Read Lamnso 2 Joon 1 Bible Online

2 Joon 1 - Lamnso bible

2 Joon 1

¹Sàŋ mo woo taà kintatì ŋwàʼ və̀n fo wò, Yìy à Wíri. Shòʼ Nyùy wò. A m sáŋ a dzə̀ fo vèn à wón vée. M koŋ ven é ŋàŋ, bìʼ fo vèsən sí tíy e kinyò ke ru kí adzə̀m. A kù dzə̀ mo wìr wo wù kiìn kinyo ke ru kí e dzə̀m koŋ ven.

²Aá koŋ bèy, bìʼ fo vèsən áwune sí tíy e kinyò fo, wír adzə̀m, a dzə̀ mo kí wíy a lùm e vèsə́n meliv ghán sidzə̀m.

³Mo vèsən sí tíy e Nyùy kinyò ke ru kí, koŋnìnè, m nén a lon jii, Nyùy woo Tàr wòsən wùn Wan və Jesus Kristu kú a leéy fo vèsən, a sham vèsən, a yiì, é melív mèsən mè wáa dzə nyaáŋ.

⁴Mò‑oò yèn mo wón vé ámóʼó jumrì kinyo ke dzəə̀n ke ru kí, a sheʼrí feyì. Aá jumrì réŋréŋ mo Nyùy suuy ji vèsən wáa yiì.

⁵Kii wò Yìy à Wíri, m nén a lon ji vèn à wóné ku nèn a lèm a nsər ye yì dzəə̀n ji vèsən wáa kòŋnìn. A bó yòʼ dzə̀ nsər ye fíy yìmòʼ, kù dzə̀ yìwun ye vèsən‑eè sí yú, e kèʼ mo vèsən‑eè yuun kinyo ke Nyùy.

⁶Kinyo ke dzə̀ kí wàa dìn ji vèsən koŋ Nyùy ki dzə̀ jii, vèsən wáa lèm a nsər sə́. A nsər ye wù‑uù foon e vèsən fó mbìy, e kèʼ mo vèsən‑eè yuun kinyo kfə́ dzə̀ jii, vèsən wáa kòŋnìn.

⁷A m sáŋ bèn, bìʼ fo wír ámóʼó wìyìn ne anín, a ghan virə́ʼ vidzə̀m, a boʼtí wíri bóʼtín, a kìnèn ji bó Jesus yòʼ‑oò lo wìy e nsay fèn, e lì rú á mbom wìr. A wír vee shooyi dzə̀ vé fòn kimboʼtì wo dzəə̀n Ŋgaà Vibàn Kristu.

⁸M nén a tir ven jii, vèn wáa yen fó màʼày a vinyo ve vèn wayin shilív shó, é ví lay kisáŋ. Vèn kú a ghar, e fíʼ wìy a ker vilaámé vidzə̀m ve Nyùy lèmèn e vèn.

⁹Vèn wáa kiíy jii, wìr wo bó wù yòʼ tíy a dzə̀ é yeʼéy ye yí lo fo Jesus Kristu, wáyri və́ vee vinyo, yòʼ dzə̀ wùn Nyùy wàa dzə kintatì. Wìr wo wù tíy kfə́ a dzə̀ é kinyò ke Jesus Kristu yéʼeyì, ŋgaàŋ dzə̀ kintatì wùn Nyùy, e kfə̀n a dzə wùn Wan və Jesus Kristu woo shooy.

¹⁰Mo kí siìn ben, a wìr wìy, e yèn ven, a yeʼéy kinyo ke bó yòʼ dzəə̀n ké Jesus Kristu, lá vèn yòʼ səə̀sí, e wày é lav. Lá wìr yòʼ fə̀m shàʼtì feyì, a shaʼtìi shó.

¹¹A m suuy bèn bìʼ foo, a wìr shàʼtì wír woo shooy, bo wù sí wáy sa kiwó e vinyò ve bi ví ve ŋgaàŋ yii.

¹²Vinyo vi dzə̀ vinín ve kì dzə̀ m sùúy e vèn. Yii bèy, a bó m yòʼ sáŋ a dzə̀ é ŋwàʼ fèn. M leey ji kintóʼ ki fəə́sín, é m wiy, e ghàn á ven. Vèsən lóo dzə fo si, é bo m fer vinyo vee shooy e vèn vidzə̀m. Vèn yú, é vèsən nèn màysì, a sheʼrí.

¹³Yìy à Wíri, wón fər wòo shaʼtì wò, fər wò wo dzəə̀n sá Yìy à Wíri wo Nyùy‑iì shoʼon.