Read Lamnso Ŋgaà Yen 1 Bible Online

Ŋgaà Yen 1 - Lamnso bible

Ŋgaà Yen 1

¹Kinyo ke kí dzəə̀n é ŋwàʼ fèn ki dzə̀ ke Nyùy‑iì ghemrin ndzə e Jesus Kristu ji wù din e wír vəə́ mo vinyo vi yíi rəʼtí, a koóy. Kristu nèn tùm nshìylav rə, yì wìy, e yèn Joon woo ŋgaà lìm və, e dìn vinyo vee shooy sho.

²Wù sáŋ vinyo ve wù yenen vidzə̀m e ŋwàʼ fèn, a suúy feyì ji dzə̀ á kinyo ke kí‑iì loòn a dzə̀ fo Nyùy, a tòʼtí a Jesus Kristu e wun.

³A bòŋ ké wìr wo wù yoŋ kinyo ke dìnèn wun woo Nyùy kìn, kfən bòŋ ké wìr dzə̀m wo wù yuúri, yii mo kí dzəə̀n. Á wáa kiíy jii, ghán se vinyo vìn vi wíy a koóy si sì á fo mentsə̀m.

⁴Mo woo Joon nén a saŋ ŋwàʼ və̀n fo vèn vee vintatì vee saàmbà ve ví dzəə̀n é wòŋ woo Asia, a shàʼtì ven, a lon jii, Nyùy wo kiyoy kee saàmbàwìr ki tíy e wun shùu kàvàʼ kú a leéy fo vèn, a yiì, é melív men mè wáa dzə nyaáŋ. Dzə̀ wun woo Nyùy wo wù‑uù siìn, a wù dzə̀ lèn, a wù kù wíy a dzə.

⁵A m kfə̀n lón fo Jesus Kristu wo kù yii din wun kinyo ke dzəə̀n ke ru kí e vèsən. Dzə̀ wun wir mbìy wo wù‑uù kèʼèn, e fəə̀ fó kpu, a kér wun afon ve á sáʼ nsay adzə̀m. Vèsən kú a burí wun wo wù kòŋèn vèsən, e cùtì mensə́ mvə, vèsən bóy fo vèsə́n lǒn vinyò ve bi ví.

⁶A wù yiì ne, vèsən wáa dzə rám Fòn woo Nyùy, e kfə̀n a dzə atàá cù, a cù Nyùy woo Tàr wov. Vèsən ku nèn a kwa wun, a ghvəm vifon və́ ghán sidzə̀m, e dù, e mày. Amen.

⁷Vèn wáa kiíy ji Jesus waà sí wiyì, a wù wíy fəəsín a dzə̀ fó mvə̀m mbàʼ, é wìr dzə̀m yén e sí yéví. Wír ve vé‑eè sòvìn nsaŋ rə e kòŋé víyi wíy yen sa, é vitúm veé kitu ke nsay vidzə̀m vi yén wun, a yàʼ, a toŋnín. A kù dzə̀ mo kí wíy a dzə. Amen.

⁸Nyùy Tàr, wun woo Nyùy suuy jii, «M dzə̀ *Alfa, e kfə̀n a dzə *Omega, a dzə̀ ji Keʼ wùn à Kinjòʼsì kí.» Suuy wun woo Nyùy woo Ŋgaà Vitaàví Vidzə̀m, wo wù‑uù siìn, a wù dzə̀ lèn, a wù kù wíy a dzə.

⁹Mo woo Joon dzə̀ fə́r won wo vèsən tatin é kinyò ke Jesus Kristu. Vèsən nén a yen ŋgeʼ bìʼ wun wír adzə̀m. Yii bèy, á kú a dzə ji nyaáŋ, a yu a dzə̀ fó fo, a kiíy ji vèsən sì á wír və́, aá nə̀ə́ ne e wun mvə̀m vifòn. Mo m kù‑uù sí tíy a dzə̀ e Nyùy kinyò, fiʼtì kinyo ke Jesus Kristu, á nèn koò mo, e shìvìr e shiwòŋ shímóʼ shí é ntìntìn ndzə̀v, aá yoŋ ji Pamor.

¹⁰Nèn wìy lòo dzə e kishiíy ké Nyùy kímóʼ kí, Kiyoy ke Nyùy ki shóŋ mo, m yú, a jì wìr yoŋ mo fó bàm kitávín, súŋnin mo tóŋ wír sóŋ,

¹¹suuy jii, «Sáŋ vinyo ve à yén e wò si vìn vi é ŋwàʼ, e tsə̀nsí e vintatì vee saàmbà ve ví dzəə̀n é ntèʼ see, Efesor, Simeena, Pegamum, Tiyatira, Sardis, Filadeefia, wùn à Ladisia.»

¹²M lòo bìnkìr ji sà yoŋ la mo á, e yèn vitiir ve làm saàmbà, a ví kér lam si, aá fér e kisha ke mbàm ke baar kí,

¹³e kfə̀n yèn, a kifá ki tíy fo ntìntìn, shwínin wír, a wù máʼ kikúm kida, e tìm kikuúví e wùn vidìm, aá bá sá e kisha ke mbàm kìy ki.

¹⁴A nə́ŋ si fə́r fo kitu wo fə́rín ji páv moo mbàʼ, a wón sii njaʼkìr fo fo, baári moo kiliímé ke və̀y.

¹⁵Wúu rəə́ wáa tokír mo á tòn kisha ke baar kí, e nàŋsín, e yètìr. A jì kokìr fo fo mo bàʼtí kóŋ sí, a gbù.

¹⁶Wù wáa tiy fo, a ker shijiy saàmbà e wùn kiwo ke yìy kí, a nyùy ye á baàyìn mbìv sidzə̀m fəə́ fo shuù wo, a dzə̀ kiliímé kfə́, a vishí və́ ví njaʼkìr moo sí shùy yeé kiŋkoŋrìshùy.

¹⁷Mo m yenen wír və̀y, e nèn gbù e si wo, a m sì moo kimkpú ke kifa. Wù màʼ kiwó kfə́ ké yìy kí e mǒ wùn, e sùúy jii, «Lá à yòʼ a fàn. Dzə̀ mo wo dzəə̀n Keʼ, e kfə̀n a dzə Kinjòʼsì,

¹⁸a m dzə̀ shó ghán sidzə̀m. Mò‑oò lo kpù, yii bèy, m sì lèn e tin, a m gòʼ ne kàŋ mòʼón. Kinyo kee kùm kpú ki dzə̀ a dzə̀ e mǒ kiwo, a kér mo kimbàʼ ke dzə̀ kí mvə̀ʼ shúu wòŋ aŋkfə.»

¹⁹Wù nèn kfə̀n sùúy e mò jii, «Sáŋ vinyo ve à yén vi vidzə̀m e ŋwàʼ, kìn dzə̀ ve ví sí kooyì, kìn ve ví dzəə́ wìy a koóy.

²⁰Ku yuùrí nsàv se vimfìʼìr vìn si. Mejiy mee saàmbà me à kì yenen e mǒ kiwo ke yìy kí mè tíy fo aŋgàa ntum ve á tiísi kinyo kém é vintatì vee saàmbà. Vitiir ve làm vee saàmbà vi wáa tiy fo vintatì vee saàmbà vee shooy vi.»