Read Lamnso Ŋgaà Yen 11 Bible Online

Ŋgaà Yen 11 - Lamnso bible

Ŋgaà Yen 11

¹Á nèn fò mo mbàŋ yìmòʼ a dzə̀ ye á yii fiʼ kirə́ʼ shó, e sùúy jii, m du, e fìʼ a lav ye á cu Nyùy sho, e kfə̀n fìʼ a mo kíy cùu dzəə̀n. M fiʼì, m tàŋ á wír ve á cu Nyùy e lav foo fèy.

²Lá m yòʼ fìʼ a maàndzə yee fó ndzə. M maʼti á fó bèy. Á fò ne fó a ji wír ve bó á yòʼ kiìn Nyùyi wáa yiì sho mo á koŋè. Áwune wíy tòn ŋkàlaʼ ye lav cù tíy sho rə̀n, e nyàvrì sho a ŋwee nshòv sibaà e mkweè.

³Jì yee shooy nèn kfə̀n sùúy jii, wun wíy tsənsí wír və́ abaà ve á wíy a tunér kinyo kfə́. Aá wíy wìy, aá máʼ ndzə̀y sé kpu, é wun wáa shìy áwune, aá tiísí á ntum Nyùy kishiíy kishóv mntuùfú é ghiì baà é nsə̀kì (1,260).

⁴Wù wáa suúy bèy, aàŋgàa ntum vee abaà víne dzə̀ vicí vé *oliv vee vibaà ve á yoŋ e ŋwàʼ ŋgaà ntum Nyùy wùmòʼ, kfə́n a dzə vitiir ve làm vibaà, a vifá vìn vi tíy a dzə̀ e Nyùy woo Taà Ndzə si.

⁵Áwune wíy wìy, wìr lóo mùm áwune, aá cú və́y fó shuù, e laàr aŋgàa vibàn vee shooy sho. A dzə̀ mo kí wíy a dzə, wìr wíy mùm áwune, bo ŋgaàŋ kpù ne.

⁶Áwune kér vitaáví ve dzə̀ á sə̀tí yúv, la wuú yòʼ shèm é nsay fo ghan se áwune wíy tiisí ntum yev. Aá kfə̀n kér vitaáví sá ve dzə̀ á bìnèr ndzə́v sí, sí kfə̀n ji mensə́, kfə̀n kér vé a màʼ ŋgeʼ si é kitu ke nsay mo áwune koŋè, kìn dzə̀ ŋgeʼ see ka.

⁷Áwune wíy màysì ntum yev, fiʼtì, é wìr wo wù fəə́ fo biíntùr, aá yoŋ ji nyám ye beemén, səʼ áwune é vindzə̀ʼ, e ghàʼ áwune, e yùyrí.

⁸Aá maʼti dzə́n sév, é sí wáa neŋnín e dzəə yeé ŋkàlaʼ Jerusalem foo fèy, a dzə̀ fo vé‑eè kùmèn Tàr wov Jesus e kintam. Kfə́n a dzə ŋkàlaʼ ye á yii yov lám é wùn wó, kuu ji Sodom, kìn ji Ejiv.

⁹Á yúyri áwune bey, é wíri wáa leéy mo á néŋninè e meé vishiíy vitaár e kimbéʼ ki, é la á yòʼ biìmé ji á dzəəme. Wíy a leéy wír veé kitu ke nsay adzə̀m, kìn dzə̀ veé wòŋ vəné, kìn kitúm kiné kí, kìn á súŋnin lám gha, kìn dzə̀ kfə́ə wìr msòŋ rəné, aá kú a leéy,

¹⁰a seŋ ji sà kpù rú wír vìn a. *Aŋgàa ntum Nyùy vee abaà víne‑eè mùm á vinyo feyì, kitú ke nsay ki yén ŋgeʼ ŋkóŋkóŋ. Aá nèn a seŋ bèy, a nyàvnìn, a yinín.

¹¹Vishiíy vee vitaár e kimbéʼ ki vin vi mày, m yén mo Nyùy feesin kiyoy, kí nəə́ aáwuné wùn, á kóʼór, e nànèn e yuv. Wíri yén, shuu wóví yúm, á wáa fàn.

¹²Aŋgàa ntum vìyi nèn yù, a jì jaŋ áwune fó yuv kitávín jii, «Vèn kóʼ fen.» Á ku nèn lò e mvə̀m mbàʼ, a koʼ, aàŋgaà vév vibàné leey, jaayì.

¹³Kú a dzə e ghan see shooy, nsay nèn kèʼ, a sə̀ʼ, virə́ʼ ví wáa kèrkìr e mvə̀mlaʼ fèy. Lav si lóo dzə e ghvə̀m, bo yee mòʼón keesì. Wíri‑iì kpù nsə̀kì saàmbà (7,000). Kibér ki nèn a yàʼ, a fàn Nyùy wo wù dzəə̀n é yuv, a suúy jii, «Wù shaà vitaáví, wù dzə̀ rú e gháʼán.»

¹⁴Ŋgeʼ se sí meen ji baà sí nèn shaà. A dzə̀ se lùŋ wo wiy kì jaŋ sìy. A se sí meen ji taár sí sì é kiwo.

¹⁵M kfən yiì lòo yen, nshìylav Nyùy ye yì meen ji saàmbà tóŋ rə́ yee sóŋ. M yú, a jí si yor e yuv, jaŋ jii, «Ndzə dzə̀ lèn e dzə̀m, a wíy a saʼ Tàr wor Nyùy wùn Wan və woo *Mfə̀ə́r, a saʼ ghán sidzə̀m, viyá viyá là may.»

¹⁶Kfə́m sé wìr see nshòv sikweè e mbaà se sí dzə́ aàkàvàʼ e Nyùy si si nèn gbù, e tsə̀m sí e nsay, a ghvəm wun,

¹⁷a kwa jii: «Éè Nyùy Tàr, wò woo Nyùy woo Ŋgaà Vitaàví Vidzə̀m, wò‑oò sì fó kèʼ, aà dzə̀ shó lèn. Vèr beerì wò, bìʼ fo à neèrìn ne vitaáví vé ve ghaʼán ví lèn, e kèʼ, a saʼ ndzə.

¹⁸Wír veé ndzə fène‑eè lò, a taŋ sáʼ yé, a ghán sí ghèén ne lèn, à dín áwune mo wo woo dòʼshwiíy dzəə̀n. A sì ghán se à yíi koʼór aŋkfə fo si, e tinén vinyo vév. Kfə́n a dzə ghán se à yíi laamé aŋgàa lìm vé ve vé‑eè tiísi ntum yè, e kfə̀n laamé wír vé adzə̀m, áwune ve á ghvə́m yír yé, kìn dzə̀ wo kùʼùn, kìn dzə̀ wo terí. Kfə́n a dzə sa ghán se à yíi laàr wír ve vé‑eè ghán, bívir ndzə.»

¹⁹M ku nèn yèn, aá mvə́ʼ lav Nyùy ye yì dzəə̀n é yuv. M yén ŋkùv wo á lem vifá ve *mensàŋ me Nyùy‑iì gwàrìn wùn à wíri shó, a wù tíy fo mvəm. Kishèv ki ku nèn a njàʼkìr, a baykír, virə́ʼ ví wáa dzə̀mkìr, nsay wáa sə̀ʼ, a kèrkìr, lúm se mentiy si wáa keèsì fo yuv.