Read Lamnso Jud 1 Bible Online

Jud 1 - Lamnso bible

Jud 1

¹Ŋwàʼ və̀ne sàŋ mo woo Jud wo dzəə̀n ŋgaà lìm Jesus Kristu. A dzə̀ mo woo Jud wo dzəə̀n fər Jeem. A m sàŋ a dzə̀ fo vèn ve Nyùy woo Tàr wòsən‑eè kòŋèn, e lì ji wír və́, e wày e Jesus Kristu kiwo.

²M nén a lon jii, Nyùy ku màysì, e shàm ven, a kòŋ ven, a yiì, é melív men mè wáa dzə nyaáŋ.

³Ŋkàr sem, mò‑oò ló a kwàʼ feyì ji m sáŋ ŋwàʼ fo vèn kùm vinyo ve Jesus Kristu‑uù yiìn, e tìn vèsən fó lòn, á lùŋ. M nèn yèn ji kinyo keé shií kí dzə̀ á ji m sáŋ ŋwàʼ fo vèn cér, a tir ven ji vèn wáa giìmè a kinyo ke Kristu ke Nyùy‑iì wayin ne e vèsən vee wír vəə́ kiwo. Wù kù‑uù fò a dzə̀ kinyo kee shoon kimòʼón, a bó kímóʼ kí yòʼ dzəə́ wìy a dzə.

⁴A m suuy bèn, bìʼ fo wír ve á méŋ Nyùy ámóʼó woonen ne, e nə̀ə́ e věn kintatì, a yeʼéy kév wíri jii, mo Nyùy bùʼùn ne ven, e lì ji wír və́, vèn bóy fó lòn, a dzə̀ vèn wàa yiì lèn a mo mensə́ men mè taʼà. Aá suuy bèy, nèn káy Jesus Kristu wo kù jòʼsìn wun ji Taàtá wòsən wo dzə̀ á wàa yu fo fo. A Nyùy‑iì yiì ne dìn lòn wo wù wíy màʼ e wír vee bené kitu.

⁵M nen kfə̀n a tàʼ, e kuumé vinyo vímóʼ ví, a kù dzə̀ ve vèn kiiyin ne kijuŋ. A ví dzə̀ jii, mo Nyùy fə̀m‑eè fəərin wír veé Isray fo wòŋ Ejiv ji á boy fó vikwàn, e fíʼ lùŋ adzə̀m, ámóʼó‑oò lo sìíy, e lòo meŋ wun, wù laàr vee shooy.

⁶A kù dzə̀ sá mo wù‑uù lovtin e nshèelav sə́ se sí‑iì loòn, a koʼnín, a shaà kilíŋ ke wù‑uù foon aáwune. Wù kúr áwune e sháŋ wo bó yòʼ dzə̀ wù bvə̀rkìr, e màʼ e ŋòròʼ, á wáa neŋ fo, a shìy kishiíy kee shó ke Nyùy wíy tinén nsaʼ wìr dzə̀m.

⁷A kù dzə̀ sá mo wír veé Sodom wùn Gomorra, à veé ntèʼ see fó ghaŋe‑eè tinsin shilív shé Nyùy. Vilum wùn à vikìy‑iì yii vinyo ve kisaŋ vi, li wún wóv, yii joonè shó, a bó Nyùy yòʼ‑oò bóm ji á wáa yiì sho e dzəə fóo fèy. Nyùy nèn tòn ntèʼ see shooy, sí shwí, wáa dzə kisəəm ké və̀y wo wù wíy màʼ wír ve á méŋ wun sho, a wú bo ghán sidzə̀m, là may.

⁸A kù dzə̀ vinyo ve wír ve á ghán, woóne e věn kintatì vìyi yii. Áwune kù yii vinyo ji á yù fó njèm, nèn li wún wóv, yii joonè shó, káy sáʼ e dzə̀m, ŋwáy vifá ve ví ghán e shwer, a ví kér vitaáví ŋwáyín fó tèr, kuurì kuùrìn.

⁹A bó yòʼ fə̀m dzə̀ Mayker wo dzəə̀n taà nshìylav Nyùy wù mùm bey. Yì‑iì dzə̀ é ghan se wùn Satan‑eè táŋ dzə́n Mooser, wù yòʼ‑oò lo mùm ji wun tín á kàʼ Satan. Wù kù‑uù suuy cáʼ jii, kù wíy saʼ Nyùy a wun.

¹⁰Wír vìne nén a dzə kév, a kuùrì vifá vidzə̀m kúurin, a bó á yòʼ kì mo ví dzəə̀n. Á kù yii vinyo mo áwune koó, réŋréŋ moo nyám se kwaʼ. A dzə̀ vinyo vìn ve ví yíi way áwune é ŋgeʼ.

¹¹Lòné dzə̀ aáwuné vitu. Áwune yii vinyo a dzə̀ vé Keen, kfə̀n maysì, wáyri wó e jay wo Balaam‑eè yiìn, bìʼ fo á wáy vifií vév a dzə̀ é mbàm. A Nyùy kù wíy laàr áwune adzə̀m mo wù‑uù laàrìn Kora wo wù‑uù loòn, a tsəy kóy wùn wun.[1]

¹²Wír vìne kù dzə̀ ve vèn áwune yínin kikóŋ ji á koŋnìn bìʼ Jesus, aá shoor kintatì kén shoórín, bìʼ fo á wiy bèy cáʼ ji á wáa no, a yi, a dìy a dzə̀ shuu wóv. Áwune dzə̀ moo wuú ye yí kóʼkir, shwéri jùm, e kfə̀n a dzə moo vicí ve á sòŋèn fó nsay, ví yóvrí, e yùm, bìʼ fo bó yòʼ dzə̀ ví kòóm.

¹³Á kfə́n a dzə sa moo ndzə́v lome, ye shwéri lóo tsəy, vifə́yfə́y ví wàa fə̀ʼ, a dzə̀ joonè wo áwune yii. Aá kfə̀n dzə̀ moo mejiy me mè kár karín, a bó mè yòʼ sə́ŋ fo Nyùy keèrìn. A Nyùy nàŋsín ne kirə́ʼ é ŋòròʼ wo wù sə́n ji cùm fo wù wíy way áwune, aá wáa neŋ fo viyá viyá là may.

¹⁴Enok wo wù‑uù ràmèn fo Adam ji lav saàmbà‑aà ló a suŋnín kùm wír vìn, a taŋ mo Nyùy wíy lovtí aáwune. Wù‑uù suuy jii, «Vèn yén, Nyùy wíy wìy wùn à nshèelav sə́ sí, ansə̀kì ansə̀kì,

¹⁵e tinén nsaʼ wìr dzə̀m, e màʼ ŋgeʼ e wír ve á méŋ wune adzə̀m. Wù wíy saʼ wíri fó vinyò ve á méŋ wun, buʼtì vidzə̀m, e kfə̀n saʼ sa fo liy se vé‑eè rə́si kuurì wun sho.»

¹⁶Enok wáa suúy bèy, a kù dzə̀ mo wír vìne rə́si ghvəvrì Nyùy, e làa yòʼ a yen kinyo, é kí wáa gheén áwune gheéy. Á kù yii vinyo a dzə̀ ve mensə́ mev mè taʼà, ghaŋtì shuu, sévti vinyo sévtín, leerì wíri ji á fíʼ a koóy kifá.

¹⁷Ŋkàr sem, vèn kú a kuumé a dzə̀ vinyo ve aŋgàa ntum Taàtá wòsən Jesus Kristùu‑uù suuy fo ghan ji ví wíy koóy vi.

¹⁸Vé‑eè ló a toʼtí e vèn jii, wíy lòo dzə e ghan sé bàm sí, é wír ámóʼó fəə́, a kèŋ ven kéŋen. A dzə̀ wír ve á méŋ Nyùy, yii a dzə̀ vinyo ve mensə́ mev mè tíy sho vidzə̀m.

¹⁹Dzə̀ wír vee shoon ve á bvəər vintatì vén, bìʼ fo bó á yòʼ yú fo Kiyoy ke Nyùy ki. Á yú a dzə̀ fo mensə́ mev mè.

²⁰Ŋkàr sem, vèn ku nèn a kìm vitú vén, a tiy a dzə̀ e Nyùy kinyò ke vèn biimen, a dù duùn fó mbìy, a tiír Kiyoy ke Ranén kí fó mbìy, a bùnrì ghán sidzə̀m.

²¹Vèn wáy vifií vén ví cáʼ ji vèn kú a yu a dzə̀ á fo Nyùy, é wù maysi, a kòŋ ven. Vèn wáa shìy ji nyaáŋ, é Taàtá wòsən Jesus Kristu wìy kfə̀n, e shàm ven, e lì, e wày é dzə̀ʼə̀m yee là may.

²²Vèn kú a sham wír ve á dzəə́ méŋ vinyóo, a naàrì áwune, aá wáa kiíy.

²³Vèn yén wír, a wù sí du a dzə̀ é və̀y, vèn sùn fó fo. Vèn kú a sham wir dzə̀m, yii bèy, a nyeŋ vinyo ve bi ví ve mensə́ mè dom wíri, aá yii vidzə̀m.

²⁴M nén a way ven a dzə̀ e Nyùy kiwo. Dzə̀ wun wo dzə̀ wù wàa tom ven fo vèn gbu, a yiì, é vèn wìy a tiy e wùn si là shilóm, a yen rán rə́ ye ghaʼáné, a sheʼrí.

²⁵Á kú a beè Taàtá wòsən Jesus Kristu, a burí Nyùy wo wù luŋèr vèsən. Kù mày wun Nyùy. Kér wun vitaáví vidzə̀m. Á wáa ghvəm wun woo Fon, a yu a dzə̀ fó fo, é sáʼ rəə́ wáa dù fo mbìy mo yí‑iì siìn fó ŋgùʼ, e kfə̀n a dzə lèn, e wìy a dzə ghán sidzə̀m, là may. Amen.