Read Lamnso Ŋgaà Yen 10 Bible Online

Ŋgaà Yen 10 - Lamnso bible

Ŋgaà Yen 10

¹M kfən siì yèn, a kigha ke nshìylav Nyùy kímóʼ kí sə́ʼəy fo yuv, a mbàʼ báʼtí é wùn wó mo wù màʼ a dzə̀ ndzə̀y, a rə́mé daá é kitu wo. Vishí və́ ví wáa njàʼkìr moo sí shùy, shwín sí wáa baarí moo vitsə́m vé və̀y.

²Yì ghár váv ŋwàʼ e kiwo, aá bvə́r ne, e tìír kiwuú ké yìy kí é rìbà ndzəv, e tìír ké ŋkoòvì ki fó kwaʼ.

³Yì tiím bey, e jàŋ kitávín mo wàm bvərə̀ʼ. Kishèv ke kí yii wámkir kàŋ saàmbà ki nèn bìnèr.

⁴M yú kinyo ke vishèv vìy vi wám bèy, suuyì, e lò ji m sáŋé, jì nèn yòŋ mo fó yuv, e sùúy jii, «Lá à yòʼ sàŋ. Ku lèm vinyo ve vishèv vìn vi suuyin ví e wò bvə̀m, e làa yòʼ yiì, é wìr kiíy.»

⁵Nshìylav Nyùy ye yì tiirin kiwuú é ndzəv, kímóʼ kí wáa tiy fo kwaʼ rə̀y nàn kiwó kfə́ ké yìy kí é yuv,

⁶a lìʼ, a kàn Nyùy wo wù gòʼòn kàŋ mòʼón, a dzə sho ghán sidzə̀m. Dzə̀ wun wo wù bomen yúv, e bòm nsay, e kfə̀n fə̀ə́r ndzə́v, e bòm vifá ve ví dzəə̀n é virə̀ʼ fóo fèn vidzə̀m. Wù wáa lìʼ, a suúy jii, Nyùy yòʼ waà dzəə́ yìi siʼsíʼ.

⁷Nshìylav rə ye yì meen ji saàmbà yíi toŋ rə́ yee sóŋ, é vinyo ve Nyùy‑iì yiìn ne sìysì fo ŋgùʼ, la wìr yòʼ kìíy vi wàá koóy vidzə̀m, réŋréŋ mo wù‑uù tóʼti aàŋgàa lìm və́ ve vé‑eè tiísi kinyo kfəə́.

⁸Jì ye yì kì yòŋèn mo fó yuv rə̀y nèn kfə̀n sùúy e mò jii, «Dù fo nshìylav ye yì kér kiwuú é rìbà ndzə̀v, kímóʼ kí fó kwaʼ rə̀sə, e sə̀ ŋwàʼ wo yì bvə̀rìn, a ker e kiwoo.»

⁹M nèn dù, e yèn wun, a lon ji wù ku fò á shiŋwàʼ shee shooy. Yì bìnèr jii, «Kò ri. À sə́, à wàa kfər. Wú yíi a nyòm e wò shuù moo vilu, nəə e bvə̀m, é wú kor vitó vé.»

¹⁰M nèn sə̀ shiŋwàʼ shìy fo kiwo wo, e kfə̀r, a wú nyom rú é shuù moo vilu. M kfə́r, e mèy, wú nèn kòr vitó vém.

¹¹Mo m kfərin, á nèn sùúy e mò jii, á lèn a wo m kù kfə̀n kér fó a fìʼtì kinyo ke m yéné, a m kù dzəə́ yiì a fìʼtì a kinyo ke kí wíy koóy woŋ sinín, e koóy vitúm vinín, kìn kíwun ki súŋnin lám a dzə̀ wó gha, e kfə̀n a fìʼtì sa ke kí wíy koóy afon.