír veé Shekeme fəə́ é kwaʼ. Á dù, e sùúy e Abimelek.

⁴³Wù tóʼtí wír və́ vilíŋ vitaár, áwune wáa neŋ e kwaʼ, a shìy. Wù lòo leéy, e yèn wíri, aá fəə́ fo ŋkàlaʼ, wùn à vé rər vəə́ túmnín fo á kì lìrìn, e yùyrí áwune.

⁴⁴Abimelek wùn à ŋgoo ye wùn áwune kì dzəə̀né nyéŋkír, e dù fo mbìy, a teʼ shúu kày woó ŋkàlaʼ. Ŋgoo see sibaà sí nèn jùm wír ve á kì dzəə̀n é kwaʼ, e yùyrí adzə̀m.

⁴⁵Abimelek‑iì fùnèn kishiíy kifur, e tòn ŋkàlaʼ, e yùyrí wíri, e kèr ŋkàlaʼ e nsay, e wày shiŋgwáŋ, shí sə́tí nsay.[23]

⁴⁶Wìr dzə̀m wo wù‑uù dzəə̀n é kirùmèn kee Shekem‑eè yù sáʼka və̀n, e lèʼ, e dù lìr aáwuné kirə̀ʼ ke tavín kí, a dzə̀ lav cù nyùy woo El‑Berit.

⁴⁷Á nèn sùúy e Abimelek ji wír veé kirùmèn kee Shekeme bàʼtí ne a kirə́ʼ kimòʼón adzə̀m.

⁴⁸Abimelek wùn à wír ve wùn áwune‑eè dzəə̀n adzə̀me nèn kòʼ é Gwan Tsalmon, wù nèn lì njàm, e gwàr tám se vici shó, e bèʼèy e mbèʼ, e nèn sùúy e wír ve wùn áwune‑eè dzəə̀né ji á kú a yiì a réŋréŋ mo wun yiìn cércér.

⁴⁹Wìr dzə̀m nèn kù shètì rə́ə yee mbeʼ, a jùmrì Abimelek sho, a dù, a neèr e kirə̀ʼ ke tavín kí keé kirə̀ʼ ké cù. Á neèr bèy, e nèn wày və́y shó, wír veé kirùmèn keé Shekeme kpúkír, vikìy wùn à vilum moo wír nsə̀kì bèy.

⁵⁰Abimelek nèn dù e Tebets, e giìmè ŋkàlaʼ, e tàr, e nèn tòn fó.

⁵¹Yii bèy, a kirùmèn ke tavín kí‑iì dzə̀ é mvə̀m ŋkàlaʼ foo fèy. Wìr dzə̀m woó ŋkàlaʼ fèn, à vilum, à vikìy nèn dù, e nə̀ə́ sho, e fìn, e dù, e kòʼ é kitu ke kirùmèn fèy.

⁵²Abimelek wìy ji wun sí funèn a wír ve á dzəə̀n é kirùmèn fèy, e lì və́y, a koʼtí sho e shùu kirùmèn ji wun sí wáy a sho,

⁵³wiíy wùmòʼ nèn màʼ ŋgòʼ kiban fo yuv, yì wáʼ kighvə́r ké kitu ke Abimelek.

⁵⁴Wù nèn jàŋ wánlè nsùm wo wù‑uù béʼ vifá və́ vé rər cércér, e sùúy sho jii, «Ku shòʼ nyùy yè rə̀r, e yùyrí mo shó fo wíri yiì a sheʼ ji kì yùyrí á wiíy mo.» Wánlè nsùm və̀y nèn sòv, wù kpú.

⁵⁵Wír veé Israyi yén ji Abimelek kpù á ne, e nèn a kfənkír aáwuné melaʼ.

⁵⁶Á mo Nyùy‑iì siìrìn kinyo ke bi ke Abimelek‑iì yiìn e tàr wov, e yùyrí afə́r və́ vee msaàmbà, kí nèn kfə̀n e wun kitu.

⁵⁷Nyùy nèn kù siìr sa ŋkfə́tír liì wo bi wo wír veé Shekeme‑eè kérí, e yiì, shóv ye Jotam woo wan Jerubbaal‑iì shovin áwune, yí koó áwune.